නවසීලන්තයට එරෙහිව වෙලිංටන්හි අද (17 දා) ආරම්භ වුණු දෙවැනි ටෙස්ට් තරගයේ ශ්‍රී ලංකාව වෙනුවෙන් ටෙස්ට් වරම් දිනා ගැනීමට නිශාන් මදුශ්ක සමත්විය. පළමු ටෙස්ට් තරගයට ක්‍රීඩා කරන ලද නිරෝෂන් දික්වැල්ල කඩුලු රැකීමෙන් මෙන්ම පිතිකරුවකු ලෙස අසාර්ථක භාවයට පත්වීම නිසා එම ස්ථානය මදුශ්කට හිමිවිය. ශ්‍රී ලංකාව වෙනුවෙන් ටෙස්ට් වරම් දිනාගත් 163 වැනි ක්‍රීඩකයා වන්නේ නිශාන් මදුශ්කය.

මොරටුව විදුහලින් ක්‍රිකට් ක්‍රීඩාවට අත්පොත් තබා තිබෙන නිශාන් මදුශ්ක දකුණතින් පන්දුවට පහර දෙන්නේය. දේශීය තරග මාලාවේදී අවම ඉනිම සංඛ්‍යාවක් ලකුණු 1000 ක් සම්පූර්ණ කළ පිතිකරුවා ලෙසින් වාර්තා පොත් අතරට එක් වූ මදුශ්ක, අවසන් වරට ශ්‍රී ලංකාවේ තරග කළ එංගලන්ත ලයන්ස් කණ්ඩායමට එරෙහිව පැවැති තෙදින සහ සිව්දින තරග වලදී අති විශිෂ්ඨ පිතිහරඹයක නිරත වූයේ ශ්‍රී ලංකා ‘ඒ’ පිලට වැඩි ගෞරව අත්කර දෙමිනි. එම තරගාවලියේ ආරම්භක පිතිකරුවකු ලෙසින් ක්‍රීඩා කළ මදුශ්ක 150, 01, 241, 22 සහ 100 වශයෙන් ලකුණු රැස් කළේය. ටෙස්ට් වරම් දිනා ගැනීම වෙනුවෙන් වූ ටෙස්ට් හිස් වැස්ම ශ්‍රී ලංකා පිලේ හිටපු නායක තුන් ඉරියව් ක්‍රීඩක ඇන්ජලෝ හැතිව්ස් විසින් තරගය ආරම්භයට පෙර නිරිමනු ලැබීය.

කාසියේ වාසිය තමන් සතු කරගත් දිමුත් කරුණාරත්න පළමුව පන්දු යැවීමට තීරණය කළේය. ශ්‍රී ලංකා කණ්ඩායම මෙම තරගයට වේග පන්දු යවන්නන් සිව් දෙනෙකු සමඟින් අවතීර්ණවීමට කළින් තීරණය කර තිබුණත් තණතීරුවේ ස්වභාවය පළමු තරගයේ පරිදිම වේග පන්දු යවන්නන් තිදෙනෙකු සමඟින් අවතීර්ණව සිටියි. ඒ අනුව පළමු තරගයට ක්‍රීඩා කරන ලද ප්‍රභාත් ජයසූරිය දඟ පන්දු යවන්නා ලෙසින් ක්‍රීඩා කරයි.

දිනය අරම්භයේදී වර්ෂාවෙන් බාධා ඇතිවීම නිසා තරග ආරම්භය ප.ව. 2.10 දක්වා කල් දැමීමට විනිසුරුවන්ට සිදුවිය. නවසීලන්ත කන්ඩායමේ තුන් ඉරියව් ක්‍රීඩක නීල් වැග්නර් ආබාධයකට ගොදුරුව සිටීම නිසා ඔහු වෙනුවට ඩග් බ්‍රේස්වල්ව අවසන් 11 දෙනා අතරට කැඳවා තිබේ.

ශ්‍රී ලංකාව – ඔෂධ ප්‍රනාන්දු, දිමුත් කරුණාරත්න (නායක), කුසල් මෙන්ඩිස්, ඇන්ජලෝ මැතිව්ස්, දිනේෂ් චන්දිමාල්, ධනංජය ද සිල්වා, නිශාන් මදුශ්ක, කසුන් රජිත, අසිත ප්‍රනාන්දු, ප්‍රභාත් ජයසූරිය, ළහිරු කුමාර.

නවසීලන්තය – ටොම් ලේතම්, ඩෙවෝන් කෝන්වේ, කේන් විලියම්සන්, හෙන්රි නිකොල්ස්, ඩැරල් මිචෙල්, ටොම් බ්ලන්ඩල්, මයිකල් බ්‍රේස්වෙල්, ඩග් බ්‍රේස්වෙල්, ටිම් සවුති (නායක), මැට් හෙන්රි, බ්ලෙයාර් තික්නර්.