ශ්‍රී ලංකා ක්‍රිකට් ආයතනයේ සංවිධානයෙන් පැවැත්වෙන ලංකා ප්‍රිමියර් ලීග් ක්‍රිකට් තරගාවලියේ සිව්වැනිනෙහි දින සංශෝධනයක් සිදුකරමින් ලබන ජූලි සහ අගෝස්තු මසවලදී පැවැත්වීමට පියවර ගෙන තිබේ. 2020 වසරේ පැවැති අභිනව තරගාවලියේ සිට මේ දක්වා පැවැති එල්.පී.එල්. තරගාවලි 3 ම පවත්වන ලද්දේ දෙසැම්බර් මසදීය.

කණ්ඩායම් 5 කගේ සහභාගිත්වයෙන් පැවැත්වෙන සිව්වැනි අදියරද ක්‍රීඩාංගණ 3 කදී පැවැත්වෙනු ඇත. හම්බන්තොට සූරියවැව ක්‍රීඩාංගණය, පල්ලකැලේ ජාත්‍යන්තර ක්‍රීඩාංගණය සහ කොළඹ ආර්. ප්‍රේමදාස ක්‍රීඩාංගණය මෙවර තරගාවලිය පැවැත්වෙන ක්‍රීඩාංගණ වෙති.

පෙර වසර වල පරිදිම මෙවරත් කණ්ඩායමක ක්‍රීඩකයින් 20 දෙනෙකුගෙන් සමන්විත වන අතර ඊට දේශීය ක්‍රීඩකයින් 14 ක් සහ විදේශීය ක්‍රීඩකයින් 6 දෙනෙකු ඇතුළත් විය යුතුයි.

මෙවර තරගාවලිය ජූලි මස 31 වැනිදා සිට අගෝස්තු මස 22 වැනිදා දක්වා පැවැත්වෙනු ඇත. “ඉහළම ජාත්‍යන්තර දක්ෂතා ආකර්ශණය කර ගැනීමට ‌වගේම ශ්‍රී ලංකාවේ ක්‍රිකට් දිනදර්ශනයටත් හොඳින් ගැලපෙන නිසා මෙවර තරගාවලිය ජූලි සහ අගෝස්තු යන මාස වලදී පැවැත්වීමට අපි තීරණය කළා” යැයි තරගාවලි අධ්‍යක්ෂක සමන්ත දොඩන්වෙල මහතා සඳහන් කර සිටියි.