අන්තර්ජාතික ක්‍රිකට් කවුන්සිලය විසින් ප්‍රකාශයට පත් කරන ලද ලෝක එක්දින ක්‍රිකට් කණ්ඩඩායම් ශ්‍රී ලංකාවෙන් ක්‍රීඩකයින් සිවුදෙනෙකු ඇතුළත්ව සිටිති. චරිත් අසලංක, එම කණ්ඩායමේ නායකයා ලෙසින් පත් කර තිබේ.

චරිත් හැරුණු කොට ආරම්භක  පිතිකරු පැතුම් නිස්සංක, අංක 4 පිතිකරු කුසල් මෙන්ඩිස් සහ තුන් ඉරියව් ක්‍රීඩකයා ලෙස වනිඳු හසරංගව නම් කර තිබේ. මෙම කණ්ඩායමේ කඩුලු රකින්නා ලෙසද කුසල් මෙන්ඩිස්ව නම් කර තිබේ.

වර්තාමන එක්දින ලෝක ශූරයින් බවට පත්ව සිටින ඔස්ට්‍රේලියාවත් එහි අනුශූරයින් වූ ඉන්දියාවෙන් එකම ක්‍රීඩකයෝ ඇතුළත්ව නොසිටීම කැපී පෙනෙන සිදුවීමක් වේ. නම් කරන ලද කණ්ඩායමට ඇෆ්ගනිස්තානයෙන් හා පාකිස්තානයෙන් ක්‍රීඩකයින් තිදෙනෙකු බැගින් එක්ව සිටින අතර බටහිර ඉන්දීය කොදෙව් කණ්ඩායමෙන් එක් ක්‍රීඩකයෙක් තෝරාගෙන තිබේ.

නායකත්වය් පත් චරිත් අසලංක නිමාවූ වසරේදී ශ්‍රී ලංකාව වෙනුවෙන් එක්දින ජාත්‍යන්තර තරග 16 කදී ලකුණු 605 ක් රැස් කිරීමට සමත්ව සිටින්නේ සිම්බාබ්වේපිලට එරෙහිව රැස් කරන ලද ලකුණු 101 ක සමගිනි. එම ශතකයට අමතරව අර්ධ හතක 4 ක් ද ඔහු රැස් කරගෙන සිටිනනේ ඉනිමක ලකුණු ලබාගැනීමේ සාමාන්‍ය 50.20 ක් රදවා තබා ගනිමිනි.

කුසල් මෙන්ඩිස් එක්දින ජාත්‍යන්තර තරග 17 කදී ලකුණු 742 ක් වාර්තා කර සිටින්නේ නවසීලන්තයට එරෙහිව රැස් කරන ලද ලකුනු 143 ඉහළම ලකුණු සංඛ්‍යාව ලෙසින් සටහන් කර ගනිමිනි. ශතකයක් හා අර්ධ ශතක 6 ක් මෙන්ඩිස් රැස් කරගෙන ඇත්තේ ඉනිමක ලකුණු ලබා ගැනීමේ සාමාන්‍ය 53 ක් රඳවා තබා ගනිමිනි.

ශ්‍රී ලංකාව වෙනුවෙන් එක්දින තරගයකදී ද්විත්ව ශතකයක් වාර්තා කර ඇති එකම පිතිකරුවා වන පැතුම් නිස්සංක තරග 12 කදී ලකුණු 694 ක් රැස්කරගෙන සිටියි. ඇෆ්ගනිස්තානයට එරෙහිව පල්ලේකැලේ ජාත්‍යන්තර ක්‍රීඩාංගණයේදී ලකුණු 210 ක් රැස් කරමින් ජාත්‍යන්තර වැඩි ආකර්ශණයක් තමන් වෙත නතු කර ගැනීමට පැතුම් නිස්සංක සමත්වූවේය. එම ද්විත්ව ශතකයට අමතරව බංග්ලාදේශයට එරෙහිව ශතකයක් සහ අර්ධ ශතක 2 ක් ලබා ගනිමින් පැතුම් සිය සාමාන්‍ය 63.1 ක් රඳවාගැනීමට සමත්ව සිටින්නේය.

ශ්‍රී ලංකාව වෙනුවෙන් එක්දින ජාත්‍යන්තර තරග 10 කට සහභභාගිව ඇති වනිඳු බිඳ හෙළා ඇති කඩුලු සංඛ්‍යාව 26 ක් වේ. කඩුල්ලක් දවා ගැනමේ සාමාන්‍ය 15.6 ක් රඳවා තබාගැනීමට සමත්ව සිටින දකුණත් පා දඟ පන්දු යවන්නා ඉකුත් ජනවාරි මසදී සිම්බාබ්වේ ට එරෙහිව ලකුණු 19 ක් ඇතුළත දවා ගන්නා ලද කඩුලු 7 එම වසරේ ඔහුගේ හොඳම පන්දු යැවීමේ දක්ෂතාව ලෙසින් සනිටුහන් වේ.

මීට සමගාමීව අන්තර්ජාතික ක්‍රිකට් කවුන්සිලය විසින් නම් කරන ලද වසරේ එක්දින කණ්ඩායමට ශ්‍රී ලංකා කාන්තා කණ්ඩායමේ නායිකා චමරි අතපත්තු ඇතුළත්ව සිටින්නීය. ශ්‍රී ලංකා කණ්ඩායමේ ආරම්භක පිතිකාරිණිය ලෙසින් චමරි කටයුතු කළත් එක්දින කණ්ඩායමේ ඇයට හිමිව තිබෙන්නේ අංක 3 පිතිකරණ ස්ථානය වේ.

ජාත්‍යන්තර ක්‍රිකට් කවුන්සිලය විසින් නම් කරන ලද ලෝක එක්දින ක්‍රිකට් කණ්ඩායම: චරිත් අසලංක (නායක), සයිම් අයුබ් (පාකිස්තානය), රහ්මානුල්ලා ගුර්බාස් (ඇෆ්ගනිස්තානය), කුසල් මෙන්ඩිස් (ශ්‍රී ලංකාව), පැතුම් නිශ්ශංක (ශ්‍රී ලංකාව), ෂර්ෆේන් රදර්ෆර්ඩ් (බටහිර ඉන්දීය කොදෙව්), අස්මතුල්ලා ඕමාර්සායි (ඇෆ්ගනිස්තානය), වනිඳු හසරංග (ශ්‍රී ලංකාව), ෂහීන් ෂා අෆ්රිඩි (පාකිස්තානය), හරිස් රවුෆ් (පාකිස්තානය), ඒ.එම්. ගසන්ෆාර් (ඇෆ්ගනිස්තානය).