ශ්‍රී ලංකා ක්‍රිකට් ආයතනය විසින් වාර්ෂිකව සංවිධානය කරනු ලබන ලංකා ප්‍රිමියර් ලීග් (LPL) ක්‍රිකට් තරගාවලියේ හය වැනි අදියර හෙවත් 2025 තරගාවලිය මෙම වසරේදී නොපැවැත්වෙන බව ශ්‍රී  ලංකා ක්‍රිකට් ආයතනය අද (22 දා) නිවේදනය කර සිටියේය.  ඉදිරි 2026 වසරේ පෙබරවාරි සහ මාර්තු යන මාසයන්හිදී ශ්‍රී ලංකාව සහ ඉන්දියාවේ සම සත්කාරකත්වය යටතේ පැවැත්වෙන අයි.සී.සී. විස්සයි-20 ලෝක කුසලාන ක්‍රිකට් තරගාවලිය සඳහා හොඳින් සූදානම්වීමේ පුළුල් අවශ්‍යතාවය සලකා බැලීමෙන් අනතුරුව ශ්‍රී ලංකා ක්‍රිකට් ආයතනය ඉහත තීරණය ගෙන තිබේ.

කණ්ඩායම් 20 කගේ සහභාගිත්වයෙන් පැවැත්වෙන එම ලෝක කුසලාන ක්‍රිකට් තරගාවලිය සඳහා අන්තර්ජාතික ක්‍රිකට් කවුන්සිල මාර්ගෝපදේශයන්ට අනුව ලෝක කුසලාන තරගාවලියට සත්කාරකත්වය දරනු ලබන සියලුම ක්‍රීඩාංගණ නිසි කාල සීමාව වන විට යෝග්‍ය තත්ත්වයෙන් තිබිය යුතුය. ඒ අනුව ලෝක කුසලාන ක්‍රිකට් තරගාවලියට පෙර ක්‍රීඩාංගණයන්හි සූදානම සහතික කිරීම කෙරෙහි පූර්ණ අවධානය යොමු කොට ඇති ශ්‍රී ලංකා ක්‍රිකට් ආයතනය ලංකා ප්‍රිමියර් ලීග් තරගාවලිය සම්බන්ධයෙන් උක්ත තීරණය ගෙන තිබේ.

ඒ අනුව ලංකා ප්‍රිමියර් ලීග් ක්‍රිකට් තරගාවලිය 2026 වසරේදී වඩාත් සුදුසු කාලසීමාවකට මාරු කිරීම හරහා රට තුළ සාර්ථක ලෝක කුසලාන තරගාවලියක් පැවැත්වීම සඳහා අවශ්‍ය යටිතල පහසුකම් වැඩි දියුණු කිරීටම ප්‍රමාණවත් කාලයක් ලැබෙනු ඇති බව ශ්‍රී ලංකා ක්‍රිකට් ආයතනයේ විශ්වාසය වී තිබේ.

• ප්‍රේක්ෂක ආසන සහ පහසුකම් වැඩි දියුණු කිරීම
• ක්‍රීඩකයින් සඳහා වන ක්‍රීඩාගාර, පුහුණුවීම් කටයුතු කරන ප්‍රදේශ සහ අනෙකුත් පහසුකම් නවීකරණය කිරීම
• ජාත්‍යන්තර තරග විකාශන පහසුකම් යාවත්කාලීන කිරීම සහ නව පද්ධති එකතු කිරීම
• ගෝලීය මාධ්‍ය ආවරණය සඳහා මාධ්‍ය කුටිවල යටිතල පහසුකම් ඉහළ නැංවීම
• බහු ජාතික තරගාවලියකට අදාළ සාමාන්‍ය ස්ථානවල අවශ්‍යතා වැඩි දියුණු කිරීම

යන පහසුකම් යාවත්කාලීන කිරීමේ කටයුතු ශ්‍රී ලංකාවේ තරග පැවැත්වෙන ජාත්‍යන්තර ක්‍රීඩාංගණව තුළ සිදුවෙමින් පවතියි.

ඒ අතරින් දැනට පැවැත්වෙන අයි.සී.සී. කාන්තා ලෝක කුසලාන ක්‍රිකට් තරගාවලියේ තරග 11 ක් කොළඹ ආර්. ප්‍රේමදාස ජාත්‍යන්තර ක්‍රීඩාංගණයේ පැවැත්වීම හේතුවෙන් එහි ප්‍රතිසංස්කරණ කටයුතු තාවකාලිකව නවතා දමා තිබෙන අතර එම තරගාවලිය අවසන් වූ වහාම එම ක්‍රීඩාංගණයේ සංවර්ධන කටයුතු නැවත ආරම්භ කිරී ශ්‍රී ලංකා ක්‍රිකට් ආයතනය බලාපොරොත්තුවෙන් පසුවෙයි.