2022 මූල්‍ය වසරේදී ලද බිලියන 6.3 ක වාර්තාගත ශුද්ධ ලාභයද සමඟ එම වර්ෂය සඳහා ශ්‍රී ලංකා ක්‍රිකට් ආයතනය විසින් විගණනය කරන ලද මූල්‍ය ප්‍රකාශනය, ශ්‍රී ලංකා ක්‍රිකට් ආයතන සාමාජිකයින් විසින් ඒකමතිකව අනුමත කර තිබේ.

ශ්‍රී ලංකා ක්‍රිකට් ආයතනය 2022 වසරේදී උපයාගත් රුපියල් බිලියන 17.5 ක වාර්තා ගත ආදායමෙන් බිලියන 6.3 ක වාර්තාගත ශුද්ධ ලාභයක් උපයා ගැනීමට සමවිය. එය එතෙක් මෙතෙක් ශ්‍රී ලංකා ක්‍රිකට් ආයතනය විසින් වර්ෂයක් තුළදී උපයා ගත් වැඩිම ශුද්ධ ලාභය ලෙසින්ද සටහන් වෙයි. මෙය 2022 වර්ෂයේ උපයා ගත් රුපියල් බිලියන 2.1 ක මුදල ශුද්ද ලාභයට වඩා 120 ක වැඩිවීමක් ලෙසින් සටහන් වේ.

ජුනි මස 17 වැනිද දින කොළඹ සිනමන් ග්‍රෑන්ඩ් හෝටලයේ පැවැති අති විශේෂ මහ සභා රැස්වීමේදී මෙය සාමාජිකයින් විසින් අනුමත කරන ලදී.

ශ්‍රී ලංකා ක්‍රිකට් ආයතනය විසින් ලබා තිබෙන මෙම නවතම වර්ධනය ප්‍රධාන වශයෙන්ම ජාත්‍යන්තර ක්‍රිකට්, දේශීය ක්‍රිකට්, අනුග්‍රාහක කොන්ත්‍රාත්තු සහ අන්තර්ජාතික ක්‍රිකට් සභාවේ වාර්ෂික සාමාජික ගෙවීම් ගාස්තු යන ආදායම් හතරකින් උපයාගෙන තිබේ.

2022 වසරේ දෙසැම්බර් මස 31 වැනි දිනෙන් අවසන් වුණු වසර සදහා ජාතික විගණන කාර්යලය විසින් ලබා දුන් ශ්‍රී ලංකා ක්‍රිකට් ආයතන‌ේ කටයුතු සම්බන්ධයෙන් වැරදි සහගත කිසිවක් නොමැති බව සඳහන් වේ.