ශ්‍රී ලංකා ක්‍රිකට් ආයතනය සංවිධානය කරන වයස අවුරුදු 19න් පහළ ශ්‍රී ලංකා යූත් ලීග් එක්දින ක්‍රිකට් තරගාවලියේ අවසන් මහ තරගයට සුදුසුකම් ලබා ගැනීමට ගාල්ල කණ්ඩායම සමත් වූයේ කොළඹ උතුර කණ්ඩායමට එරෙහිව කඩුලු 5ක ජයක් වාර්තා කරමිනි.

කොළඹ තර්ස්ටන් විද්‍යාලයීය ක්‍රිකට් ක්‍රීඩාංගණයේදී පැවැති මෙම තරගයේ කාසියේ වාසිය දිනාගත් කොළඹ උතුර කණ්ඩායම පළමුවෙන් පන්දුවට පහර දීමට තීරණය කළ අතර ඔවුන් සියලුදෙනා දැවී පන්දුවාර 49.4කදී ලකුණු 232ක් රැස් කළේය.

කොළඹ උතුර ඉනිමේ කොඳුනාරටිය වූයේ සෙනුජ වැකුණුගොඩ ය. ඔහු පන්දු 68කදී හතරේ පහර 10ක් සහ හයේ පහරක් සමඟින් ලකුණු 71ක් රැස් කරමින් ඉනිමේ වැඩිම ලකුණුලාභියා බවට පත්විය. ඊට අමතරව කිත්ම විදානපතිරණ පන්දු 31කදී හතරේ පහර 4ක් සහ හයේ පහරක් සමඟින් ලකුණු 33ක් රැස් කළ අතර, දුල්නිත් සිගේරා පන්දු 42කදී ලකුණු 32ක් ලබා දුන්නේය. ඉනිම අවසානයේ ශ්‍රීරාම් ජීවහන් නොදැවී ලකුණු 22ක් ලබා සිටියේය.

කොළඹ උතුර ඉනිම සීමා කිරීමේදී ගාල්ල පන්දු යවන්නන් අතරින් ලතීන්ද්‍ර ආකාශ් ලකුණු 39කට කඩුලු 3ක් දවා ගනිමින් කැපී පෙනුණේය. ඔහුට අමතරව තරුන් දම්සිත් සහ ගිම්හාන් රසාංජන කඩුලු 2 බැගින් දවා ගනිමින් සහාය ලබා දුන්හ.

ලකුණු 233ක ඉලක්කයක් හඹා ගිය ගාල්ල වයස අවුරුදු 19න් පහළ කණ්ඩායම ආරම්භයේ සිටම පීඩනය පාලනය කරමින් ඉලක්කය හඹා ගියේය. තවත් පන්දු 2ක් ඉතිරිව තිබියදී කඩුලු 5ක් පමණක් අහිමි කර ගනිමින් ලකුණු 233ක් ලබා ගත් ගාල්ල පිල අවසන් මහා තරගයට පිවිසීමට සමත් විය.

ගාල්ල ඉනිමේ ජයග්‍රාහී මූලිකත්වය ලබා දුන්නේ නායක දුල්සිත් දර්ශන ය. ඔහු පන්දු 60කදී හතරේ පහර 4ක් සහ හයේ පහර 5ක් සමඟින් ලකුණු 66ක් රැස් කරමින් නායකත්ව ඉනිමක් ක්‍රීඩා කළේය. ඔහුට ශක්තිමත් සහායක් ලබාදුන් සඳරු මල්ශාන්, ඉනිම ජයග්‍රහණයෙන් අවසන් වන විට පන්දු 61කදී හතරේ පහර 3ක් සහ හයේ පහරක් සමඟින් නොදැවී ලකුණු 52ක් රැස් කරමින් ගාල්ල ජය තහවුරු කළේය.

ඊට අමතරව ගිම්හාන් රසාංජන පන්දු 64කදී ලකුණු 37ක් ලබා ගත් අතර, අරෝෂ සිතුමිණ පන්දු 38කදී හතරේ පහර 5ක් සහ හයේ පහරක් සමඟින් ලකුණු 36ක් රැස් කරමින් ජයග්‍රහණය සඳහා වැදගත් දායකත්වයක් දැක්වීය.

මෙම ජයත් සමඟ ගාල්ල කණ්ඩායම අවසන් මහා තරගයට සුදුසුකම් ලබා ගත් අතර, ඔවුන් මහනුවර කණ්ඩායම සමඟ ශූරතාව සඳහා තීරණාත්මක අවසන් සටනකට මුහුණ දීමට නියමිතය. එම අවසන් මහා තරගය හෙට (21) කොළඹ පී. සරා ඕවල් ක්‍රීඩාංගණයේදී පැවැත්වීමට නියමිතය.

කොළඹ උතුර කණ්ඩායම පන්දුවාර 49.1 කදී සියලුදෙනා දැවී ලකුණු 232 යි – (සෙනුජ වැකුණුගොඩ 71, කිත්ම විදානපතිරණ 33, දුල්නිත් සිගේරා 32, ශ්‍රීරාම් ජීවහන් 22*, ලතීන්ද්‍ර ආකාශ් 39/3, තරුන් දම්සිත් 31/2, ගිම්හාන් රසාංජන 39/2)

ගාල්ල කණ්ඩායම පන්දුවාර 44.1 කදී කඩුලු 5ක් දැවී ලකුණු 233 යි – (දුල්සිත් දර්ශන 66, සඳරු මල්ශාන් නොදැවී 52, ගිම්හාන් රසාංජන 37, අරෝෂ සිතුමිණ 36, කිත්ම විදානපතිරණ 26/2, තරුෂ නවෝද්‍ය 22/2)