මෙරට යොවුන් ක්‍රිකට් ක්‍රීඩකයින්ගේ දක්ෂතා මැන බැලීමේ අරමුණින් ශ්‍රී ලංකා ක්‍රිකට් ආයතනය සංවිධානය කරන වයස අවුරුදු 19න් පහළ යූත් ලීිග් 2024 ක්‍රිකට් තරගාවලියේ පළමු තරගය අද (24) මග්ගොන සරේ ක්‍රීඩාංගණයේදී ආරම්භ විය. සමාරම්භක දිනයේදී කොළඹ උතුරු කණ්ඩායම හා කොළඹ දකුණු කණ්ඩායම අතර තරගයෙන් කඩුලු 5ක ජයක් අත්කර ගැනීමට කොළඹ දකුණ පිල සමත් වූවේය..

කාසියේ වාසිය දිනාගත් කොළඹ උතුරු පළාත් පිල මුලින් පන්දුවට පහරදී ලකුණු 138ක් ලබාගත් අතර, කොළඹ දකුණ ක්‍රීඩාකයෝ ඕවර් 34.5කදී කඩුලු 5ක් දැවී ලකුණු 140ක් ලබා ගත්තේය. ජයග්‍රාහී කොළඹ දකුණ කණ්ඩායමේ සහන් කෞෂල්‍ය අර්ධ ශතකයක් ලබා ගැනීමට සමත් විය. දෙනෙත් ප්‍රියංග පීරිස් ලකුණු 47ක් හා අකාශ් ප්‍රනාන්දු ලකුණු 24ක් වාර්තා කළහ.

මෙම පන්දු ඕවර් 50 වයස අවුරුදු 19න් පහළ යූත් ලීිග් 2024 ක්‍රිකට් තරගාවලිය ලබන 1 දක්වා පැවැත්වෙන අතර, මෙවරත් කණ්ඩායම් 5ක් තරග වදිති. කොළඹ දකුණ, කොළඹ උතුර, ගාල්ල, දඹුල්ල සහ මහනුවර යන කණ්ඩායම් තරගාවලිය නියෝජනය කරනු ලබන කණ්ඩායම් වෙති.

කොළඹ උතුර කණ්ඩායම සියලු දෙනා දැවී ලකුණු 138 (ඕවර් 38.1)
තනූජ රාජපක්ෂ 36, ඉනුක කරන්නාගොඩ 29, අතිරේක 22 (සහන් කෞෂල්‍ය 20/4, අචල පෙරේරා 24/3)

කොළඹ දකුණ කණ්ඩායම කඩුලු 5කට ලකුණු 140 (ඕවර් 34.5)
දෙනෙත් ප්‍රියංග පීරිස් 47, සහන් කෞෂල්‍ය නොදැවී 54, අකාශ් ප්‍රනාන්දු නොදැවී 24 (විශ්ව ධනංජය 15/2, කවීෂ මෙන්ඩිස් 20/2)