2026 ජපානයේ අයිචි-නාගෝයා නගරවල පැවැත්වෙන ආසියානු ක්‍රීඩා උළෙලේ ක්‍රිකට් තරගාවලිය සඳහා ශ්‍රී ලංකා පිරිමි කණ්ඩායම සෘජුවම අවසන් අට දෙනාගේ (Quarter-finals) වටයට සුදුසුකම් ලබා තිබේ.

තරගාවලියේ ඉහළම ශ්‍රේණිගත කණ්ඩායම් හතර ලෙස ඉන්දියාව, පාකිස්තානය, බංග්ලාදේශය සහ ශ්‍රී ලංකාව සෘජුවම මෙම වටයට පිවිසි අතර, තවත් කණ්ඩායම් හතරක් සුදුසුකම් ලැබීමේ තරග වටයෙන් ඉදිරියට පැමිණ ඔවුන් සමඟ එක්වීමට නියමිතය.

සුදුසුකම් ලැබීමේ වටයේ ‘A’ කාණ්ඩයට ඇෆ්ගනිස්තානය, සත්කාරක ජපානය සහ නේපාලය ඇතුළත් වන අතර, ‘B’ කාණ්ඩයේ මැලේසියාව, ඕමානය සහ හොංකොං (චීනය) තරග වදිනු ඇත. සෑම කණ්ඩායමක්ම තම කාණ්ඩයේ අනෙක් කණ්ඩායම් දෙක සමඟ එක් වරක් බැගින් තරග වැදෙන අතර, එක් එක් කාණ්ඩයේ ඉහළම කණ්ඩායම් දෙක අවසන් අට දෙනාගේ වටයට සුදුසුකම් ලබා ගනු ඇත.

මේ අතර, කාන්තා ක්‍රිකට් තරගාවලිය සෘජුවම අවසන් අට දෙනාගේ වටයෙන් ආරම්භ වන අතර, ශ්‍රී ලංකා කාන්තා කණ්ඩායම මැලේසියාව සමඟ තරග වැදීමට නියමිතය. එමෙන්ම ඉන්දියාව ජපානයට එරෙහිවත්, පාකිස්තානය තායිලන්තයට එරෙහිවත්, බංග්ලාදේශය චීනයට එරෙහිවත් සිය මූලික තරග ක්‍රීඩා කරනු ඇත.

2023 වසරේ චීනයේ හැන්ග්ෂෝ නගරයේ පැවති ආසියානු ක්‍රීඩා උළෙලේදී පිරිමි සහ කාන්තා ක්‍රිකට් ඉසව් දෙකෙහිම රන් පදක්කම් දිනාගත්තේ ඉන්දීය කණ්ඩායම්ය.

2026 ආසියානු ක්‍රීඩා උළෙලේ කාන්තා ක්‍රිකට් තරගාවලිය සැප්තැම්බර් 17 සිට 22 දක්වාත්, පිරිමි ක්‍රිකට් තරගාවලිය සැප්තැම්බර් 24 සිට ඔක්තෝබර් 1 දක්වාත් ජපානයේ අයිචි-නාගෝයාහිදී පැවැත්වීමට නියමිතය.