ශ්‍රී ලංකා ජාතික පිරිමි කණ්ඩායමේ පන්දු රැකීමේ පුහුණුකරු ලෙස හිටපු ඉන්දීය කණ්ඩායමේ පුහුණුකරුවකු වන රාමක්‍රිෂ්ණන් ශ්‍රීධර් මහතා පත් කිරීමට ශ්‍රී ලංකා ක්‍රිකට් ආයතනය පියවර ගෙන තිබේ. ඔහුගේ මේ පත්වීම 2025 දෙසැම්බර් මස 11 වැනිදා සිට මාර්තු මස 10 වැනිදා දක්වා බලපැවැත්වෙනු ඇත.

ඉන්දීය ක්‍රිකට් පාලක මණ්ඩලයේ ක්‍රිකට් පුහුණු අංශයේ තෙවැනි ශ්‍රේණියේ සහතිකයකට හිමිකම් කියන ශ්‍රීධර් මහතා වර්ෂ 2014 සිට 2021 දක්වා කාලය තුළ පැවැති ජාත්‍යන්තර තරග 300 කට අධික සංඛ්‍යාවකදී ඉන්දීය ජාතික කණ්ඩායමේ පන්දු රැකීමේ පුහුණුකරු ලෙසින් කටයුතු කොට අත්දැකීම් සම්භාරයක් ලබා ඇති පුහුණුකරුවෙකි.

ශ්‍රීධර් මහතාගේ නව භූමිකාව තුළින් ශ්‍රී ලංකා ජාතික කණ්ඩායමේ පන්දු රැකීමේ අංශයේ ප්‍රමිතීන් වැඩි දියුණු කිරීම කෙරෙහි අවධානය යොමු කරමින් පාකිස්තානය සහ එංගලන්තයට එරෙහිව පැවැත්වෙන ඉදිරි සංචාරවලදී ශ්‍රී ලංකා කණ්ඩායමේ ක්‍රීඩකයින් සමග කටයුතු කිරීමට නියමිතය. මෙම තරගාවලි දෙකෙන් අනතුරුව පැවැත්වෙන අයි.සී.සී. පන්දුවාර විස්සයි-20 ලෝක කුසලාන තරගාවලිය සඳහා ශ්‍රී ලංකා පිලේ පන්දු රැකීමේ අංශය සූදානම් කිරීම වෙනුවෙන් ඔහු කටයුතු කරනු ඇත.

“ශ්‍රී ලංකා කණ්ඩායමේ ක්‍රීඩකයින් සෑම විටම සහජ දක්ෂතාවය, ඕනෑම පීඩන තත්ත්වයක් යටතේ ඔරොත්තු දීමේ හැකියාව මෙන්ම සාමූහිකත්වය වෙනුවෙන් පෙනී සිටිනවා. මගේ වගකීම වෙලා තියෙන්නේ නව ක්‍රමයන් හඳුන්වාදීමට වඩා ක්‍රීඩා විලාශය, දැනුවත්භාවය සහ ක්ෂේත්‍රෙය් ඇති අභිමානය ස්වභාවිකව වර්ධනය කළ හැකි පරිසරයක් නිර්මාණය කිරීමයි“ යැයි මේ පිළිබඳව අදහස් දක්වා සිටින ශ්‍රීධර් සඳහන් කර සිටියේය.

ශ්‍රීධර් මහතා ශ්‍රී ලංකා ක්‍රිකට් පද්ධතියට ආගන්තුකයකු නොවන අතර ඔහු මේ වසර මුලදී ජාතික උසස් දක්ෂතා පුහුණු මධ්‍යස්ථානයේ දින 10 ක විශේෂිත පන්දු රැකීමේ සටහනක් පැවැත්වූවේය.

ශ්‍රී ලංකා ක්‍රීඩකයින් සතු සාම්ප්‍රදායික ඉක්මන් අත් චලනය, එසැනින් පන්දුවට දක්වනු ලබන ප්‍රතිචාරය  ක්‍රීඩාව තුළ ඉගෙනුම් පරිසරයක් නිර්මාණය කිරීම තුළින් තවදුරටත් කණ්ඩායමේ පන්දු රැකීම වැඩි දියුණු කළ හැකි“ යැයි ශ්‍රීධර් මහතා වැඩිදුරටත් සඳහන් කර සිටියි.