ගාල්ල ජාත්‍යන්තර ක්‍රිකට් ක්‍රීඩාංගණයේ පැවැත්වෙන ඉන්දීය ‘ඒ’ කණ්ඩායමට එරෙහි පළමු නිල නොවන ටෙස්ට් තරගයේ දෙවැනි දිනය නිමාවන විට ශ්‍රී ලංකා ‘ඒ’ කණ්ඩායම කඩුලු 2ක් දැවී ලකුණු 113ක් රැස් කරමින් පළමු ඉනිම ගොඩනඟමින් සිටියේය. කෙසේ වෙතත්, ඉන්දීය ‘ඒ’ පළමු ඉනිමට වඩා ශ්‍රී ලංකාව තවමත් ලකුණු 339ක් පසුපසින් පසුවෙයි.

ඊට පෙර සිය පළමු ඉනිම කඩුලු 6ක් දැවී ලකුණු 452ක් ලබා සිටියදී ඉන්දීය ‘ඒ’ කණ්ඩායම ඉනිම අත්හිටුවීමට තීරණය කළේය. ඉන්දීය ඉනිම අත්හිටුවන විටත් කඩුල්ලේ රැඳී සිටි නායක ධෘව් ජුරේල් ලකුණු 141ක්  ලබා සිටියේය.

පළමු දිනය නිමාවන විට ලකුණු 68ක් නොදැවී සිටි ජුරේල්, ෂෙයික් රෂීඩ් සමඟ ගොඩනැඟූ සාර්ථක සබඳතාව තවදුරටත් ඉදිරියට ගෙන ගියේය. කෙසේ වෙතත් ලකුණු 63ක් ලබා සිටියදී රෂීඩ් චාමික ගුණසේකරගේ පන්දුවක් හමුවේ දැවී ගියේය. ඉන් අනතුරුව හර්ෂ් ඩුබේ සමඟ හයවැනි කඩුල්ල වෙනුවෙන් ලකුණු 86ක සබඳතාවක් ගොඩනැඟූ ජුරේල් හතරේ පහර 13ක් සහ හයේ පහරක් සමඟින් සිය ශතකය සම්පූර්ණ කළේය. ඩුබේ පන්දු 51කින් ලකුණු 30ක් රැස් කළ අතර ඔහුද ගුණසේකරගේ තෙවැනි කඩුල්ල බවට පත්විය.

ශ්‍රී ලංකා ‘ඒ’ පන්දු යවන්නන් අතර කැපී පෙනුණු චාමික ගුණසේකර ලකුණු 71කට කඩුලු 3ක් දවා ගනිමින් සාර්ථකම පන්දු යවන්නා බවට පත්විය.

ලකුණු 453ක දැවැන්ත ඉලක්කයකට පිළිතුරු ලෙස පිටියට පිවිසි ශ්‍රී ලංකා ‘ඒ’ කණ්ඩායමට ආරම්භයේදීම පීඩනයකට මුහුණ දීමට සිදුවිය. ලකුණු 38ක් වන විට ආරම්භක පිතිකරුවන් දෙදෙනාම ක්‍රීඩාගාරයට හරවා යැවීමට ඉන්දීය වේගපන්දු යවන්නෝ සමත් වූහ. නිරෝෂන් දික්වැල්ල ලකුණු 14කට අන්ෂුල් කම්බෝජ් හමුවේ දැවී ගිය අතර, පවන්ත වීරසිංහ ලකුණු 17ක් ලබා සිටියදී යෂ් තාකූර්ගේ පන්දුවකට කඩුල්ල අහිමි කරගත්තේය.

කෙසේ වෙතත්, එතැන් සිට ඉනිමේ වගකීම කරට ගත් නුවනිඳු ප්‍රනාන්දු සහ අශේන් බණ්ඩාර තෙවැනි කඩුල්ල වෙනුවෙන් නොබිඳුණු ලකුණු 75ක සබඳතාවක් ගොඩනඟමින් ශ්‍රී ලංකා ‘ඒ’ කණ්ඩායම නැවත තරගයට රැගෙන ආහ. ඉන්දීය වේගපන්දු යවන්නන්ගේ මුල් පීඩනය සාර්ථකව දරාගත් නුවනිඳු, නරක පන්දු කිසිවක් අතපසු නොකර ආකර්ෂණීය හතරේ පහර 7ක් එල්ල කරමින් පන්දු 103කදී නොදැවී ලකුණු 65ක් රැස් කළේය. අනෙක් අන්තයේ අශේන් බණ්ඩාර ඉවසීමෙන් යුතුව පන්දු 51කට මුහුණ දෙමින් නොදැවී ලකුණු 18ක් ලබා සිටියේය.

තරගයේ තවත් දින දෙකක් ඉතිරිව තිබෙන අතර ශ්‍රී ලංකා ‘ඒ’ කණ්ඩායම පළමු ඉනිමේ පසුබෑම අවම කරගැනීමේ අභියෝගය සමඟ තෙවැනි දිනය ආරම්භ කිරීමට නියමිතය.

ඉන්දීය ‘ඒ‘ කණ්ඩායම පළමු ඉනිම පන්දුවාර 111.4 කදී කඩුලු 6 ක් දැවී ලකුණු 452 යි – (සායි සුදර්ශන් 132, ආයුෂ් පාණ්ඩේ 25, දෙව්දත් පඩික්කාල් 12, රුටුරාජ් ගයික්වාඩ් 22, ධෘව් ජුරෙල් 141*, ශයික් රශීඩ් 63, හර්ෂ් ඩුබේ 30, සර්නාෂි ජේන් 03*, චාමික ගුණසේකර 84/3, දිලුම් සුදීර 143/2, රවිඳු ප්‍රනාන්දු 87/1)

ශ්‍රී ලංකා ‘ඒ‘ පළමු ඉනිම පන්දුවාර 31 කදී කඩුලු 2 ක් දැවී ලකුණු 113 යි – (නුවනිඳු ප්‍රනාන්දු 65*, අෂේන් බණ්ඩාර 18*, නිරෝෂන් දික්වැල්ල 10, පවන්ත වීරසිංහ 11, අංශුල් කාම්බෝජ් 22/1, යෂ් ඨාකූර් 20/1)