කොළඹ පී. සරා ඔ්වල් පිටියේ පැවැති දෙවැනි අවසන් පූර්ව තරගයෙන් කඩුලු 5 ක ජයක් වාර්තා කළ අකිල ධනංජයගේ නායක්තවයෙන් යුතු කෝල්ට්ස් ක්‍රීඩා සමාජය අන්තර් සමාජ පන්දුවාර විස්සයි-20 ක්‍රිකට් තරගාවලිය යටතේ එන්. සී. සී. කණ්ඩායමට එරෙහිව පැවැත්වෙන අවසන් මහ තරගයේ ප්‍රතිවාදීන් බවට පත්විය. ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ ප්‍රධානතම විස්සයි-20 ක්‍රිකට් තරගාවලියේ 2023 වසරේ ශූරයින් තෝරනු ලබන අවසන් මහ තරගය ලබන 11 වැනි ඉරිදා කොළඹ එස්. එස්. සී. ක්‍රීඩාංගණයේදී පෙ.ව. 10.00 ට ආරම්භ වේ.

ලකුණු 148 ක ඉලක්කයක් හඹා ගිය කෝල්ට්ස් කණ්ඩායම පන්දු 8 ක් ඉතිරිව තිබියදී ජයග්‍රහණය සපුරා ගන්නා ලද්දේ කඩුලු 5 ක් දැවී ගොස් තිබියදීය. කෝල්ට්ස් ජයග්‍රහණය වෙනුවෙන් ධනජය ලක්ෂාන් පන්දු 32 කදී ලකුණු 51 කින් දායක වද්දී අංක 3 පිතිකරුවා ලෙස පිටියට පිවිසි ඇන්ජලෝ මැතිව්ස් පන්දු 27 කදී ලකුණු 37 ක් ලබා වැඩි දායකත්වයක් දැක්වීය.

මෙම හඹා යෑමේදී ආරම්භක පිතිකරුවන් දෙදෙනාම ලකුණු 17 කදී දැවී ගියද මැතිව්ස්ට එක්වූ ධනංජය තෙවැනි කඩුල්ල වෙනුවෙන් 82 ක සම්බන්ධතාවක් ගොඩනංවන ලද්දේ පන්දු 53 ක් පමණක් වැය කරමිනි. ලක්ෂාන්ගේ ඉනිම හයේ පහර 3 කින් සහ හතරේ පහර 3 කින් අලංකාර වද්දී මැතිව්ස්‌ සිය ඉනිම හයේ පහරකින් සහ හතරේ පහර 3 කින් සරසා ගත්තේය.

ලකුණු 8 ක් ඇතුළත මැතිව්ස් සහ ධනංජය දෙදෙනාම දැවී ගියද බර කරට ගත් ජෙහාන් ඩැනියල් හයේ පහර 2 ක් සහ හතරේ පහරක් සමගින් පන්දු 14 කදී නොදැවී ලකුණු 23 ක් ලබා කෝල්ට්ස් කණ්ඩායමේ ජයග්‍රහණය තහවුරු කළේය. ඊට පසු පැමිණි දුනිත් වෙල්ලාලගේ පන්දු 9 කින් ලකුණු 12 ක්ද මුදිත ලක්ෂාන් ලකුණු 11 කින්ද කෝල්ට්ස් ජයග්‍රහණය වෙනුවෙන් දායක වූහ. ඒ අනුව කෝල්ට්ස් කණ්ඩායම පිට පිටම දෙවැනි වතාවටත් අන්තර් සමාජ විස්සයි-20 ක්‍රිකට් තරගාවලියේ අවසන් මහ තරග අවස්ථාවට පැමිණීමට සමත්වීම කැපී පෙනෙයි.

කෝල්ට්ස් නායකයාගේ ආරාධනයෙන් පළමුව පන්දුවට පහර දුන් ඒස් කැපිටල් කන්ඩායම නියමිත පන්දුවාර 20 අවසනදී කඩුලු 8 කට ලලකුණු 147 ක් රැස් කරගත්තේය. ඒස් කැපිටල් පිල වෙනුවෙන් පවන්ත වීරසිංහ පන්දු 52 කදී හයේ පහර 4 ක් සහ හතරේ පහර 6 ක් සමගින් ලකුණු 73 ක් ලබා ඉනිමේ වැඩිම ලකුණු ලාභියා බවට පත්වූවේය.

ඉනිම ආරම්භයේදී පළමු කඩුලු 4 ම ලකුණු 35 කදී බිඳ වැටී අසීරු තත්ත්වයකට පත්වද්දී පවන්තට එක්වුණු සකුණ ලියනගේ පන්දු 20 කදි ලකුණු 20 ක් ලබා පස්වැනි කඩුල්ල වෙනුවෙන් 54 ක සම්බන්ධතාවක් පැවැත්වීමට දායකත්වය දැක්වූහ. පන්දු යැවීමේදී ධනංජය ලක්ෂාන් පන්දුවාර 3 කදී ලලකුනු 30 කට කඩුලු 4 ක් දවා ගනිද්දී උදිත් මදුෂාන් ලකුණු 29 ක කඩුලු 2 ක් දවා ඒස් කැපිටල් පිලට අභියෝගයක් ගෙන දුන්හ.

ඒස් කැපිටල් පන්දුවාර 20 කදී කඩුලු 8 ක් දැවී ලකුනු 147 යි – (පවන්ත වීරසිංහ 73, සකු ලියනගේ 20, රවිඳු රත්නායක 10, සිතාර ගිම්හාන් 13, තනුක දාබරේ 02, රොෂාන් ජයතිස්ස 10 තීරක රණතුංග 01, වනුජ සහන් 06, නිම්සර අතරගල්ල 07*, කවිඳු අමන්ත 02*, ධනංජය ලක්ෂාන් 30/4, උදිත් මදුෂාන් 29/2, දුනිත් වෙල්ලාලගේ 02/1)

කෝල්ට්ස් පන්දුවාර 18.4 කදී කඩුලු 5 ක් දැවී ලකුණු 152 යි – (ධනංජය ලක්ෂාන් 51, ඇන්ජලෝ මැතිව්ස් 36, ජෙහාන් ඩැනියල් 23*, දුනිත් වෙල්ලාලගේ 12, මුදිත ලක්ෂාන් 11*, සංගිත් කුරේ 07, යශෝධ ලංකා 06, සිතුම් දිසානායක 29/2, නිම්සර අතරගල්ල 27/1, රොෂාන් ජයතිස්ස 15/1, තනුක දාබරේ 30/1)