ජාත්‍යන්තර ක්‍රිකට් කවුන්සිලය මෙහයවූ ලෝක ටෙස්ට් ශූරතාවලියේ පස්වැනි ස්ථානයට පත් වූ දිමුත් කරුණාරත්න ප්‍රමුඛ ශ්‍රී ලංකා ටෙස්ට් කණ්ඩායමට ත්‍යාග මුදල ලෙස ඇමෙරිකානු ඩොලර් 200,000 ක් පිරිනැමීමට ජාත්‍යන්තර ක්‍රිකට් කවුන්සිලය පියවර ගෙන තිබේ. එය ශ්‍රී ලංකා රුපියල් කෝටි 6 ඉක්මවූ මුදලකි.

නවසීලන්තයේ පැවැති ශ්‍රී ලංකා – නවසීලන්ත ටෙස්ට් තරගාවලියෙන් ශ්‍රී ලංකා පිල පරාජයවීමට පෙර අවසන් මහා තරගයේ ස්ථානයක් සඳහා බලාපොරොත්තු රඳවා සිටි අතර එම පරාජයත් සමග අයිසීසී ලෝක ටෙස්ට් ශූරතාවලියේ පස්වැනි ස්ථානයට පත් විය.

එංගලන්තයේ ඕවල් ක්‍රීඩාංගණයේදී එළැඹෙන ජූනි මස 7 සිට 11 දක්වා ඉන්දියාව සහ ඕස්ට්‍රේලියාව අතර පැවැත්වීමට නියමිත ලෝක ටෙස්ට් ශූරතා අවසන් මහා තරගයේ ජයග්‍රාහී කණ්ඩායමට පිරිනැමෙන තෑගි මුදල ඇමෙරිකානු ‍ඩොලර් මිලියන 1.6ක් වන අතර, අනු ශූරයින්ට ඇමෙරිකානු ‍ඩොලර් 800,000ක දැවැන්ත මුදලක් පිරිනැමේ. ලබන 11 දා නිමාවන අයිසීසී ලෝක ටෙස්ට් ශූරතාවලියට එක්ව සිටි කණ්ඩායම් 9ට දිරිගැන්වීමේ ත්‍යාග මුදල් ලබාදීමට ජාත්‍යන්තර ක්‍රිකට් කවුන්සිලය පියවර ගෙන තිබීම විශේෂත්වයකි.

වසර 2021 සිට 2023 දක්වා පැවැති අයිසීසී ලෝක ටෙස්ට් ශූරතාවලියේ සෑම කණ්ඩායමකටම හිමිවන සියළු තෑගි මුදල් සදහා ඇමෙරිකානු ‍ඩොලර් මිලියන 3.8 ක මුදලක් වෙන් කිරීමට පියවර ගෙන ඇති අතර, තෙවැනි ස්ථානයට පත්වූ  දකුණු අප්‍රිකාවට ඇමෙරිකානු ‍ඩොලර් 450,000ක්, සිවුවැනි ස්ථානයට පත් වූ එංගලන්තයට ඇමෙරිකානු ‍ඩොලර් 350,000ක් පිරිනැමේ.

හයවැනි ස්ථානයේ සිට නවවැනි ස්ථානය දක්වා පිළිවෙලින් සිටි නවසීලන්තය, පාකිස්තානය, බටහිර ඉන්දීය කොදෙව් සහ බංග්ලාදේශය යන රටවලට ඇමෙරිකානු ‍ ඩොලර් 100,000 බැගින් ලබාදීමට කටයුතු යොදා ඇතැයි ජාත්‍යන්තර ක්‍රිකට් කවුන්සිලය නිකුත් කළ මාධ්‍ය නිවේදනයේ දැක්වේ.