එංගලන්ත තරග සංචාරයක නිරතව සිටින ශ්‍රී ලංකා කාන්තා කණ්ඩායම සහ එංගලන්ත කාන්තා පිල අතර හෝව් හිදී පැවැති පළමු පන්දුවාර විස්සයි-20 තරගයෙන් ඩක්වර්ත් ලුවිස් න්‍යායට අනුව ලකුණු 12 ක ජයක් ශ්‍රී ලංකා පිලට එරෙහිව අත්කර ගැනීමට එංගලන්ත කණ්ඩායම සමත්විය.

වර්ෂාවෙන් බාධා පැමිණීම නිසා පන්දුවාර 17 කට සීමා වෙමින් පැවැති මෙම තරගයේදී ශ්‍රී ලංකා පිලට පන්දුවාර 6 කදී ලකුණු 68 ක ඉලක්කයක් හිමි වුවත්, ශ්‍රී ලංකා කණ්ඩායමට රැස් කර ගත හැකි වූයේ කඩුලු 3 කට ලකුණු 55 ක් පමණි.

ශ්‍රී ලංකාව වෙනුවෙන් චමරි අතපත්තු පන්දු 10 කදී ලකුණු 15 ක් රැස් කර ගත්තද අනෙක් ආරම්භක පිතිකාරිණිය වූ විශ්මි ගුණරත්න ලබා ගත් ලකණු 17 සඳහා පන්දු 16 ක් වැය කර තිබීම ශ්‍රී ලංකාවට දැඩි පාඩුවක් ගෙන දෙන්නක් විය. කෙසේ වෙතත් අංක 4 ස්ථානයෙන් පැමිණි නිලක්ෂි ද සිල්වා පන්දු 8 කදී ලකුණු 18 ක් ලබා ගැනීමට සමත්වීම නිසා ශ්‍රී ලංකාවට ජයග්‍රහණය ආසන්නයට පැමිණීමට අවකාශ උදාවිය.

පළමුව පන්දුවට පහර දුන් ඒංගලන්ත පිල පන්දුවාර 17 ක් අවසනදී කඩුලු 4 කට ලකුණු 186 ක් රැස් කර ගත්තේය. එංගලන්ත වෙනුවෙන් ඉදිරි පිතිකාරිණින් පස් දෙනාම ලකුණු 20 සීමාව ඉක්මවාලමින් ලකුණු රැස් කළ අතර එහිදී ඇලිස් කැප්සි පන්දු 27 කදී ලකුණු 51 ක් ලබා වැඩිම ලකුණු ලාභිණිය බවට පත්වූවාය.

එංගලන්ත ඉනිම අවසානයේදී යළිත් තරගයට වර්ෂාව පැමිණි බැවින් තරගය තවත් පන්දුවාර 11 ක් අඩු කොට පන්දුවාර 6 කදී ලකුණු 68 ක වශයෙන් ඉලක්කය සංශෝධනය විණ.

එංගලන්තය පන්දුවාර 17 කදී කඩුලු 4 ට ලකුණු 186 යි – (මායියා බවුචර් 22, ඩැනී වෙට් 48, ඇලිස් කැප්සි 51, ෆ්‍රෙයා කෙම්ප් 20, හීතර් නයිට් 23*, කවීෂා දිල්හාරි 18/1, ඉනෝකා රණවීර 35/1, චමරි අතපත්තු 25/1)

ශ්‍රී ලංකාව පන්දුවාර 6 කදී ලකුණු 55 යි – (විශ්මි ගුණරත්න 17*, චමරි අතපත්තු 15, නිලක්ෂි ද සිල්වා 18, මහිකා ගෝර් 16/1, චාරිලි ඩීන් 06/1)