Chamila Karawita reporting from Pallekale
තෙවැනි වරටත් පැවැත්වෙන ලංකා ප්‍රිමියර් ලීග් ක්‍රිකට් තරගාවලියේ ප්‍රසාද ලකුණු සටහනේ ස්ථීරවම පෙරමුණ ගනු ලබන කණ්ඩායම කවුරුන්ද යන්න තෝරනු ලබන කැන්ඩි ෆැල්කන්ස් සහ ජැෆ්නා කිංග්ස් අතර තරගයේ තීරණාත්මක සාධකයක් බවට පත්ව තිබෙන කාසියේ වාසිය දිනා ගැනීමට ෆැල්කන්ස් නායක වනිඳු හසරංග සමත්විය. පල්ලකැලේ ජාත්‍යන්තර ක්‍රීඩාංගණයේ පැවැත්වෙන මෙම තරගයේදී ෆැල්කන්ස් නායකයා පළමුව ලකුණු රැස් කිරීම තෝරා ගත්තේය.
අද තරගයට පෙර දෙපිළම ජයග්‍රහණ 4 බැගින් වාර්තා කරමින් ප්‍රසාද ලකුණු 8 ක් ලබා පළමු සහ දෙවැනි ස්ථානවල පසුවෙති. දළ ලකුනු ලබා ගැනීමේ වේගය අනුව ෆැල්කන්ස් පිල ඉදිරියෙන් සිටියි.
දෙපිළම මීට පෙර එක් වතාවකදීී මුන ගැසී තිබෙන අතර එහිදී ජැෆ්නා පිල පරාජය කිරීමට කැන්ඩි පීල සමත්විය. එම තරගයේදී චාමික කරුනාරත්න විසින් ක්‍රීඩා කරන ලද සුවිශේෂී පිතිහරඹය කැපී පෙනිණ. ෆැල්කන් පිල අද තරගයට පිවිසෙන්නේ ඊ‌යේ දඹුල්ලට එරෙහි තරගය ජය ගනිමින් වන අතර ජැෆ්නා පිල කලම්බු ස්ටාර්ස් පිල පරදවමින් අද තරගයට අවතීර්ණව සිටිති.
අද තරගයේදී ෆැල්කන්ස් පිල එකම වෙනස්කමක් හෝ නොකරමින් අවතීර්ණව සිටිද්දී ජැෆ්නා පිල වෙනස්කම් 3 ක් සමගින් අවතීර්ණව සිටිති. ජැෆ්නා කණ්ඩායම ධනංජය ද සිල්වා, වකාර් සලම්කේ සහ ඩිල්ෂාන් මදුශංකව ක්‍රීඩා කරවන අතර අශාන් රන්දික, අසිත ප්‍රනාන්දු සහ මශීෂ් තීක්ෂණ අද දිනයේ විවේක ගන්වා තිබේ.
කැන්ඩි ෆැල්කන්ස් – පැතුම් නිස්සංක, ඇන්ඩ්‍රෙ ෆ්ලෙචර්, කමිඳු මෙන්ඩිස්, අශේන් බණ්ඩාර, නජිබුල්ලා සද්‍රාන්, වනිඳු හසරංග (නායක), කාලෝස් බ්‍රැත්වයිට්, චාමික කරුණාරත්න, ෆේබියන් ඇලන්, චමිඳු විජේසිංහ, ඉසුරු උදාන.
ජැෆ්නා කිංග්ස් – රාමනුල්ලා ගුර්බාස්, අවිශ්ක ප්‍රනාන්දු, ධනංජය ද සිල්වා, සදීර සමරවික්‍රම, ෂොයෙබ් මලික්, තිසර පෙරේරා (නායක), ජේම්ස් ෆුලර්, දුනිත් වෙල්ලාලගේ, වකාර් සලමන්කෙයිල්, විජයකාන්ත් වියස්කාන්ත්, ඩිල්ෂාන් මදුශංක.
