බටහිර ඉන්දීය කොදෙව් අවුරුදු 19 න් පහළ පිලට එරෙහිව රංගිරි දඹුලු ක්‍රීඩාංගණයේදී පැවැත්වෙන සිව්දින තරගයේ තෙවැනි දිනය වූ අද (07 වැනිදා) දිනය පන්දුවාර 24.4  කට පමණක් සීමා විය. දිවා භෝජනයට මිනිත්තු 30 කට පමණ පෙර තරගයට වර්ෂාවෙන් බාධා පැමිණ ක්‍රීඩාව නිමා කර දමන විට සිය පළමු ඉනිම ක්‍රීඩා කරමින් සිටින බටහිර ඉන්දීය ‌කොදෙව් යොවුන් ක්‍රීඩකයෝ කඩුලු 3 කට ලකුණු 119 ක් ලබා සිටියහ.

පෙර දිනයේදී නියමිත පන්දුවාර සංඛ්‍යාව යැවීමට නොහැකිවීම නිසා අද දිනයේදී තරගය පෙ.ව. 9.45 ට ආරම්භ කෙරුණු අතර තරය ප.ව. 11.30 පමණ වන විට නවතා දැමෙන විටත් සංචාරකයින්ගේ කඩුලු 2 ක් ඩැහැ ගැනීමට විශ්ව ළහිරු සහ විහස් තෙව්මික සමත්වූහ.

ඒ් අතරතුර දෙවැනි පන්දුවාර 50 තරගයේදී ශතකයක් ලද ජෝර්ඩ්න් ජොන්සන් සිය අර්ධ ශතකය සම්පූර්ණ කිරීමට සමත්වීම සංචාරකයින්ගේ ඉනිමේ කැපී පෙනෙන එකම සිදුවීම විය. පන්දු 67 කට මුහුණ දුන් ජොන්සන් හයේ පහරක් සහ හතරේ පහර 5 ක් සමඟින් ලකුණු 54 ක් ද ස්ටීව් වෙඩබර්න් පන්දු 54 කදී ලකුණු 28 ක් ලබා කඩුල්ලේ රැඳී සිටිති.

අද දිනයේ දැවී ගිය පළමු පිතිකරුවා වූයේ ජොෂුවා ඩෝර්න් (06) වන අතර ඔහු වමත් දඟ පන්දු යවන්නා වන විශ්ව ළහිරුගේ පන්දුවක් හමුවේ දැවී ගියේ විශ්ව රාජපක්ෂ උඩ පන්දුවක් රැක ගැනීම නිසාය. එතැනින් නොනැවතුණු විශ්ව නැවතත් ස්ටීවන් පැස්කල්වද කඩුල්ල මුවා කිරීමේ වරදහදට හසුකර ගත්තේය.

හෙට තරගයේ සිව්වැනි සහ අවසන් දිනය වේ.

ශ්‍රී ලංකා අවු. 19 න් පහළ කණ්ඩායම පළමු ඉනිම පන්දුවාර 105 කදී කඩුලු 8 කට ලකුණු 432 යි – (දිනුර කලුපහන 150*, පුළිඳු පෙරේරා 71, සිනෙත් ජයවර්ධන 34, රවිෂාන් නෙත්සර 31, රුසඳ ගමගේ 07, සරුජන් ශන්මුගනාදන් 17, විශ්ව රාජපක්ෂ 09, මල්ෂ තරුපති 65, විහස් තෙව්මික 35, විශ්ව ළහිරු 00*, ටරික් ඒඩ්වර්ඩ් 99/3, නේතන් සීලි 100/2, ඉසායි තෝරන් 58/2)

බටහිර ඉන්දීය කොදෙව් ‌අවු. 19 න් පහළ පිල පන්දුවාර 31.5 කදී කඩුලු 3 ක් දැවී ලකුණු 119 යි – (ඒ්ඩ්‍රියන් වියර් 15, ස්ටීවන් පැස්කල් 11, ජොෂුවා ඩ්‍රෝන් 06, ජෝර්ඩ්න් ජොන්සන් 54*, ස්ටීවන් වෙඩරබර්න් 28*, විශ්ව ළහිරු 22/2, විහස් තෙව්මික 39/1)