මස්පිඬු ඉරී යෑමේ ආබාධයකට ගොදුරු වී පිටියෙන් ඉවතට ගියද කණ්ඩායමේ අවශ්‍යතාවය මත ආබාධය පිළිබඳව නොසලකමින් සධීර සමරවික්‍රම නොදැවී රැස් කරන ලද ලකුණු 91 ක ඉනිම ප්‍රධාන කොට නැෂනල් සුපර් ලීග් ක්‍රිකට් තරගාවලිය යටතේ කොළඹ එස්. එස්. සී. ක්‍රීඩාංගණයේදී අද පැවැති තරගයෙන් කලම්බු පිල කඩුලු 6 කින් පරාජයට පත් කිරීමට ජැෆ්නා කණ්ඩායම අද (01 දා) පස්වරුවේ සමත්විය.

ජයග්‍රහණය සඳහා ලකුණු 248 ක ඉලක්කයක් කරා යමින් සිටි යාපනය පිල 46 වැනි පන්දුවාරයේ සිව්වැනි පන්දුවේදී ඉලක්කය සපුරා ගන්නා ලද්දේ කඩුලු 4 ක් පමණක් ප්‍රතිවාදීන් හමුවේ පිරිනමමිනි.

24 වැනි පන්දුවාරය වන විට ලකුණු 44 ක් ලබා සිටි සධීර පිටියෙන් කලවයේ ඇතිවූ මස්පිඬු ඉරීයෑමක් හේතුවෙන් පිටියෙන් ඉවත්ව ගියේය. ඒ වන විටත් ළහිරු තිරිමාන්න සමඟ එක්ව පළමු කඩුල්ල වෙනුවෙන් ලකුණු 91 ක් රැස් කිරීමට සධීර සමත්ව සිටියේය. පන්දු 63 කදී ලකුණු 52 ක් ලබා සිටි තිරිමාන්න අවාසනාවන්ත ලෙස දුවද්දී දැවී යෑඹකට හසුවීම නිසා පළමු කඩුල්ලේ සම්බන්ධතාව නිමාවට පත්විය. එහෙත් දමිත සිල්වාට එක්වූ සධීර දෙවැනි කඩුල්ල වෙනුවෙන් ලකුණු 19 ක් එක් කරමින් ජයග්‍රහණය කරා සිය කණ්ඩායම රැගෙන ගියහ.

සධීරගේ අනපේක්ෂිත ඉවත්ව යෑමෙන් පසු දමිතට එක්වූ රවිඳු ප්‍රනාන්දු ලකුණු 27 ක් ලබා තෙවැනි කඩුල්ල වෙනුවෙන් යළිත් ලකුණු 43 ක් එක් කළේ පන්දු 51 ක් පමණක් වැය කරමිනි. ලකුණු 19 ක් ඇතුළත පිතිකරුවන් තිදෙනෙකුම දැවී යෑම නිසා නැවතත් පිටියට පිවිසි සධීර සංතුෂ් ගුණතිලක සමඟ එක්ව ලකුණු 76 ක නොබිඳුණු සම්බන්ධතාවක් පවත්වමින් ජැෆ්නා පිල ජයටැඹ කරා රැගෙන ගියහ. පන්දු 57 කදී වාර්තා වුණු එම සම්බන්ධතාවට සංතුෂ්ගේ දායකත්වය පන්දු 29 කදී ලකුණු 25 කිනි. ජැෆ්නා පිලට යම් තර්ජනයක් එල්ල කළේ නම් ඒ කඩුලු 2 ක් දවා ගත් තරිඳු රත්නායක පමණි.

කාසියේ වාසියත් සමඟ පළමුව පන්දුවට පහර දුන් කොළඹ පිල නියමිත පන්දුවාර 50 අවසනදී කඩුලු 8 කට ලකුණු 247 ක් රැස් කර ගත්තේය. ලකුණු 53 කට කඩුලු 4 ක් බිඳ වැටී තිබියදී පිටියට එක්වූ සම්මු අශාන් සහ අශේන් බණ්ඩාර පස්වැනි ලකුණු 111 ක සම්බන්ධතාවත් ගොඩ නඟමින් වැටී තිබූ කලම්බු පිල ගොඩ ගත්හ. පන්දු 141 ක් එම සම්බන්ධතාවයට වැය වුවත් එය කලම්බු පිලේ අසීරුතාවය, මකා දැමීමට කදිම පිටිවහලක් විය.

ඉනිමේ වැඩිම ලකුණු ලාභියා වුණු බණ්ඩාර පන්දු 110 කදී ලකුණු 75 ක් රැස් කරන ලද්දේ හතරේ පහර 8 ක් ද සමඟිනි. සම්මු අශාන් පන්දු 61 කදී ලකුණු 43 ක් රැස් කරන ලද්දේ හතරේ පහර 2 ක් පමණක් ඉනිමට ඇතුළත් කර ගනිමිනි. මැද පෙළින් පැමිණි ළහිරු මධුශංක පන්දු 40 කදී වේගවත් ඉනිමක නිරත වෙමින් ලකුණු 42 ක් ලබා ගත්තේය. හයේ පහරක් සහ හතරේ පහර 3 ක් ඇතුළත් වුණු මධුශංකගේ ඉනිම කලම්බු ඉනිමේ ලකුණු ලබා ගැනීම වේගවත් කළේය.

පන්දු යැවීමේදී නිමන්ස මධුශංක ලකුණු 39 කට කඩුලු 4 ක් බිඳ හෙළද්දී ඉෂාන් ජයරත්න, ප්‍රමෝද් මදුශාන් සහ සංතුෂ් ගුණතිලක එක් කඩුල්ල බැගින් බිඳ හෙළූහ.

තරගයේ වීරයා – සධීර සමරවික්‍රම

ලකුණු සාරාංශය

කලම්බු පන්දුවාර 50 කදී කඩුලු 8 ට ලකුණු 247 යි – (අෂේන් බණ්ඩාර 75, සම්මු අශාන් 43, ළහිරු මදුශංක 52, නිමන්ද මදුශංක 49/4)

ජැෆ්නා පන්දුවාර 46.4 කදී කඩුලු 4 ට ලකුණු 248 යි – (සධීර සමරවික්‍රම 91*, ළහිරු තිරිමාන්න 52, දමිත සිල්වා 27, රවිඳු ප්‍රනාන්දු 27, සංතුෂ් ගුණතිලක 25*, තරිඳු රත්නායක 56/2)