බටහිර ඉන්දීය සහ ශ්‍රී ලංකා වයස අවුරුදු 19 න් පහළ කණ්ඩායම් අතර රංගිරි දඹුලු ක්‍රීඩාංගණයේදී අද (05 දා) ඇරැඹි පළමු සිව්දින තරගයේ පළමු දිනට තරගය නිමා කරන විට සිය පළමු ඉනිම ක්‍රීඩා කරමින් සිටින ශ්‍රී ලංකා යොවුන් කණ්ඩායම කඩුලු 3 ක් දැවී ලකුණු 163 ක් ලබා සිටියි.

වර්ෂාව හේතුවෙන් ප.ව. 3.00 දක්වා ප්‍රමාදව ඇරැඹුණු මෙම තරගයේදී කාසියේ වාසිය දිනූ ශ්‍රී ලංකා යොවුන් නායක සිනෙත් ජයවර්ධන පළමුව පන්දුවට පහර දීමට තීරණය කළේය. තමන් ගත් තීරණය නිවැරදි තීරණයක් බව පසක් වූයේ ඔහු පුලිඳු පෙරේරා සමඟ පළමු කඩුල්ල වෙනුවෙන් ලකුණු 64 ක් එක් කරමිනි. ඒ් සඳහා ඔවුන් දෙපළ වැය කරන ලද්දේ  පන්දු 70 ක් පමණි. ප්‍රහාරාත්මක ආරම්භයක් ලබා ගත් නායක සිනෙත් පළමු කඩුල්ල ලෙසින් දැවි යන විට හතරේ පහර 7 ක් සමඟ පන්දු 34 කදී ලකුණ 34 ක් ලබා සිටියේය.

තෙවැනි එක්දින තරගයේදී ශතකයක් ලද පුළිඳු පෙ‌රේරා අද දිනයේදීත් සාර්ථක වෙමින් පන්දු 66 කදී වේගවත් ලකුණු 71 ක් ලබා ගත්තේ හයේ පහර 2 ක් සහ හතරේ පහර 8 ක් තම ඉනිමට ඇතුළත් කරගනිමිනි.

අංක 3 ස්ථානයෙන් පන්දුවට පහර දීමට පැමිණි රවිෂාන් නෙත්සර ඉවසිලි වන්ත ඉනිමක් දියත් කරමින් පන්දු 81 කදි ලකුණු 31 ක් ලබා දෙවැනි දිනටත් පන්දුවට පහර දීමේ අවස්ථාව උදා කරගෙන සිටියි. ඔහුට අමතරව දිනුර කලුපහන ලකුණු 15 ක් ලබා කඩුල්ලේ රැඳි සිටියි.

ශ්‍රී ලංකා අවු. 19 න් පහළ පිල පන්දුවාර 38 කදී කඩුලු 3 ට ලකුණු 163 යි – (පුලුඳු පෙරේරා 71, සිනෙත් ජයවර්ධන 34, රවිෂාන් නෙත්සර 31* රුසඳ ගමගේ 08, දිනුර කලුපහන 15*, ඉසායි තෝර්න් 33/1, නේතන් සීලි 45/1, ටරික් ඒඩ්වර්ඩ් 27/1)