ශ්‍රී ලංකා ක්‍රිකට් ආයතනය සංවිධානය කරන වයස අවුරුදු 19න් පහළ ශ්‍රී ලංකා යූත් ලීග් එක්දින ක්‍රිකට් තරගාවලියේ අවසන් මහ තරගයට සුදුසුකම් ලබා ගැනීමට ගාල්ල සහ මහනුවර කණ්ඩායම් අද (20) සමත් වූහ. ඒ අනුව පළමු වතාවට කොළඹින් පිට කණ්ඩායම් දෙකක් අවසන් මහ තරගයකට සුදුසුකම් ලද පළමු අවස්ථාව වශයෙන් මෙම තරගාවලිය ඉතිහාස ගත වනු ඇත.
මහනුවර කණ්ඩායම අවසන් මහ තරගයට පිවිසියේ කොළඹ දකුණු කණ්ඩායමට එරෙහිව ලකුණු 58ක ජයක් වාර්තා කරමිනි. මෙම තරගය කොළඹ රාජකීය විද්‍යාලයීය ක්‍රිකට් ක්‍රීඩාංගණයේදී පැවැති අතර කාසියේ වාසිය දිනාගත් මහනුවර පිල පළමුව පන්දුවට පහරදීමට තීරණය කළේය.
පළමුවෙන් පිටියට පිවිසි මහනුවර ක්‍රීඩකයෝ, කොළඹ දකුණ පන්දු යවන්නන්ගේ දැඩි පීඩනය හමුවේ පන්දු වාර 36.1කදී සියලුදෙනා දැවී ලකුණු 150ක් රැස් කළහ. එම ඉනිමේ වැඩිම ලකුණුලාභියා වූ මහේන්ද්‍ර අබේසිංහ පන්දු 30කින් හතරේ පහර 2ක් සහ හයේ පහර 2ක් සමඟින් ලකුණු 31ක් ලබා ගත්තේය. ඔහුට අමතරව සිසිල් හේමක සහ චනිරු සේනාරත්න ලකුණු 23 බැගින් රැස් කරමින් ඉනිම ශක්තිමත් කළහ.
මහනුවර ඉනිම සීමා කිරීමේදී කොළඹ දකුණ වෙනුවෙන් හිමරු දේශාන් ලකුණු 19කට කඩුලු 3ක් බිඳ හෙළමින් කැපී පෙනුණ අතර, නායක රමිරු පෙරේරා සහ අදීශ ලක්ශාන් කඩුලු 2 බැගින් දවා ගනිමින් සහාය දැක්වූහ.
ලකුණු 151ක ඉලක්කයක් හඹා ගිය කොළඹ දකුණ කණ්ඩායමට මහනුවර පන්දු යවන්නන් හමුවේ ස්ථාවර පිළිතුරක් ගොඩනගා ගැනීමට නොහැකි විය. ඔවුන්ගේ ඉනිම පන්දු වාර 22.3කදී ලකුණු 92කට සීමාවිය.
මහනුවර පිලේ ජයග්‍රහණයට තීරණාත්මක දායකත්වයක් ලබාදුන් පන්දු යවන්නන් අතර කනිල්ක ඇන්තනී ඉදිරියෙන් පසුවන අතර ඔහු ලකුණු 18 ට කඩුලු 4 ක් දවා ගත්තේය. එමෙන්ම රයන් ග්‍රෙගරි, සුමේධ ප්‍රසාද් සහ සෙත්මික සෙනෙවිරත්න කඩුලු 2 බැගින් දවා ගනිමින් කොළඹ දකුණ පිති පෙළ බිඳ දැමූහ.
මහනුවර වයස අවුරුදු 19න් පහළ කණ්ඩායම පන්දුවාර 36.1 කදී සියලුදෙනා දැවී ලකුණු 150 යි – මහේන්ද්‍ර අබේසිංහ 31, සිසිල් හේමක 23, චනිරු සේනාරත්න 23, හිමරු දේශාන් 19/3, අදීශ ලක්ශාන් 33/2, රමිරු පෙරේරා 12/2)
කොළඹ දකුණ වයස අවුරුදු 19න් පහළ කණ්ඩායම පන්දුවාර 22.3 කදී සියලුදෙනා දැවී ලකුණු 92 යි – හිරුන් මතීෂ 22, කනිල්ක ඇන්තනී 18/4, රයන් ග්‍රෙගරි 10/2, සුමේධ ප්‍රසාද් 14/2, සෙත්මික සෙනෙවිරත්න 40/2)