ඕනෑම තරගයක ස්වරූපය ඉක්මනින්ම වෙනස් කළ හැකි ක්රීඩකයන් රැසක්ම දඹුල්ල අවුරා කණ්ඩායම නියෝජනය කිරීම අප කණ්ඩායමට විශේෂ වාසියක් වී ඇතැයි දඹුල්ල අවුරා – බී ලව් කැන්ඩි තරගයේ වීරයා ලෙස තේරුණු දඹුල්ල කණ්ඩායමට නායකත්වය දුන් ධනංජය ද සිල්වා ප්රකාශ කරයි.
අපගේ කණ්ඩායමේ අතිරේක ක්රීඩක ලැයිස්තුවේ දක්ෂතම ක්රීඩකයන් රැසක්ම සිටින හෙයින් ඔවුනට උපරිමයෙන් අවස්ථාව ලබාදීමට අප නිතර උත්සාහ ගන්නා බව පවසන ධනංජය ද සිල්වා එම කරුණ හිසරදයක් වුවත් එය වැදගත් වන්නේ හොඳම ක්රීඩක පිරිසක් කණ්ඩායමට තෝරා ගැනීමට අවස්ථාව ලැබීම මත යැයි ද පවසයි. අවසාන තරගයට ක්රීඩකයන් නම් කිරීමේදී මෙය ප්රබල ලෙස බලපානු ඇතැයි ද ඔහු කියයි.
නායක කුසල් මෙන්ඩිස්, බිනුර ප්රනාන්දු, හසන් අලි ඇතුළු ක්රීඩකයන් පස් දෙනෙකුටම විවේක ලබාදී අතිරේක ක්රීඩකයන් කිහිපදෙනකුම එක්කර ගැනීම පිළිබඳව අදහස් දැක් වූ දඹුල්ල අවුරා නායකයා මෙයින් ඔප්පු වන්නේ අතිරේක ක්රීඩකයන් තුළ පවතින විශිෂ්ට දක්ෂතාවයන් බවත් දඹුල්ල සංචිතයට මෙවැනි ප්රබල ක්රීඩකයන් පිරිසක් එක් වූයේ ක්රීඩක වෙන්දේසියේදී හොඳම ක්රීඩකයන් තෝරා බේරා ගැනීම මතයැයි ද කියයි.
දඹුල්ල අවුරා සහ බී ලව් කැන්ඩි තරගයේ කැන්ඩි කණ්ඩායම මුලින් පන්දුවට පහර දෙද්දී ආරම්භක පන්දු යවන්නකු ලෙස තමා පන්දු යැවීමට පැමිණියේ මීට පෙර තරගයේදී ද කැන්ඩි කණ්ඩායමේ ආරම්භක වමත් පිතිකරු ෆකාර් සමාන් තමාගේ පන්දුවකට දැවී යාම මත යැයි කී ධනංජය මෙවර ද එය සාර්ථක වූවා යැයි ද කීය. එපමණක් නොව මා පවා විශ්වාස නොකළ අයුරින් ඉනිම ආරම්භයේ පන්දුවාර දෙකක් යවද්දී ලකුණු හයකට කඩුලු හතරක් දවාලීමට තමාට අවස්ථාව ලැබුණු බව ද ඔහු පැවසීය.
අවසාන පන්දු වාරය මෙතරම් කඩුලු ලබා සිටි ඔහු යැව්වේ නැත්තේ ඇයි දැයි විමසූ විට දඹුල්ල අවුරා නායකයා පැවසුවේ එම පන්දුවාරය දීර්ඝ හතරේ සීමාව පෙදෙසින් යැවීමට තිබූ අතර ප්රමෝද් මධුශාන්ට පිතිකරුගේ පාදය දෙසට හොඳින් යෝකර් පන්දු යැවිය හැකි හෙයින් තමාට ලබා ගැනීමට තිබූ කඩුලු පහ ගැන නොසිතා ප්රමෝද්ට අවසාන ඕවරය භාර දුන් බවය.
කුසල් ජනිත් පෙරේරාගේ ඊළඟ තරග සහභාගිත්වය සහ ප්රධාන පුහුණුකරුවන්ගේ දායකත්වය පිළිබඳව විමසූ විට දඹුල්ල අවුරා නායකයා ප්රකාශ කළේ “කුසල් ජනිත් ඊළඟ තරගයට සහභාගිවීම පිළිබඳව තීරණය කළ යුත්තේ තේරීමේ කමිටුව මඟිනුයි. ප්රධාන පුහුණුකරු අවිශ්ක ගුණවර්ධන මීට කලින් ද ‘ඒ‘ කණ්ඩායම සමඟ එතෙර සංචාරයන්ට සහභාගිවීමෙන් අප අතර හොඳ අවබෝධයක් තිබෙනවා. පුහුණුකරු සනත් ජයසූරිය තරග රාශියකට සහභාගි වී ඇති අත්දැකීම් රාශියක් ඇති අයෙක්. ඔහු අපට දැනටත් ඉතා වැදගත් උපදෙස් වරින්වර ලබා දෙනවා” යි ධනංජය පැවැසීය.
බන්දුල මොල්ලිගොඩ
