සැප්තැම්බර් මස 05 වැනිදා සිට 14 වැනිදා දක්වා ශ්‍රී ලංකාවේදී පැවැත්වීමට නියමිත වයස අවුරුදු 19 න් පහළ ආසියානු කුසලාන යොවුන් ක්‍රිකට් තරගාවලිය සඳහා නම් කරන ලද ශ්‍රී ලංකා වයස අවුරුදු 19 න් පහළ කණ්ඩායමේ නායකත්වය නිපුන් ධනංජයට ලබා දීමට තේරීම් කමිටුව පියවර ගෙන තිබේ.

පුත්තලම් දිස්ත්‍රික්කයේ ප්‍රසිද්ධ පාසලක් වන වෙන්නප්පුව ශාන්ත ජෝශප් වාස් විදුහල නියෝජනය කරනු ලබන නිපුන් ශ්‍රී ලංකා ක්‍රිකට් ආයතනය විසින් ඉකුත්දා පවත්වන ලද වයස අවුරුදු 19 න් පහළ සුපිරි පළාත් තරගාවලියේදී දඹුල්ල පිල මෙහෙයවමින් අනුශූරතාවය දක්වා සිය කණ්ඩායම රැගෙන යෑමට සමත්වූවේය.

වයස අවුරුදු 19 න් පහළ වයස් කාණ්ඩයට දක්ෂ ක්‍රීඩකයින් සොයා ගැනිම වෙනුවෙන් ශ්‍රී ලංකා ක්‍රිකට් ආයතනය විසින් පවත්වන ලද සුපිරි පළාත් තරගාවලියේ වීරයා ලෙසින් සම්මාන ලද කමිල් මිශාර, නිපුන් ධනංජයගේ සහායකයා ලෙසින් නම් කර තිබේ. තරගාවලියේ වීරයා සම්මානයට අමතරව දක්ෂතම පිතිකරු ලෙසින්ද සම්මාන ලද මිශාර කණ්ඩායමේ කඩුලු රකින්නා ලෙසින්ද කටයුතු කරන්නේය.

ක්‍රීඩකයින් 15 දෙනෙකුගෙන් සමන්විත නම් කරන ලද කණ්ඩායමට බහුතරයක් අත්දැකීම් සහිත ක්‍රීඩකයින් ඇතුළත්ව සිටියදී අහන් වික්‍රමසිංහ, යසිරු රුද්‍රගෝ සහ අම්ෂිද සිල්වා පමණක් වයස අවුරුදු 19 න් පහළ ජාතික කරණ්ඩායමේ පළමුවෙන්ම  එක්ව සිටින ක්‍රීඩකයෝ බවට පත්ව සිටිති. ශ්‍රී ලංකා වයස 19 න් පහළ කණ්ඩායමේ ප්‍රධාන පුහුණුකරු ලෙස හෂාන් තිලකරත්න සහ කලමනාකරු ලෙස ෆ්ර්වේස් මහරූෆ් කටයුතු කරනු ඇත.

ශ්‍රී ලංකාවේ සත්කාරකත්වයෙන් අසියානු ක්‍රිකට් සම්මේලනය විසින් 8 වැනි වරටත් පවත්වනු ලබන මෙවර තරගාවලියට රටවල් 8 ක් සහභාගිවෙති. ඒ අතර ඉකුත් වසරේ ශූරතාව දිනූ ඉන්දියාව සහ 2017 වසරේ ශූරතාව දිනූ ඇෆ්ගනිස්තාන කණ්ඩායම්ද වේ.

අවසන් වතාවේ අනුශූරයින් වූ සත්කාරක ශ්‍රී ලංකා කණ්ඩායම බී කාණ්ඩය යටතේ තරග වදින අතර බංග්ලාදේශය, එක්සත් අරාබි එමීර් සහ නේපාලය පළමු වටයේ ප්‍රතිවාදීන් බවට පත්ව සිටියි. ප්‍රබල ඉන්දීය කණ්ඩායම, ඇෆ්ගනිස්තානය,පාකිස්තානය සහ කුවේටය ඒ කාණ්ඩයෙන් තරග වදිනු ඇත.

අවසන් මහ තරගයද ඇතුළුව සමස්ථ තරගාවලියේ තරග 15 ක් ක්‍රියාත්මක මෙම තරගාවලියේ මූලික වටයේ තරග රවුන්ඩ් රොබින් ක්‍රමයට පැවැත්වෙනු ඇත. සී. සී. සී., පී. සරා, කටුනායක මේරියන්ස්, මොරටුව සහ කොළඹ ආර්. ප්‍රේමදාස එම ක්‍රීඩාංගණ වේ. තරගාවලියේ දෙවැනි වටය හෙවත් අවසන් පූර්ව තරග සැප්තැම්බර් 12 වැනිදා කොළඹ පී. සරා සහ මොරටුව ක්‍රීඩාංගණයේදීද අවසන් මහ තරගය ලබන 14 වැනිදා කොළඹ ආර්. ප්‍රේමදාස ක්‍රීඩාංගණයේදීධ පැවැත්වෙනු ඇත.

ඉන්දියාව සහ කුවේට්ත්, ඇෆ්ගනිස්තානය සහ පාකිස්තානය අතර තරගවලින් මෙවර ආසියානු කුසලාන යොවුන් තරගාවලිය ආරම්භ වන අතර සත්කාරක ශ්‍රී ලංකාව 06 වැනිදා නේපාලය සමඟ පළමු තරගයට ක්‍රීඩා කරනු ඇත.

වයස අවුරුදු 19 න් පහළ ආසියානු කුසලාන තරග ඉතිහාසයේ මෙතෙක් පවත්වා ඇති තරගාවලි 7 න් එකම වතාවක හෝ ශූරතාව දිනා ගැනීමට ශ්‍රී ලංකාව අපොහොසත් වී සිටින අතර ලබා ඇති ඉහළම ජයග්‍රහණය වන්නේ අවස්ථා 4 කදී අනුශූරතාවයට පත්වීමය. ඒ අනුව මෙවර තරගාවලියේදී ප්‍රථම වතාවට ශූරතා කුසලාන ශ්‍රී ලංකාවට දිනා දීමේ හොඳම අවස්ථාවක් නිපුන් ධනංජයට උදාවී තිබේ.

ශ්‍රී ලංකා වයස අවුරුදු 19 න් පහළ කණ්ඩායම – නිපුන් ධනංජය (නායක), කමිල් මිශාර (උප නායක සහ කඩුලු රකින්නා), නවෝද් පරණවිතාන, අහන් වික්‍රමසිංහ, අවිශ්ක තරිඳු, රශාන්ත ද සිල්වා, අභිෂේක් කහදූවආරච්චි, රොහාන් සංජය, අශේන් ඩැනියෙල්, සඳුන් මෙන්ඩිස්, කවිඳු නදීශාන්, යසිරු රුද්‍රගු, ඩිල්ෂාන් මධුශංක, චමිඳු විජේසිංහ, අම්ෂී ද සිල්වා.