මෙරට ප්‍රධානතම පෙළේ ක්‍රිකට් ක්‍රීඩකයින්ගේ සහභාගිත්වයෙන් පැවැත්වෙන අන්තර් සමාජ මේජර් ලීග් තුන්දින ක්‍රිකට් තරගාවලිය මෙම ජුලි මස  23 වැනිදා (සිට ආරම්භ කිරීමට ශ්‍රී ලංකා ක්‍රිකට් ආයතනය කටයුතු යොදා ඇත. ශ්‍රී ලංකා ක්‍රිකට් සංවිධානය කරන ලංකා ප්‍රිමියර් ලීල් ක්‍රිකට් තරගාවලිය හේතුවෙන් මෙම තරගාවලිය අදියර දෙකක් යටතේ සංවිධානය  කොට ඇත. ඒ අනුව මේජර් ලීග් අන්තර් සමාජ තුන්දින ක්‍රිකට් තරගාවලියේ පළමු අදියර ජුනි මස 23 දා සිට ජූලි මස 23 දක්වා ද දෙවැනි අදියර අගෝස්තු මස 25 සිට ඔක්තෝබර් 8 දක්වා පැවැත්වේ. ‘ඒ‘ හා ‘බී‘ වශයෙන් පළමු පෙළ ක්‍රීඩා සමාජ 22ක් එක්ව සිටින මෙම තරගාවලිය අවසන් මහා තරගය ද ඇතුලුව සමස්ථ තරග සංඛ්‍යාව 82කි.

එල්පීඑල් තරගාවලිය පැවැත්වෙන ජූලි මස 30 දා සිට අගොස්තු මස 20 වැනිදා දක්වා කාලය හැර මේජර් ලීග් අන්තර් සමාජ තුන්දින ක්‍රිකට් තරගාවලිය අඛණ්ඩව සෑම සති අන්තයකම පැවැත්වීමට කටයුතු යොදා ඇත.

‘ඒ‘ කාණ්ඩයෙන් පසුගිය ශූර සීසීසී, යුද හමුදාව, එස්එස්සී, කොල්ට්ස්, පානදුර, රාගම, බීආර්සී, මීගමුව, කැන්ඩි කස්ටම්, ගාල්ල හා නුගේගොඩ යන ක්‍රීඩා සමාජ තරග බිමට පිවිසෙති. මෙවර තරගාවලියේ ‘බී‘ කාණ්ඩයට පසුගිය අනුශූර ටැමිල් යූනියන්, මුවර්ස්, එන්සීසී, හලාවත මේරියන්ස්, බදුරලිය, ඒස් කැපිටල්, බ්ලුම්ෆීල්ඩ්, සෙබස්තියනයිට්ස්, ගුවන් හමුදාව, පොලීසිය හා කුරුණෑගල තරුණ ක්‍රිකට් ක්‍රීඩා සමාජ එක්ව සිටිති.

අවසන්වරට පසුගිය වසරේ පැවැති තරගාවලියේ ශූරතාව පළමු ඉනිමේ ජය අනුව කොළඹ ක්‍රිකට් සමාජය (සීසීසී) පිල දිනාගත් අතර, අනුශූරතාව ද්‍රවිඩ සංගම් පිලට (ටැමිල් යූනියන්) හිමි විය.  එම අවසන් මහා තරගයේදී ද්‍රවිඩ සංගම් පිල පළමු ඉනිමේදී ලකුණු 558ක් හා දෙවැනි ඉනිමේදී කඩුලු 4ක් දැවී ලකුණු 145ක් ලබා ගත්තේය. ද්‍රවිඩ සංගම් පිල පළමු ඉනිමට ලකුණු 669ක් ලබා ගැනීම හේතුවෙන් ඉදිරියට පැමිණියේය. කොළඹ ක්‍රිකට් සමාජය වෙනුවෙන් කමිදු මෙන්ඩිස්, අශාන් ප්‍රියංජන හා චමිදු විජේසිංහ ශතක රැස්කළ අතර, ද්‍රවිඩ සංගම් පිල වෙනුවෙන් සධීර සමරවික්‍රම ලකුණු 188ක් වාර්තා කළහ.

එම අවසන් වරට පැවැති මේජර් ලීග් අන්තර් සමාජ තුන්දින ක්‍රිකට් තරගාවලියේ අවසන් තරගයේ වීරයා ලෙස කොළඹ ක්‍රිකට් සමාජයේ චමිදු විජේසිංහ හා තරගාවලියේ වීරයා ලෙස රාගම ක්‍රිකට් සමාජයේ නිශාන් මධුෂ්ක සම්මානයට පාත්‍ර වූහ.

මේජර් ලීග් අන්තර් සමාජ තුන්දින ක්‍රිකට් තරගාවලියේ (23) හෙට සිට 25වැනිදා දක්වා පැවැත්වෙන තරග මෙසේය.

යුද හමුදාව හා නුගේගොඩ ක්‍රීඩා සමාජය අතර තරගය පනාගොඩ යුද හමුදා පිටියේදී

එස්එස්සී –  ගාල්ල අතර තරගය එස්එස්සී පිටියේදී

කැන්ඩි කස්ටම් – කොල්ට්ස් අතර තරගය තර්ස්ටන් පිටියේදී

පානදුර – මීගමුව අතර තරගය පානදුරේදී

මුවර්ස් – කුරුණෑගල තරුණ ක්‍රිකට් අතර තරගය බීආර්සී පිටියේදී

එන්සීසී – පොලීසිය අතර තරගය එන්සීසී පිටියේදී

ගුවන් හමුදාව – හලාවත මේරියන්ස් අතර තරගය කටුනායක ගුවන් හමුදා පිටියේදී

බදුරලිය – සෙබස්තියනයිට්ස් අතර තරගය මග්ගොන සරේ පිටියේදී

බ්ලුම්ෆීල්ඩ් –  ඒස් කැපිටල් අතර තරගය බ්ලුම්ෆීල්ඩ් පිටියේදී