එවකට පොලිස්පතිවරයා ලෙසින් කටයුතු කළ දේශබන්දු තෙන්නකෝන් මහතාට ශ්‍රී ලංකා ක්‍රිකට් ආයතනය විසින් වැටුප් ඇතුළු තවත් වරප්‍රසාද ලබා දුන්නේ යැයි විසර්ජන පනත් කෙටුම්පත් පිළිබඳ පාර්ලිමේන්තු විවාදයේදී මන්ත්‍රී හේෂා විතානගේ මහතා විසින් කරන ලද චෝදනා සියල්ල පදනම් විරහිත සහ අසත්‍ය චෝදනා බව සඳහන් කර සිටින ශ්‍රී ලංකා ක්‍රිකට් ආයතනය ඒ සියල්ල තරයේ ප්‍රතික්ෂේප කර සිටියි.
2025 වසරේ මාර්තු මස 18 වැනිදා පැවැති එම පාර්ලිමේන්තු විවාදයේදී මන්ත්‍රී විතානගේ මහතා චෝදනා කර සිටියේ ශ්‍රී ලංකා ක්‍රිකට් ආයතනයේ විධායක කමිටු තීරණයකට අනුව එවකට පොලිස්පතිවරයා වූ දේශබන්දු එන්නකෝන් මහතාට රු. 150,000/= ක වැටුපක් ගෙවා ඇති බවත්, ඊට අමතරව ලැප්ටොප් පරිගණකයක්, ජංගම දුරකථනයක් සහ වෙනත් වරප්‍රසාද ලබා දී ඇති බවත්ය. එබැවින් මෙම ක්‍රියාවන් අල්ලසක් ලෙස සලකන බවත්, අල්ලසක් ලබා දීම සම්බන්ධයෙන් ශ්‍රී ලංකා ක්‍රිකට් නිලධාරීන් නීතියේ විධිවිධාන යටතේ වගකිව යුතු බවත් මන්ත්‍රී විතානගේ මහතා ප්‍රකාශ කරන ලදී.
මෙම චෝදනා සම්පූර්ණයෙන්ම අසත්‍ය, පදනම් විරහිත සහ කිසිදු සත්‍ය පදනමකින් තොර බව ශ්‍රී ලංකා ක්‍රිකට් ආයතනය තරයේ ප්‍රකාශ කර සිටියි.
විදේශීය කණ්ඩායම් ශ්‍රී ලංකාවට පැමිණ තරග කිරීමේදී දෙස් විදෙස් ක්‍රීඩකයින්, උත්සව සහ රාජ්‍ය නායකයින් ඇතුළු සංචාරයට සහභාගිවන සම්භාවනීය අමුත්තන් සඳහා ඉහළම මට්ටමේ ආරක්ෂාව සහතික කිරීම සඳහා ශ්‍රී ලංකා ක්‍රිකට් ආයතනය තම මූලිකත්වය ගෙන කටයුතු කරනු ඇත. එබැවින් එසේ සම්බන්ධ වන සියලුදෙනාගේ ආරක්ෂාව සහ එය පවත්වාගෙන යෑම සඳහා ඉහළ පෙළේ හමුදා නිලධාරීන් සහ ජ්‍යෙෂ්ඨ පොලිස් නිලධාරීන් ඇතුළු ශ්‍රී ලංකාවේ ආරක්ෂක නිලධාරීන් සමඟ ශ්‍රී ලංකා ක්‍රිකට් ආයතනය අඛණ්ඩව කටයුතු කරනු ලබන බවද ශ්‍රී ලංකා ක්‍රිකට් ආයතනය මෙහිදී දැනුම් දී සිටියි.
මේ සම්බන්ධයෙන්, ජාත්‍යන්තර ක්‍රිකට් සංචාර වලදී පුළුල් ආරක්ෂක පියවරයන් සහතික කිරීම සඳහා ක්‍රියාකාරී සහ විශ්‍රාමික ඉහළ නිලධාරීන් දෙපිරිසගේම සහාය ලබා ගැනීම පොදු සහ අත්‍යවශ්‍ය පිළිවෙතකි.
දේශබන්දු තෙන්නකෝන් මහතා බස්නාහිර පළාතේ ජ්‍යෙෂ්ඨ නියෝජ්‍ය පොලිස්පති (නියෝජ්‍ය පොලිස්පති) ලෙස සේවය කළ කාලය තුළ, ජාත්‍යන්තර සංචාරවලට අදාළ ආරක්ෂක කටයුතු සම්බන්ධයෙන් ශ්‍රී ලංකා ක්‍රිකට් ආයතනය ඔහුගේ විශේෂඥතාව ලබා ගැනීමට උත්සාහ කළේය. මෙම ඉල්ලීම කරන ලද්දේ රට කොවිඩ් වසංගතයෙන් මතුවන “නව සාමාන්‍ය” තත්වයක් අත්විඳිමින් සිටි කාලයකදීය. ජාත්‍යන්තර හා දේශීය ක්‍රිකට් තරඟාවලිවල නියැලී සිටින ක්‍රීඩකයින්ගේ සහ නිලධාරීන්ගේ ආරක්ෂාව සහතික කිරීම සඳහා සෞඛ්‍ය බලධාරීන් විසින් ක්‍රියාත්මක කරන ලද “කොවිඩ් කෙටුම්පත” ක්‍රියාත්මක කිරීමට ශ්‍රී ලංකා ක්‍රිකට් ආයතනයට අමතර ආරක්ෂාවක් සපයා ගැනීමට සිදුවිය. එම කාලය තුළ ජාත්‍යන්තර හා දේශීය තරඟාවලි කිහිපයක් කිසිදු බාධාවකින් තොරව පැවැත්වීමට ශ්‍රී ලංකා ක්‍රිකට් ආයතනයට උපකාරී වූයේ ඒ ආකාරයේ ගත් පියවරයන් නිසා බව ශ්‍රී ලංකා ක්‍රිකට් ආයතනය මේ මොහොතේ මතක් කර දී සිටියි.
ශ්‍රී ලංකා ක්‍රිකට් ආයතනයේ ඉල්ලීම අනුව තෙන්නකෝන් මහතා දැනුම් දී සිටියේ සිය වෘත්තීයභාවය සහ නිල රාජකාරීන්වලට අනුව ඔහුගේ රාජකාරි කටයුතු කිරීම සඳහා බලධාරීන්ගේ පූර්ව අවසරය අවශ්‍ය බවයි. ඊට අමතරව පොලිස් නිලධාරියෙකු ලෙස ඔහුගේ නිල රාජකාරීවලින් පිටත කිසිදු විශේෂ කාර්යයක් කිරීමට ඔහුට බලයක් නොමැති බවද තෙන්නකෝන් මහතා ශ්‍රී ලංකා ක්‍රිකට් ආයතනය වෙත දැනුම් දී සිටියේය.
කෙසේ වෙතත්, එවැනි කටයුතුවල ජාතික වැදගත්කම සැලකිල්ලට ගනිමින්, අවශ්‍ය පරිදි අවශ්‍ය ආරක්ෂක සහාය ලබා දීමට ඔහු සූදානම් බව සහතික කළේය.
දේශබන්දු තෙන්නකෝන් මහතාට ශ්‍රී ලංකා ක්‍රිකට් ආයතනය කිසිදු ගෙවීමක් කර නොමැති බවත්, ලැප්ටොප් පරිගණකයක්, ජංගම දුරකථනයක් හෝ වෙනත් වරප්‍රසාද ලබා දී නොමැති බවත්, ඔහු ශ්‍රී ලංකා ක්‍රිකට් ආයතනයේ උපදේශකයෙකු ලෙස හෝ වෙනත් කිසිදු තනතුරක නිරත වී නොමැති බවත් ශ්‍රී ලංකා ක්‍රිකට් ආයතනය තරයේ ප්‍රකාශ කර සිටියි.
පාර්ලිමේන්තු මන්ත්‍රී හේෂා විතානගේ මහතා විසින් පාර්ලිමේන්තු වරප්‍රසාද යටතේ කරන ලද පදනම් විරහිත සහ නොමඟ යවන සුළු ප්‍රකාශ ශ්‍රී ලංකා ක්‍රිකට් ආයතනය දැඩි ලෙස හෙළා දකින අතර, ප්‍රසිද්ධ ප්‍රකාශ සිදු කිරීමේදී ආයතනවල සහ පුද්ගලයන්ගේ කීර්ති නාමයට සහ අඛණ්ඩතාවයට අනවශ්‍ය හානියක් සිදු නොවන පරිදි වගකීමෙන් යුතුව කටයුතු කරන ලෙස ශ්‍රී ලංකා ක්‍රිකට් ආයතන ඒ මහතාගෙන් ඉල්ලා සිටියි.
