ටෙස්ට් ක්‍රිකට් පිටියේ ශ්‍රී ලංකාව වෙනුවෙන් තෙවැනි වැඩිම ලකුණු ලාභියා බවට පත්වෙමින් ඇන්ජලෝ මැතිව්ස් අද දිනයේ ක්‍රිකට් වාර්තා පොත් අතරට එක් වූවේය. නවසීලන්තය සමග පැවති පළමු ටෙස්ට් ක්‍රිකට් තරගයේදී මැතිව්ස් පන්දු 98කදී ලකුණු 47කට දැවී යෑමත් සමග ඔහු ටෙස්ට් ලකුණු 7000ක් වාර්තා කළේය.

2009 වසරේ සිය මංගල ටෙස්ට් තරගයට පිවිසි ඇන්ජලෝ මැතිව්ස් ටෙස්ට් තරග 110කදී සනත් ජයසූරිය ලබාගත් ලකුණු 6,973 පසුකර යෑමට අද දිනයේ සමත්වීම කැපී පෙණුනි. 35 හැවිරිදි ඇන්ජලෝ මැතිව්ස්ට ඉදිරියෙන් ටෙස්ට් පිටියේ ශ්‍රී ලංකාව වෙනුවෙන් කුමාර් සංගක්කාර ඉනිම 233කදී ලකුණු 12,400ක් සහ මහේල ජයවර්ධන ඉනිම 252කදී ලකුණු 11,814ක් වාර්තා කොට වැඩිම ලකුණු ලාභීන්ගේ ලැයිස්තුවේ සිටිති.

තරගයේ පළමු දිනයෙන් අනතුරුව පැවැති මාධ්‍ය හමුවකදී මැතිව්ස් පැවැසූවේ මේ වසරේ වැඩිපුර ටෙස්ට් තරග ක්‍රීඩා කිරීමට නොමැතිවීම කණගාටුවට කරුණක් බවය.

“ අපේ ක්‍රීඩකයන් පසුගිය මාස 8ක කාලයේදී ඉතා හොදින් ක්‍රීඩා කළා. ලෝක ටෙස්ට් ශූරතාවලියේදී අපේ ක්‍රීඩකයන්ගේ දක්ෂතා සැලකිය යුතු ලෙස වර්ධනය වුණා. නමුත් මේ වසරේදී අපට ටෙස්ට් තරග වැඩිපුර ක්‍රීඩා කරන්න නෑ. තරග 5ක් වගේ ක්‍රීඩා කරන්න තියෙන්නේ. ඒක කණගාටුදායක තත්ත්වයක්. අපි අවසන් ටෙස්ට් තරගය ක්‍රීඩා කළේ මාස 6කට පෙර. හැමෝම කතා කරනවා ටෙස්ට් ක්‍රිකට් අභාවයට යනවා කියා. නමුත් වසරකට ටෙස්ට් ක්‍රිකට් තරග 5ක් ක්‍රීඩා කරනවා කියන්නේ අපි ටෙස්ට් ක්‍රීඩාවට මුකුත් කරන්නේ නෑ වගේ. ටෙස්ට් තරග 5ක් කියන්නේ කිසිසේත්ම ප්‍රමාණවත් නැති  දෙයක්. මා හිතනවා අපට තවත් ටෙස්ට් තරග ලැබෙයි කියා“ මැතිව්ස් මාධ්‍ය හමුවේ පැවැසීය.

නවසීලන්තය සමග ටෙස්ට් තරග දෙකකින් යුත් ටෙස්ට් තරගාවලිය පිළිබඳ විශේෂ අවධානයක් ඇතැයි ද මැතිව්ස් මෙහිදී පැවැසීය.

“ අපට සිද්ධ වෙනවා නවසීලන්තයේදී ටෙස්ට් තරගත දෙකම දිනන්න. අපට ඒ සදහා ඉතා හොදින් ක්‍රීඩා කරන්න වෙනවා. ලෝක ටෙස්ට් තරගාවලියේ අවසන් මහා තරගයට යන්න පුළුවන් වුණොත් ඒක විශාල අවස්ථාවක්. ඒ නිසා මේ තරගාවලියේ ප්‍රතිඵලය ඉතාම වැදගත්.“ මැතිව්ස් සදහන් කළේය.

වසර 2009දී පාකිස්තානයට එරෙහිව ගාල්ලේදී ටෙස්ට් වරම් දිනාගත් ඇන්ජලෝ මැතිව්ස් මේ වනවිට ටෙස්ට් තරග 101කට සහභාගීවී ඉනිම 179කට ක්‍රීඩා කොට ඇත. ඔහු ටෙස්ට් පිටියේ නොදැවී ලකුණු 200ක් වසර 2020දී සිම්බාබ්වේ පිලට එරෙහිව හරාරේ හීදී ලබාගත් අතර, මේවන විට ශතක 13ක් හා අර්ධ ශතක 38ක් වාර්තා කොට තිබේ. ඔහුගේ ටෙස්ට් ලකුණු සාමාන්‍ය 45. 14කි. ගාල්ල ජාත්‍යන්තර පිටියේදී පමණක් මැතිව්ස් ටෙස්ට් තරග 26කදී ශතකයක් හා අර්ධ ශතක 13ක් සමග ලකුණු 1736ක් ලබා තිබීම විශේෂත්වයකි.

ඇන්ජලෝ මැතිව්ස් ටෙස්ට් තරගවල පන්දු යැවීමේදී කඩුලු 33ක් දවාගෙන ඇති අතර, හොදම පන්දු යැවීම ලකුණු 60කට කඩුලු 4කි.