ආබාධයක් හේතුවෙන් ටෙස්ට් තරගාවලිය අහිමිවූ ළහිරු කුමාරට බංග්ලාදේශයට එරෙහිව ලබන ජූලි මස 02 වැනිදා ආරම්භ වන තරග 3 කින් සමන්විත එක්දින තරගාවලියට ක්‍රීඩා කිරීමේ අවස්ථාවද අහිමිව තිබුණද පළමු ටෙස්ට් තරගට ක්‍රීඩා කරන ලද තුන් ඉරියව් ක්‍රීඩක මිලාන් රත්නායකව ශ්‍රී ලංකා එක්දින සංචිතයට කැඳවා තිබේ. ශ්‍රී ලංකාව වෙනුවෙන් ටෙස්ට් තරග 5 කට මිලාන් රත්නායක ක්‍රීඩා කර තිබුණත් ඔහුව එක්දින කණ්ඩායමකට මෙවර කැඳවා ඇත්තේ පළමු වතාවට වේ.

බංග්ලාදේශයට එරෙහිව ගාල්ල ජාත්‍යන්තර ක්‍රීඩාංගණයේ පැවැති පළමු ටෙස්ට් තරගය සඳහා මිලාන් රත්නායක ක්‍රීඩා කළ ද ඇළපත ප්‍රදේශයේ මස්පිඬු ඇදීමක් හේතුවෙන් ඔහුට මේ වන විටත් කොළඹ එස්. එස්. සී. ක්‍රීඩාංගණයේ පැවැත්වෙන දෙවැනි ටෙස්ට් තරගය සඳහා නම් කරන ලද සංචිතයෙන් ඉවත් කරනු ලැබීය. කෙසේ වෙතත් ඔහුව එක්දින සංචිතයට එක් කොට ඇත්තේ ඉදිරියේදී පැවැත්වෙන ශාරීරික යෝග්‍යතා පරීක්ෂණයෙන් ඔහු සමත් වුවහොත් පමනි.

ක්‍රීඩකයින් 16 දෙනෙකුගෙන් සමන්විත ශ්‍රී ලංකා එක්දින කණ්ඩායමට රත්නායකට අමතරව පිතිකරණ අංශය ශක්තිමත් කිරීමට සදීර සමරවික්‍රමවත් වේග පන්දු අංශය ශක්තිමත් කිරීම සඳහා වමත් වේග පන්දු යවන ඩිල්ෂාන් මදුශංක සහ එෂාන් මාලිංගව නම් කිරීමට උපුල් තරංගගේ ප්‍රධානත්වයෙන් යුතු ශ්‍රී ලංකා ක්‍රිකට් තේරීම් කමිටුව පියවර ගෙන තිබේ. මොවුන් තිදෙනා කණ්ඩායමට පැමිණීම නිසා ඔස්ට්‍රේලියාවට එරෙහිව පැවැති තරගාවලියට ඇතුළත්ව සිටි නුවනිඳු ප්‍රනාන්දුට සහ මොහොමඩ් ශිරාස්ට සිය ස්ථානය අහිමිවී තිබේ.

සදීර අවසන් වතාවට ශ්‍රී ලංකා ‘ඒ‘ කණ්ඩායමේ එක්සත් අරාබි එමීර් රාජ්‍යෙය් පැවැති තුන් කොන් ක්‍රිකට් තරගාවලියේදී ශතකයක් සහ අර්ධ ශතකයක් සමඟින් තරග 4 කදී ඉනිමක ලකුණු 197 ක් රැස් කළේය. ඉනිමක ලකුණු ලබා ගැනීමේ සාමාන්‍ය 98.5 ක් රඳවා තබා ගැනීමට සමත් වූ දකුණත් පිතිකරුවා එම තරගාවලියේදී ශ්‍රී ලංකාව වෙනුවෙන් වැඩිම ලකුණු රැස් කරන ලද පිතිකරුවා බවට පත්වූවේය. එම තරගාවලියේදී නොදැවී රැස් කරන ලද ලකුණු 129 ඔහුගේ ඉහළම ලකුණු සංඛ්‍යාව වේ.

දෙරට අතර එක්දින තරගාවලිය ලබන ජූලි මස 02 වැනිදා කොළඹ ආර්. ප්‍රේමදාස ක්‍රීඩාංගණයේදී ආරම්භ වන අතර දෙවැනි තරගය 05 වැනිදා පැවැත්වෙනු ඇත. ජූලි මස 08 වැනිදා පැවැත්වීමට නියමිත තෙවැනි තරගය මහනුවර පල්ලේකැලේ ක්‍රීඩාංගණයේදී පැවැත්වෙනු ඇත

ශ්‍රී ලංකා එක්දින කණ්ඩායම – චරිත් අසලංක (නායක), පැතුම් නිස්සංක, අවිශ්ක ප්‍රනාන්දු, නිශාන් මදුෂ්ක, කුසල් මෙන්ඩිස්, සදීර සමරවික්‍රම, කමිඳු මෙන්ඩිස්, ජනිත් ලියනගේ, මිලාන් රත්නායක, දුනිත් වෙල්ලාලගේ, මහීෂ් තීක්ෂණ, ජෙෆ්රි වැන්ඩර්සි, වනිඳු හසරංග, ඩිල්ෂාන් මදුශංක, අසිත ප්‍රනාන්දු, එෂාන් මාලිංග.

තරග කාලසටහන

ජූලි 02 – පළමු එක්දින තරගය – කොළඹ ආර්. ප්‍රේමදාස ක්‍රීඩාංගණය

ජූලි 05 – දෙවැනි එක්දින තරගය – කොළඹ ආර්. ප්‍රේමදාස ක්‍රීඩාංගණය

ජූලි 08 – තෙවැනි එක්දින තරගය – පල්ලේකැලේ ජාත්‍යන්තර ක්‍රීඩාංගණය