ඇලහැර සහ මාතලේ ප්‍රදේශවලින් ක්‍රිකට් ක්‍රීඩාවට පිවිස මේ වන විට මේජර් විස්සයි 20 වැනි රටේ ප්‍රධානම ක්‍රිකට් තරගාවලියේ දක්ෂම පන්දු යවන්නාවීමට අවස්ථාව උදාවීම පිළිබඳව නිරහංකාරව සතුටු වන්නේ යැයි මේජර් විස්සයි 20 තරගාවලියේ දක්ෂතම පන්දු යවන්නා ලෙස තේරුණු බ්ලුම්ෆීල්ඩ් කණ්ඩායමේ වේගපන්දු යවන ළහිරු මධුශංක ප්‍රකාශ කරයි.

“අවසාන පූර්ව තරගයට ඒමට අවස්ථාව නොලැබුණේ ඉතාමත් අවාසනාවන්ත ලෙසයි. කෝල්ට්ස් සමඟ මූලික වටයේ අවසාන තරගයේදී අප පරාජය වූයේ අවසාන පන්දුවේදී ඔවුන් ලකුණු දෙකක් ලබා ගැනීමෙනුයි. මූලික වටයේ අප තරග හතරෙන් තුනක්ම ජයගෙනයි සිටියේ. කෝල්ට්ස් සමඟ තරගය ජයගත්තා නම් අපට මේ තරගාවලියේ පෙරළියක් කිරීමට අවස්ථාව තිබුණා යැයි ළහිරු පවසයි.“

“තරගාවලියේ දක්ෂතම පන්දු යවන්නාවීමට මා හට කණ්ඩායමේ සියලුම ක්‍රීඩකයන්ගෙන් සහය ලැබුණා. ඊට ස්තුතියි. කණ්ඩායමට මෙවැනි ගෞරවයක් හෝ ගෙන ඒමට අවස්ථාව ලැබීම ගැන මා සතුටු වනවා” යැයි ළහිරු මධුශංක කියයි.

අපට ලබා ගැනීමට නොහැකි වූ ගෞරවයෙන් මේ මස 23 වැනිදා ඇරැඹෙන මේජර් තුන්දින තරගාවලියේදී අත්කර ගැනීමට අපේක්ෂා කරන බව පවසන ළහිරු අපගේ ක්‍රීඩකයන් කිහිපදෙනකුම ලංකා ප්‍රිමියර් ලීග් තරගාවලියට සහභාගි වන හෙයින් එහිදී ද ඔවුනගේ දක්ෂතා දැක ගැනීමට අවස්ථාව උදාවනු ඇතැයි පවසයි.

“අපගේ පුහුණුකරු ෂානුක ප්‍රනාන්දු කණ්ඩායමේ උන්නතිය වෙනුවෙන් විශාල වගකීමක් ඉටු කළා. ඉදිරියේ එන තුන්දින තරගාවලියේදී අපගෙන් අහිමි වූ ජයග්‍රහණ නැවත අත්කර ගැනීමට කණ්ඩායමේ සියලු ක්‍රීඩකයන් අපේක්ෂාවෙන් පසුවනවා” යැයි ද මධුශංක කියයි.

මාතලේ දිස්ත්‍රික්කයේ ඇලහැර උපත ලද ළහිරු මධුශංක එහි ප්‍රාථමික අධ්‍යාපනය ලබා ක්‍රිකට් ක්‍රීඩාවට පෙන් වූ දස්කම් මත මාතලේ ශාන්ත තෝමස් විදුහලට ඇතුළු වී ශ්‍රී ලංකා අවුරුදු 19න් පහළ කණ්ඩායම ද නියෝජනය කර පසුව ශ්‍රී ලංකා එමර්ජින් පිල 23න් පහළ කණ්ඩායම, ශ්‍රී ලංකා ක්‍රිකට් සභාපතිගේ කණ්ඩායම සහ ශ්‍රී ලංකා ‘ඒ‘ පිල හරහා ශ්‍රී ලංකා ජාතික පිල ද නියෝජනය කර සිටී.

ජාතික කණ්ඩායම සමඟ දකුණු අප්‍රිකා සංචාරයේදී දකුණු අප්‍රිකා නායක ෆෆ් ඩු ප්ලෙසිස් තරග තුනකදී පිට පිටම තෙවතාවක්ම දවාලීම ළහිරු මධුශංක ලත් විශිෂ්ට ජයග්‍රහණයකි.