හොංකොං සික්සස් ක්‍රිකට් තරගාවලියේ අද (08) ශ්‍රී ලංකා කණ්ඩායම නේපාලය සහ එක්සත් අරාබි එමීර් රාජ්‍යය පරාජය කළේය. ශ්‍රී ලංකා – නේපාලය තරගයේ දී ශ්‍රී ලංකාව කඩුලු තුනකින් ද ශ්‍රී ලංකා – එක්සත් අරාබි එමීර් රාජ්‍ය අතර තරගයේ දී ශ්‍රී ලංකාව ලකුණු 39කින් ද ජය ලැබීය.

 ශ්‍රී ලංකා – නේපාල තරගයේ දී ප්‍රථමයෙන් පන්දුවට පහර දුන් නේපාලය සිය පන්දුවාර හය අවසානයේ කඩුලු හතරකට ලකුණු 86ක් රැස් කළේය. ශ්‍රී ලංකාව මේ තරගයෙන් ජය ගත්තේ පන්දුවාර 5.3ක දී කඩුලු තුනකට ලකුණු 89ක් රැස් කරමිනි.

 ශ්‍රී ලංකා පිතිකරුවන් අතුරින් කැපී පෙනුණු ධනංජය ලක්ෂාන් නොදැවී ලකුණු 36ක් ද නිමේෂ් විමුක්ති නොදැවී ලකුණු 33ක් වශයෙන් වැඩිම ලකුණු රැස් කළහ.

 මේ පිතිකරුවන් දෙදෙනා ශ්‍රී ලංකාව ලකුණු 20කට කඩුලු තුනක් දැවී සිටිය දී (පන්දුවාර 2.2ක දී) එක්ව සිව් වන කඩුල්ලට පන්දුවාර 3.1ක දී නොදැවී ලකුණු 69ක සබඳතාවයකින් කණ්ඩායම ජයග්‍රහණය කරා ගෙන ගියහ.

 ශ්‍රී ලංකාව සහ එක්සත් අරාබි එමීර් රාජ්‍ය අතර තරගයේ දී ශ්‍රී ලංකාව පන්දුවාර හයක දී රැස් කළ ලකුණු 97ට පිළිතුරු ලෙස එක්සත් අරාබි එමීර් කණ්ඩායම පන්දුවාර හය අවසානයේ සියල්ල දැවී රැස් කළේ ලකුණු 58කි.

 මේ තරගයේ දී ශ්‍රී ලංකා කණ්ඩායම වෙනුවෙන් ළහිරු සමරකෝන් පන්දු 13ක දී හතරේ පහරක් හයේ පහර හතරක් සමග ලකුණු 31ක් ද ධනංජය ලක්ෂාන් පන්දු 12ක දී හතරේ දෙකක් හයේ හතරක් සමග නොදැවී ලකුණු 38ක් ද රැස් කළහ.

ලකුණු විස්තරය

• ශ්‍රී ලංකාව කඩුලු 3කින් නේපාලය පරාජය කරයි

 නේපාලය පන්දුවාර හයක දී කඩුලු 4ට 86යි – (සංදීප් ජෝරා 39, ලෝකේෂ් බාම් 31, තරිඳු රත්නායක 17/2යි)

 ශ්‍රී ලංකාව පන්දුවාර 5.3ක දී කඩුලු 3ට 89යි – (ධනංජය ලක්ෂාන් නොදැවී 36, නිමේෂ් විමුක්ති නොදැවී 33, රුපේෂ් සිං 17/2යි)

• ශ්‍රී ලංකාව ලකුණු 39කින් එක්සත් අරාබි එමීර් කණ්ඩායම පරාජය කරයි

 ශ්‍රී ලංකාව පන්දුවාර හයක දී 97යි – (ළහිරු සමරකෝන් 31, ධනංජය ලක්ෂාන් නොදැවී 38, ෂාහිඩ් අලි 29/2යි)

එක්සත් අරාබි එමීර් කණ්ඩායම පන්දුවාර 6ක දී කඩුලු හයකට ලකුණු 58යි – (සටීර් ඛාන් 24, මොහමඩ් අර්ෆාන් 18, ළහිරු මධුශංක 10/2යි)