ශ්‍රී ලංකා ක්‍රිකට් සංවිධානය කළ අන්තර් සමාජ ප්‍රධානතම තෙදින ලීග් ක්‍රිකට් තරගාවලිය පසුගියදා නිමාවට පත්වූයේ කෝල්ට්ස් ක්‍රීඩා සමාජය ශූරතාව දිනාගනිමිනි.  කණ්ඩායම් 14ක් සහභාගී වූ මෙම තරගාවලිය A සහ B ලෙස කාණ්ඩ දෙකක් යටතේ ආරම්භ වූ අතර, එහි පළමු වටයෙන් ඉදිරියට පැමිණි කණ්ඩායම් 8ක් සුපිරි 8 වටයට තේරී පත් විය.

සුපිරි 8 වටයේ දැක්වූ විශිෂ්ට ක්‍රීඩා ප්‍රදර්ශනය හේතුවෙන් කෝල්ට්ස් කණ්ඩායම ප්‍රසාද ලකුණු 72.765ක් ලබා ගනිමින් ශූරතාව හිමිකරගත් අතර, ඒස් කැපිටල් කණ්ඩායම 71.795ක් සමඟින් දෙවැනි ස්ථානයත්, මුවර්ස් කණ්ඩායම 58.635ක් සමඟින් තෙවැනි ස්ථානයත් දිනාගත්හ.

මෙම තරගාවලිය තරග 67කින් සමන්විත වූ අතර, ඉනිම් 222ක් තුළ ලකුණු 57,147ක් රැස්වීමත් සමඟින් ක්‍රීඩකයන්ගේ ප්‍රබල දක්ෂතා ඉස්මතු විය. එහිදී ද්විත්ව ශතක 8ක්, ශතක 82ක් සහ අර්ධ ශතක 268ක් වාර්තා වීම කැපී පෙනේ. හතරේ පහර 5,407ක් සහ හයේ පහර 691ක් ද වාර්තා වූ අතර, පන්දු 95,836ක් තුළ කඩුලු 1,793ක් බිඳ වැටුණි.

තරගාවලියේ වටිනාම ක්‍රීඩකයා ලෙස ඒස් කැපිටල් කණ්ඩායමේ වනුජ සහන් නම් කරනු ලැබීය. ඔහු තරග 10කදී ලකුණු 484ක් ලබා ගනිමින් කඩුලු 54ක් ද දවාගනිමින් තුන් ඉරියව් දක්ෂතා පෙන්වා දුන්නේය. ඔහුගේ 153 ලකුණු ඉනිම සහ කඩුලු 5ක් බැගින් ලබාගත් අවස්ථා කිහිපයක් ඔහුගේ දක්ෂතාව තවදුරටත් තහවුරු කළේය.

තරගාවලියේ හොඳම පිතිකරු ලෙස එන්.සී.සී. කණ්ඩායමේ ලහිරු උදාර තේරී පත් වූ අතර, ඔහු ලකුණු 908ක් රැස් කරමින් වැඩිම ලකුණුලාභියා බවට පත්විය. පොලිස් කණ්ඩායමට එරෙහිව ලබාගත් ලකුණු 261ක් මෙම තරගාවලියේ ඉහළම පුද්ගලික ඉනිම ලෙසද සටහන් විය.

පන්දු යැවීමේ අංශයෙන් පොලිස් කණ්ඩායමේ දිලුම් සුදීර කැපී පෙනුණි. ඔහු කඩුලු 61ක් දවාගනිමින් තරගාවලියේ වැඩිම කඩුලුලාභියා බවට පත්විය. පානදුර කණ්ඩායමට එරෙහිව ලබාගත් කඩුලු 11ක් (තරගයක) ඔහුගේ විශිෂ්ටතම දක්ෂතාව ලෙස සැලකේ.

තරගාවලියේ සුවිශේෂී වාර්තා අතර එන්.සී.සී. කණ්ඩායම විසින් ලකුණු 631/9ක් රැස් කිරීම, කණ්ඩායම් දෙකක් එක්ව ලකුණු 1086ක් රැස් කිරීම සහ 1000ට අධික සමස්ත ලකුණු වාර්තා වූ අවස්ථා 10ක් ඇතුළත් වේ. එමෙන්ම ටැමිල් යුනියන් කණ්ඩායමේ ලහිරු සමරකෝන් 7/38 ලෙස ඉනිමක හොඳම පන්දු යැවීමත්, 13/82 ලෙස තරගයක හොඳම පන්දු යැවීමත් වාර්තා කළේය.

මෙවර තරගාවලිය ක්‍රීඩකයන්ගේ ඉහළ මට්ටමේ දක්ෂතා, තරගකාරීත්වය සහ ක්‍රීඩා ආත්මය නිරූපණය කළ සාර්ථක තරගාවලියක් ලෙස සලකන්නට හැකිය. මෙම තරගාවලියේ ජය සංකේත ප්‍රධානය ශ්‍රී ලංකා ක්‍රිකට් විධායක කමිටු සාමාජික, තරග සංවිධාන කමිටුවේ සභාපති නලින් අපෝන්සු මහතාගේ ප්‍රධානත්වයෙන් කොළඹ එස්. එස්. සී. ශ්‍රවණාගාරයේදී පැවැත්විණ. මෙම අවස්ථාවට තරගාවලි සංවිධායක කමිටු ලේකම් කසුන් ප්‍රනාන්දු, තරගාවලි සංවිධාන කමිටු සාමාජික මාලන් ප්‍රනාන්දුපුල්ලේ සහ ශ්‍රී ලංකා ක්‍රිකට් මෙහෙයුම් ප්‍රධානී චින්තක එදිරිමාන්න යන මහත්වරුන්ගේ ප්‍රධානත්වයෙන් පැවැත්විණ.

මෙම ජයසංඛේත ප්‍රධානයට සමගාමීව ටියර් ‘බී‘ කොටසේ දක්ෂතා දැක්වූ ක්‍රීඩකයින්ද කුසලාන සහ ත්‍යාග ලබාදීම සිදුකෙරුණු අතර එහිදී දක්ෂතම  පන්දු යවන්නා ලෙසින් නාවික ක්‍රීඩා සමාජයේ ඩිලංක අවුරත් ද, දක්ෂතම පිතිකරු ලෙස සිංහල ක්‍රීඩා සමාජයේ නිපුන් ධනංජය ද සහ දක්ෂතම ක්‍රීඩකයා සම්මානයෙන් යුද හමුදා ක්‍රීඩා සමාජයේ ශෙහද සොයිසාද සම්මාන දිනා ගත්හ.