ශ්‍රී ලංකා ක්‍රිකට් ආයතනය සංවිධානය කරන ප්‍රධාන පෙළේ සමාජ සීමිත පන්දුවාර එක්දින ක්‍රිකට් තරගාවලියේ පළමු වටයේ අවසන් තරග අද (03 දා) නිමාවට පත්වූ අතර, එහිදී ලසිත් කෲස්පුල්ලේ, කමිඳු මෙන්ඩිස්, සිනෙත් ජයවර්ධන, ජනිත් ලියනගේ සහ අවිශ්ක ප්‍රනාන්දු ශතක වාර්තා කිරීමට සමත් වූහ. පන්දු යැවීමෙන් දිනයේ කැපී පෙනෙන දස්කම දැක්වූයේ ඒස් කැපිටල් ක්‍රිකට් සමාජයේ වනුජ සහන්ය. ඔහු නුගේගොඩ ක්‍රීඩා සමාජයට එරෙහිව ලකුණු 34කට කඩුලු 6ක් දවා ගත්තේය.

කොළඹ පී. සරා ඕවල් ක්‍රීඩාංගණයේ පැවැති ටැමිල් යුනියන් ක්‍රීඩා සමාජය සහ සී.සී.සී. අතර තරගයේදී සී.සී.සී. පිල වෙනුවෙන් ලසිත් කෲස්පුල්ලේ සහ කමිඳු මෙන්ඩිස් පළමු කඩුල්ලට ලකුණු 268ක දැවැන්ත සබඳතාවක් ගොඩනැගූහ. පන්දු 243කදී ගොඩනැගුණු එම සබඳතාව තරගයේ විශේෂත්වයක් වූ අතර, කෲස්පුල්ලේ පන්දු 125කදී හතරේ පහර 11ක් සහ හයේ පහර 8ක් සමඟ ලකුණු 148ක් රැස් කළේය. කමිඳු මෙන්ඩිස් පන්දු 129කදී හතරේ පහර 11ක් සහ හයේ පහර 6ක් සමඟ ලකුණු 139ක් ලබා ගත්තේය.

සී.සී.සී. පිල කඩුලු 5කට ලකුණු 369ක් රැස් කළ අතර, ඊට පිළිතුරු ලෙස ටැමිල් යුනියන් කණ්ඩායම ලකුණු 297කට දැවී ගියේය. එහිදී සිනෙත් ජයවර්ධන පන්දු 103කදී හතරේ පහර 17ක් සහ හයේ පහර 4ක් සමඟ ලකුණු 136ක් රැස් කළේය. එය ඔහුගේ පළමු පෙළ එක්දින තරග දිවියේ ඉහළම ලකුණු සංඛ්‍යාව විය. ඒ අනුව සී.සී.සී. පිල ලකුණු 72ක ජයක් වාර්තා කළේය.

කොළඹ බ්ලූම්ෆීල්ඩ් ක්‍රිකට් ක්‍රීඩාංගණයේ පැවැති බ්ලූම්ෆීල්ඩ් ක්‍රිකට් හා මලල ක්‍රීඩා සමාජය සහ එස්.එස්.සී. කණ්ඩායම් අතර තරගයේදීද පිතිකරුවන්ගෙන් විශිෂ්ට දස්කම් දැකගත හැකි විය. බ්ලූම්ෆීල්ඩ් කණ්ඩායම වෙනුවෙන් ජනිත් ලියනගේ පන්දු 130කදී හතරේ පහර 18ක් සහ හයේ පහර 5ක් සමඟ ලකුණු 165ක් රැස් කළ අතර, එය ඔහුගේ පළමු පෙළ එක්දින තරග දිවියේ ඉහළම ඉනිම විය.

බ්ලූම්ෆීල්ඩ් කණ්ඩායම ලකුණු 329ක් රැස් කළ අතර, එස්.එස්.සී. කණ්ඩායම පන්දුවාර 46.5කදී කඩුලු 5ක් පමණක් දැවී ලකුණු 334ක් රැස් කරමින් තරගය ජය ගත්තේය. එස්.එස්.සී. පිළිතුරු ඉනිමේදී අවිශ්ක ප්‍රනාන්දු පන්දු 114කදී හතරේ පහර 15ක් සහ හයේ පහර 4ක් සමඟ ලකුණු 138ක් රැස් කළේය. නුවනිඳු ප්‍රනාන්දු ලකුණු 57ක්ද, නිපුන් ධනංජය ලකුණු 69ක්ද ලබා ගත්හ.

පානදුර මහජන ක්‍රීඩාංගණයේදී පැවැති පානදුර ක්‍රීඩා සමාජය සහ කුරුණෑගල යොවුන් ක්‍රිකට් සමාජය අතර තරගයෙන් පානදුර කණ්ඩායම ලකුණු 71ක ජයක් අත්කර ගත්තේය. පානදුර කණ්ඩායම වෙනුවෙන් ඔෂද ප්‍රනාන්දු ලකුණු 78ක් රැස් කළ අතර, කුරුණෑගල කණ්ඩායම ලකුණු 164කට දැවී ගියේය.

මොරටුව ද සොයිසා ක්‍රීඩාංගණයේදී පැවැති ඒස් කැපිටල් ක්‍රිකට් සමාජය සහ නුගේගොඩ ක්‍රීඩා හා සුභසාධක සමාජය අතර තරගයේදී වනුජ සහන් පන්දු යැවීමෙන් කැපී පෙනුණි. ඔහු පන්දුවාර 47.3කදී ලකුණු 167කට දැවී ගිය නුගේගොඩ ඉනිමේ කඩුලු 6ක් ලකුණු 34කට දවා ගත්තේය. පසුව ඒස් කැපිටල් කණ්ඩායම කඩුලු 5ක් දැවී ලකුණු 170ක් රැස් කරමින් තරගය ජය ගත්තේය. රනේෂ් සිල්වා නොදැවී ලකුණු 60ක් රැස් කළේය.

කොළඹ කොල්ට්ස් ක්‍රීඩාංගණයේ පැවැති කොල්ට්ස් ක්‍රිකට් සමාජය සහ පොලිස් ක්‍රීඩා සමාජය අතර තරගයෙන් කොල්ට්ස් කණ්ඩායමට කඩුලු 8ක පහසු ජයක් හිමි විය. කොල්ට්ස් කණ්ඩායම ලකුණු 266ක් රැස් කළ අතර, සංගීත් කුරේ ලකුණු 85ක් සහ මුදිත ලක්ෂාන් ලකුණු 69ක් රැස් කළහ. පිළිතුරු ඉනිමේදී පොලිස් කණ්ඩායම ලකුණු 194කට දැවී ගියේය. නිපුන් ප්‍රේමරත්න ලකුණු 68ක් රැස් කළේය.

කොළඹ මූර්ස් ක්‍රීඩාංගණයේදී පැවැති බදුරලිය ක්‍රීඩා සමාජය සහ බී.ආර්.සී. කණ්ඩායම් අතර තරගයෙන් බී.ආර්.සී. කණ්ඩායමට කඩුලු 7ක ජයක් හිමි විය. බදුරලිය කණ්ඩායම ලකුණු 104කට දැවී ගිය අතර, බී.ආර්.සී. කණ්ඩායම පන්දුවාර 14.5කදී කඩුලු 3ක් දැවී ලකුණු 107ක් රැස් කරමින් ජය තහවුරු කළේය.

මේ අතර, තරගාවලියේ පළමු වටය අවසන් වීමත් සමඟ අවසන් පූර්ව වටයට සුදුසුකම් ලැබූ කණ්ඩායම්ද තීරණය විය. ඒ අනුව ‘ඒ’ කාණ්ඩයෙන් කොළඹ ක්‍රිකට් සමාජය සහ මූර්ස් ක්‍රීඩා සමාජයත්, ‘බී’ කාණ්ඩයෙන් කොල්ට්ස් ක්‍රිකට් සමාජය සහ එස්.එස්.සී. කණ්ඩායමත් අවසන් පූර්ව වටයට සුදුසුකම් ලබා ගත්හ.

ඒ අනුව පළමු අවසන් පූර්ව තරගයේදී කොළඹ ක්‍රිකට් සමාජය සහ එස්.එස්.සී. කණ්ඩායම් සැප්තැම්බර් 07 වැනිදා කොළඹ එන්.සී.සී. ක්‍රීඩාංගණයේදී තරග වදින අතර, දෙවැනි අවසන් පූර්ව තරගයේදී මූර්ස් ක්‍රීඩා සමාජය සහ කොල්ට්ස් ක්‍රිකට් සමාජය එදිනම කොළඹ පී. සරා ඕවල් ක්‍රීඩාංගණයේදී තරග වදිති.

ලකුණු සාරාංශය

කොළඹ ක්‍රිකට් සමාජයට ලකුණු 72ක ජයක්.

සී.සී.සී. – කඩුලු 5කට 369 (පන්දුවාර 50): ලසිත් කෲස්පුල්ලේ 148, කමිඳු මෙන්ඩිස් 139, පවන් රත්නායක නොදැවී 62; තරිඳු රත්නායක 57/2, විජයකාන්ත් වියස්කාන්ත් 71/2.

ටැමිල් යුනියන් ක්‍රිකට් හා මලල ක්‍රීඩා සමාජය – සියලු දෙනා දැවී 297 (පන්දුවාර 44.1): සිනෙත් ජයවර්ධන 136, නවෝද් පරණවිතාන 43, විහස් තෙව්මික 28; අශේන් ඩැනියෙල් 4/56, ධනංජය ද සිල්වා 3/37.

පානදුර ක්‍රීඩා සමාජයට ලකුණු 71ක ජයක්.

පානදුර ක්‍රීඩා සමාජය – කඩුලු 9කට 235 (පන්දුවාර 43): ඔෂද ප්‍රනාන්දු 78, නේක්ෂ ඉද්දමල්ගොඩ නොදැවී 46, ශාලිත් ප්‍රනාන්දු 33; ශෙෂාන් මාරසිංහ 52/3, මෙතුශාන් තිළිණ 47/2.

කුරුණෑගල යොවුන් ක්‍රිකට් සමාජය – සියලු දෙනා දැවී 164 (පන්දුවාර 31.3): ගයන වීරසිංහ 31, දිනුක තෙන්නකෝන් 31; ඩිල්ශාන් මදුවන්ත 20/3, තවීෂ අභිශේක් 20/3.

ඒස් කැපිටල් ක්‍රිකට් සමාජයට කඩුලු 5ක ජයක්.

නුගේගොඩ ක්‍රීඩා සමාජය – සියලු දෙනා දැවී 167 (පන්දුවාර 47.3): නිමේෂ් විමුක්ති නොදැවී 52, සචිඳු කොළඹගේ 35; වනුජ සහන් 34/6, චාමික හීනටිගල 19/2.

ඒස් කැපිටල් ක්‍රිකට් සමාජය – කඩුලු 5කට 170 (පන්දුවාර 36.2): රනේෂ් සිල්වා නොදැවී 60, චාමික හීනටිගල 33, තිසර ඒකනායක 36.

කොල්ට්ස් ක්‍රිකට් සමාජයට කඩුලු 8ක ජයක්.

කොල්ට්ස් ක්‍රිකට් සමාජය – කඩුලු 6කට 266 (පන්දුවාර 50): සංගීත් කුරේ 85, මුදිත ලක්ෂාන් 69, කවිජ ගමගේ නොදැවී 39; නිපුන් ප්‍රේමරත්න 61/2.

පොලිස් ක්‍රීඩා සමාජය – සියලු දෙනා දැවී 194 (පන්දුවාර 39.4): නිපුන් ප්‍රේමරත්න 68, ධනුජ ඉඳුරුව 44; මුදිත ලක්ෂාන් 30/2, ශ්‍යාම්සුන්දර් ක්‍රිශ්ණශ්‍රීරාම් 41/2, කවිජ ගමගේ 20/2, අකිල ධනංජය 48/2.

එස්.එස්.සී. කණ්ඩායමට කඩුලු 5ක ජයක්.

බ්ලූම්ෆීල්ඩ් ක්‍රිකට් සමාජය – සියලු දෙනා දැවී 329 (පන්දුවාර 50): ජනිත් ලියනගේ 165, අසිත වන්නිනායක 60, ශානික්‍ය දේශප්‍රිය 30; කසුන් රාජිත 49/4, මිහිරංග සිල්වා 49/2, දිනුර කළුපහන 61/2.

එස්.එස්.සී. – කඩුලු 5කට 334 (පන්දුවාර 46.5): අවිශ්ක ප්‍රනාන්දු 138, නිපුන් ධනංජය 69, නුවනිඳු ප්‍රනාන්දු 57, දුනිත් වෙල්ලාලගේ නොදැවී 30; රවිඳු ප්‍රනාන්දු 58/2, තරින්ද නිර්මාල් 71/2.

බී.ආර්.සී. කණ්ඩායමට කඩුලු 7ක ජයක්.

බදුරලිය ක්‍රීඩා සමාජය – සියලු දෙනා දැවී 104 (පන්දුවාර 24.5): හරීන් අචින්ත 31, ඩිල්ශාන් ද සොයිසා 25; විග්නේශ්වරන් ආකාශ් 15/4, දුලාජ් අශේන් 33/2.

බී.ආර්.සී. – කඩුලු 3කට 107 (පන්දුවාර 14.5): පවන් සංදේශ් 41, ගජිත කොටුවේගොඩ නොදැවී 29, ඉසුරු ප්‍රනාන්දු 26.