එංගලන්තට එරෙහි තරග 3 කින් සමන්විත ටෙස්ට් තරගාවලියට පෙර ශ්‍රී ලංකා කණ්ඩායමට හිමි එකම සිව්දින පුහුණු තරගයේ දෙවැනි දිනය වූ අද (15 දා) ශ්‍රී ලංකා කණ්ඩායම රැස් කරන ලද ලකුණු 139 ට පිළිතුරු ලෙස එංගලන්ත ලයන්ස් පිතිකරුවෝ සියලු දෙනා දැවී ලකුණු 324 ක් ලබා ගැනීමට මසත්විය. ඒ අනුව දෙවැනි ඉනිම ආරම්භයට පෙර ලයන්ස් කණ්ඩායම ශ්‍රී ලංකාවට වඩා ලකුණු 185 ක් ඉදිරියෙන් පසුවෙති.

මේ තත්ත්වය මත ශ්‍රී ලංකා කණ්ඩායමට අත්දැකීම් අවම එංගලන්ත් ලයන්ස් කණ්ඩායමට එරෙහිව ඉනිමක පරාජයෙන් බේරීමේ සටනක නිරත වන්නට සිදුව තිබේ. එසේ වන්නට නම් ඔවුන් ඉදිරි දින 2 ක ඇතුළතදී ලකුණු 185 කට වඩා ලබා ගත යුතුවනු ඇත.

ලයන්ස් කණ්ඩායමේ සමාන් අක්ටර්ගේ ලකුණු 32 කට කඩුලු 5 ක දක්ෂතාව ප්‍රධාන කොට ශ්‍රී ලංකා කණ්ඩායම පළමු ඉනිම වෙනුවෙන්  පන්දුවාර 43.5 කදී ලකුණු 139 කට සීමාවිය. ශ්‍රී ලංකාව වෙනුවෙන් එකම පිතිකරුවකු හෝ ලකුණු 30 සීමා ඉක්මවාලීමට අසමත් වෙද්දී පළමු ඉනිම ක්‍රීඩා කිරීම ආරම්භ කළ ලයන්ස් කණ්ඩායම පළමු දිනය අවසන් වන විටම ලකුණු 06 කින් පෙරමුණට පැමිණීමට සමත්වූයේ තවත් කඩුලු 6 ක් අත දරාගනිමිනි.

පළමු දිනයේ දැවී ගිය කඩුලු 4 න් කඩුලු 3 ක් තමන් සතු කරගත් ප්‍රභාත් ජයසූරිය දෙවැනි දිනයේදී තවත් කඩුලු 2 ක් දවා ගනිමින් තම ලකුණු 102 කඩුලු 5 ක් දක්වමින්  පන්දුවෙන් දස්කම් දැක්වීය. ඔහු ලයන්ස් ඉනිමේ පළමු කඩුලු 5 ම දවා ගැනීම කැපී පෙනිණ. ඔහුට අමතරව කුසන් රාජිත ලකුණු 51 කට කඩුලු 2 ක් දවා ගත් නමුත් අනෙක් වේග පන්දු යවන්නන් වූ ළහිරු කුමාර සහ මිලාන් රත්නායක එක කඩුල්ල බැගින් බිඳ හෙලූහ.

ලයන්ස් පළමු ඉනිම වෙනුවෙන් හම්සා ශෙයික් හතරේ පහර 7 ක් සමගින් ලකුණු 91 ක් ද කේසි ඇල්ඩ්‍රිජ් හයේ පහර 2 ක් සහ හතරේ පහර 7 ක් සමග ලකුණු 78 ක්ද රැස් කරමින් ලයන්ස් ඉනිම පෝෂණය කළහ.