සංචාරක ශ්‍රී ලංකා කණ්ඩායම සහ සිම්බාබ්වේ අතර තරග 3 කින් සමන්විත පන්දුවාර විස්සයි-20 තරගයෙන් ශ්‍රී ලංකාව පරදවා කඩුලු 5 ක ජයක් අත්කරගත් සත්කාරක සිම්බාබ්වේ කණ්ඩායම තරග 3 කින් සමන්විත තරගාවලිය 1-1 ක් ලෙසින් සම කර ගත්තේය. විස්සයි-20 අන්තර්ජාතික ඉතිහාසයේදී ශ්‍රී ලංකා කණ්ඩායම දවා ගත් දෙවැනි අඩුම ලකුණු සංඛ්‍යාව ලෙසින් සටහන් වුණු අද රැස් කර ගන්නා ලද ලකුණු 80 ක ඉලක්කය හඹා ගිය සිම්බාබ්වේ පිතිකරුවෝ පන්දුවාර 14.2 කදී කඩුලු 5 ක් දැවී තරගය ජයග්‍රහණය කළහ.

ඉලක්කය කුඩා වුවද ධෛර්යවන්ත ලෙසින් පන්දු යැවූ දුෂ්මන් චමීර ලකුණු 19 කට කඩුලු 3 ක් බිඳ හෙළමින් ප්‍රතිවාදීන් අසීරුතාවයට පත් කළද පිතිකරුවන් විසින් ලබා දී තිබුණු ලකුණු 80 තරගයක් දීමට කිසි සේත්ම ප්‍රමාණවත් නොවීය. එම පන්දු යැවීම ප්‍රධාන කොට සත්කාරක කණ්ඩායමේ කඩුලු 5 ක් බිඳ හෙළීමට ශ්‍රී ලංකා පන්දු යවන්නන් සමත් වූ නමුදු රයන් බර්ල් සහ ටශින්ගා මුසේකිවා පිළිවෙලින් ලකුණු 20 සහ 21 වශයෙන් ලකුණු රැස් කරමින් සිම්බාබ්වේ පිල ජයග්‍රහණය කරා රැගෙන ගියහ.

මීට පෙර විස්සයි-20 ජාත්‍යන්තර තරගයකදී ශ්‍රී ලංකා කණ්ඩායම දැවී ගිය අඩුම ලකුණු සංඛ්‍යාව බවට පත්ව තිබුණේ 2024 වසරේදී ඇමරිකාවේ පැවැති පන්දුවාර විස්සයි-20 ලෝක කුසලාන ක්‍රිකට් තරගාවලිය යටතේ දකුණු අප්‍රිකානු කණ්ඩායම හමුවේ දැවී ගිය ලකුණු 77 විය.

කාසියේ වාසිය හිමිකරගත් සිම්බාබ්වේ නායකයා පළමුව පන්දුවට පහර දීම සඳහා ශ්‍රී ලංකා පිලට ආරාධනර කර සිටි අතර එහි සාර්ථක ප්‍රතිඵල අත්කර සිම්බාබ්වේ පන්දු යවන්නෝ පළමු කඩුලු 5 ම ලකුණු 38 ක් ඇතුළත බිඳ හෙළා ගත්හ. බ්‍රෑඩ් එවන්ස් සහ සිකන්දර් රාසා එක්ව දැවී ගිය කඩුලු 10 න් 6 ක්ම සමව හිමිකම් කියද්දී ශ්‍රී ලංකා ඉනිම තවත් පන්දුවාර 2 කුත් පන්දු 2 ක් ඉතිරිව තිබියදී නිමාවට පත්විය. මෙම තරගයේදී සත්කාරක කණ්ඩායමේ පන්දු රැකීමද අති විශිෂ්ඨ මට්ටමේ පැවැතීමද කැපී පෙනිණ.

ශ්‍රී ලංකා ඉනිම පැත්තෙන් සඳහන් කිරීමට විශේෂිත වූ දස්කමක් වාර්තා නොවිණ. වසර 3 කට පසු කණ්ඩායමට පැමිණි කමිල් මිශාර රැස් කරන ලද ලකුණු 20 හැර ශ්‍රී ලංකා පිලේ එකම පිතිකරුවකු හෝ ලකුණු 20 සීමාව ඉක්මවා යෑමට අපොහොසත් වූහ එපමණක් නොව ඉලක්කම් දෙකකින් ලිවිය හැකි මට්ටමේ ලකුණු සංඛ්‍යාවක් ලකුණු පුවරුවට රැඳවීමට සමත් වූවේද චරිත් අසලංක (18) සහ දසුන් ශානක (15) පමණි.

ශ්‍රී ලංකාව පන්දුවාර 17.4 කදී සියලු දෙනා දැවී ලකුණු 80 යි – කමිල් මිශාර 20, චරිත් අසලංක 18, දසුන් ශානක 15, පැතුම් නිස්සංක 08, කුසල් මෙන්ඩිස් 01, නුවනිඳු ප්‍රනාන්දු 01, කමිඳු මෙන්ඩිස් 00, දුෂාන් හේමන්ත 07, දුෂ්මන්ත චමීර 00, මහීෂ් තීක්ෂණ 06, බිනුර ප්‍රනාන්දු 00, බ්‍රෑඩ් එවන්ස් 15/3, සිකන්දර් රාසා 11/3, බ්ලෙසිං මුසරබානි 14/2, ෂෝන් විලියම්ස් 19/1)

සිම්බාබ්වේ කණ්ඩායම පන්දුවාර 14.2 කදී කඩුලු 5 ක් දැවී ලකුණු 84 යි – (බ්‍රයන් බෛනට් 19, ටඩිවංශේ මරුමානි 17, ෂෝන් විලියම්ස් 00, සිකන්දර් රාසා 02, රයන් බර්ල් 20*, ටෝන් මුන්යොන්ගා 03, ටශිංගා මුසෙකිවා 21*, දුෂ්මන්ත චමීර 19/3, මහීෂ් තීක්ෂණ 28/1, බිනුර ප්‍රනාන්දු 14/1)