ධනංජය ද සිල්වා සහ කුසල් මෙන්ඩිස් එක්ව ගොඩනැඟූ අඛණ්ඩ ලකුණු 249ක වාර්තාගත සම්බන්ධතාව හමුවේ රාවල්පිණ්ඩි ටෙස්ට් තරගයේ තෙවැනි දිනය ශ්‍රී ලංකාවට අතිශය වාසිදායක දිනයක් බවට පත් විය. පාකිස්තානු පළමු ඉනිමේ ලකුණු සංඛ්‍යාවට තවත් ලකුණු 30ක් පමණක් පිටුපසින් සිටින ශ්‍රී ලංකා කණ්ඩායම තෙවැනි දිනය නිමා වන විට කඩුලු 4ක් දැවී ලකුණු 404ක් ලබා සිටියේය.

දිනය පුරාම පන්දුවට පහර දුන් ධනංජය ද සිල්වා නොදැවී ලකුණු 167ක් රැස් කරමින් සිය ටෙස්ට් ක්‍රිකට් දිවියේ ඉහළම ලකුණු සංඛ්‍යාවට තවත් ලකුණු හයක දුරින් සිටියේය. මෙය ධනංජයගේ 14 වැනි ටෙස්ට් ශතකය ලෙසින් සටහන්විය. සිය මංගල ටෙස්ට් තරගයට නායකත්වය ලබාදෙන මෙන්ඩිස්ද නොදැවී ලකුණු 117 ක් ලබා සිටියේය. ටෙස්ට් නායකත්වයේ සිය මංගල ඉනිම ක්‍රීඩා කළ කුසල් පෙරේරා, එහිදී ශතකයක් වාර්තා කරමින් ටෙස්ට් නායකත්වයේ මංගල ඉනිමේදීම ශතකයක් රැස් කළ පළමු ශ්‍රී ලාංකික පිතිකරුවා ලෙස වාර්තා පොතට එක්වූයේ තම 11 වැනි ටෙස්ට් ශතකයද සමගිනි.

මොවුන් දෙදෙනා විසින් වාර්තා කරන ලද මෙම කඩුල්ලේ සම්බන්ධතාව පාකිස්තානු කණ්ඩායමකට එරෙහිව ශ්‍රී ලංකාවේ පස්වැනි කඩුල්ලක් වෙනුවෙන් රැස් කරන ලද ඉහළම ලකුණු සංඛ්‍යාවේ වාර්තාව බවටද පත්විය.  ඒ අනුව සිව්වැනි දිනයට තරගය ආරම්භ කරන ශ්‍රී ලංකාව සතුව තවත් කඩුලු හයක් ඉතිරිව තිබේ.

දෙවැනි දිනය නිමා වන විට කඩුලු 3ක් දැවී ලකුණු 134ක් ලබා අසීරු තත්ත්වයක පසු වූ ශ්‍රී ලංකා කණ්ඩායම වෙනුවෙන් ධනංජය ද සිල්වා සහ කමිඳු මෙන්ඩිස් සිව්වැනි කඩුල්ලට ගොඩනැඟූ සම්බන්ධතාව තෙවැනි දිනයේදීත් ඉදිරියට ගෙන ගියහ. එහෙත් සිය අර්ධ ශතකය සම්පූර්ණ කිරීමෙන් අනතුරුව කමිඳු මෙන්ඩිස් ලකුණු 65කට දැවී යෑමත් සමඟ ශ්‍රී ලංකා ඉනිමේ පස්වැනි කඩුල්ල වෙනුවෙන් ධනංජය සමඟ එක් වූයේ කුසල් පෙරේරාය.

එතැන් සිට තරගයේ පාලනය සම්පූර්ණයෙන්ම ශ්‍රී ලංකාව අතට ගැනීමට මෙම පිතිකරුවෝ දෙදෙනා සමත් වූහ. පළමු සැසියේදී ඉවසිලිවන්ත පිතිහරඹයක නිරත වෙමින් පාකිස්තානු පන්දු යවන්නන් වෙහෙසට පත් කළ ඔවුහු දෙවැනි සැසියේ සිට සිය ප්‍රහාරය තීව්‍ර කළහ. විශේෂයෙන්ම අර්ධ ශතකය සහ ශතකය අතර කාලසීමාවේදී වේගවත් වූ කුසල් මෙන්ඩිස්, පන්දු යවන්නන්ට කිසිදු සහනයක් ලබා නොදුන්නේය.

ධනංජය ද සිල්වා සිය ශතකය වාර්තා කළේ අරෆත් මිංහාස්ට එරෙහිව ඉදිරියට පැමිණ එල්ල කළ හතරේ පහරකිනි. අනතුරුව ක්‍රියාත්මක වූ පන්දුවාර හයේදී ශ්‍රී ලංකා පිතිකරුවෝ ලකුණු 57ක් උදුරා ගැනීමට සමත් වූහ. පාකිස්තානු වේග පන්දු යවන්නන්ගේ පාලනය ගිලිහී යද්දී කුසල් සහ ධනංජය දෙදෙනාම නිදහසේ ලකුණු රැස් කළහ.

නව පන්දුව ලබා ගැනීමෙන් පසුව ද පාකිස්තානු පන්දු යවන්නන්ට මෙම සම්බන්ධතාව බිඳ දැමීමට හැකි වූයේ නැත. පන්දුවට පහර දීමට පහසු වෙමින් තිබූ තණතීරුවේ වාසිය උපරිමයෙන් ප්‍රයෝජනයට ගත් ශ්‍රී ලංකා පිතිකරුවෝ තේ පානයෙන් අනතුරුවත් සිය ප්‍රහාරය අඛණ්ඩව පවත්වාගෙන ගියහ.

කුසල් මෙන්ඩිස් සිය අර්ධ ශතකය සම්පූර්ණ කළේ හයේ පහරකිනි. අනතුරුව රසාඋල්ලාට එරෙහිව කඩුලු රකින්නාට ඉහළින් එල්ල කළ රැම්ප් පහරකින් සිය ශතකය සම්පූර්ණ කළ ඔහු ඊළඟ පන්දුවාරයේදී ද එවැනිම පහරකින් හයේ පහරක් එල්ල කළේය. මේ අතර දෙදෙනාගේ සම්බන්ධතාව ලකුණු 200 සීමාව පසුකරද්දී ධනංජය ද සිල්වා සිය ලකුණු 150 සීමාව ද පසු කළේය.

කෙසේ වෙතත්, මෙම සම්බන්ධතාව බිඳ දැමීමට පාකිස්තානයට අවස්ථාවක් නොලැබුණාම නොවේ. දිනය ආරම්භයේදීම ධනංජය ලකුණු 38ක් ලබා සිටියදී රසාඋල්ලාගේ පන්දුවක් හමුවේ පිත්තේ පිටත දාරයේ වැදී ගිය උඩපන්දුවක් පළමු ස්ලිප් ස්ථානයේ පන්දු රකිමින් සිටි සවුද් ශකීල් අතින් ගිලිහී ගියේය. එම අවස්ථාවෙන් උපරිම ප්‍රයෝජන ගත් ධනංජය ඉන් අනතුරුව පාකිස්තානු පන්දු යවන්නන්ට දැඩි ප්‍රහාරයක් එල්ල කළේය.

අවසන් සැසියේදී ආලෝක තත්ත්වය අයහපත් වීම හේතුවෙන් තරගය නියමිත වේලාවට පෙර නතර කිරීමට සිදු වූ අතර, ඒ වන විට ශ්‍රී ලංකාව තරගයේ සම්පූර්ණ වාසිය තමන් වෙත හරවාගෙන සිටියේය.

පාකිස්තානය පළමු ඉනිම පන්දුවාර 106.3 කදී කඩුලු 9 ක් දැවී ලකුණු 434 යි – අසාන් අවයිස් 30, ටයියාබ් අරීෆ් 57, මොහොමඩ් තහා 51, බාබර් අසාම් 50, සෞද් ශඛීල් 93, සල්මන් අඝා 16, ගාසී ඝෝරී 48, අර්ෆට් මින්හාස් 52, රසාමුල්ලා 10, අසිත ප්‍රනාන්දු 107/3, ඩිල්ෂාන් මදුශංක 108/3, මිලාන් රත්නායක 72/1, සොනාල් දිනූෂ 23/1, ළහිරු කුමාර 104/1)

ශ්‍රී ලංකාව පළමු ඉනිම පන්දුවාර 102 කදී කඩුලු 4 ක් දැවී ලකුණු 404 යි – ළහිරු උදාර 42, පසිඳු සූරියබණ්ඩාර 00, දිනේෂ් චන්දිමාල් 01, කමිඳු මෙන්ඩිස් 58, ධනංජය ද සිල්වා 167*, කුසල් මෙන්ඩිස් 117*, සඛීබ් ඛාන් 105/2, මොහොමඩ් අබ්බාස් 64/2)