එංගලන්ත ලයන්ස් පිලට එරෙහිව පැවැති දෙවැනි නිල නොවන එක්දින තරගයට සහභාගිවීමෙන් අනතුරුව ශ්‍රී ලංකා ‘ඒ’ කණ්ඩායමෙන් නිදහස් කෙරුණු හිටපු නායක තුන් ඉරියව් ක්‍රීඩක ඇන්ජලෝ මැතිව්ස්ගේ ස්ථානය සඳහා කිසිදු ක්‍රීඩකයකු ආදේශ නොකිරීමට තේරීම් කමිටුව වග බලා ගෙන තිබේ.

ඒ අනුව දෙවැනි තරගය සඳහා නම් කරන ලද 15 දෙනෙකුගෙන් යුත් කණ්ඩායමෙන් මැතිව්ස් ඉවත්වීම මත හෙට (21 වැනිදා) පැවැත්වෙන තීරණාත්මක එක්දින තරගය සදහා ඉතිරි 14 දෙනාගෙන් යුතු කණ්ඩායම ඉදිරිපත් කිරීමට තේරීම් වලදී තීරණය ගෙන තිබේ.

මෙතෙක් පැවැති තරග 2 න් දෙපිළම ජයග්‍රහණ 1 බැගින් වාර්තා කරගෙන සිටින හෙයින් හෙට තරගයේ ජය ගනු ලබන කණ්ඩායම තරගාවලියේ ශූරයින් බවට පත්වෙනු ඇත.

මෙම තරගාවලියට පෙර ගාල්ලේ පැවැති තරග 2 කින් සමන්විත සිව්දින තරගාවලියද ශ්‍රී ලංකා ‘ඒ’ කණ්ඩායමට වැඩි ගෞරව හිමි වෙමින් ජය පැරදුමෙන් තොරව නිමාවට පත්විය.

ශ්‍රී ලංකා ‘ඒ’ කණ්ඩායම – සදීර සමරවික්‍රම (නායක), ලසිත් කෲස්පුල්ලේ, නුවනිඳු ප්‍රනාන්දු, ළහිරු උදාර, නිපුන් ධනංජය, සහන් ආරච්චිගේ, දුනිත් වෙල්ලාලගේ, සුමින්ද ලක්ෂාන්, කවිශ්ක අංජුල, ඉසිත විජේසුන්දර, දුශාන් හේමන්ත, අම්ෂි ද සිල්වා, අවිශ්ක ප්‍රනාන්දු, ප්‍රමෝද් මදුශාන්.