ශ්‍රී ලංකා වයස අවුරුදු 19න් පහළ කාන්තා ක්‍රිකට් ක්‍රීඩිකාවෝ තුන්කොන් ක්‍රිකට් තරගාවලියකට සහභාගීවීම උදෙසා ඔස්ට්‍රේලියාව බලා පිටත්ව යෑමට සූදානම් වේ.

ලබන සැප්තැම්බර් - ඔක්තෝබර් මාසවලදී ඕස්ට්‍රේලියාවේ 19න් පහළ කාන්තා ක්‍රිකට් කණ්ඩායම හා නවසීලන්ත 19න් පහළ කාන්තා ක්‍රිකට් කණ්ඩායම ශ්‍රී ලංකා යෞවනියන් සමඟ තරග කිරීමට සැලසුම්කොට ඇත. මෙය විස්සයි20 සහ ඕවර් 50 එක්දින ක්‍රිකට් තරගාවලි දෙකක් ලෙස සංවිධානය වේ.

මෙම සංචාරය ශ්‍රී ලංකා වයස අවුරුදු 19න් පහළ කාන්තා ක්‍රිකට් ක්‍රීඩිකාවන්ට ඉතා වැදගත් තරගාවලියක් වන අතර, ඔවුන් ඉහළ තරගකාරී කණ්ඩායම්වලට එරෙහිව ක්‍රීඩා කිරීමට අවස්ථාව උදාකර ගැනීම විශේෂත්වයකි.

ශ්‍රී ලංකා 19න් පහළ කාන්තා කණ්ඩායම පසුගිය අප්‍රේල් මාසයේ හම්බන්තොට ක්‍රීඩාංගණයේදී ඔස්ට්‍රේලියාව සහ එංගලන්තය සහභාගි වූ මෙවැනිම තුන්කොන් තරගාවලියකට ක්‍රීඩා කළේය.

විස්සයි20 තරගාවලියේ තරග කාලසටහන මෙසේය:
සැප්. 20 දා ශ්‍රී ලංකා - නවසීලන්තය ඇලාන් පෙටිග්රිව් ඕවල් පිටියේදී
සැප්. 22දා  ශ්‍රී ලංකා - ඔස්ට්‍රේලියා ඉයන් හීලි ඕවල් පිටියේදී
සැප්. 25දා  ශ්‍රී ලංකා  - ඔස්ට්‍රේලියා  බිල් පිපෙන් ඕවල් පිටියේදී 
සැප්. 26දා  ශ්‍රී ලංකා - නවසීලන්තය බිල් පිපෙන් ඕවල් පිටියේදී 

ඕවර් 50 එක්දින තරගාවලියේ තරග කාලසටහන මෙසේය:
සැප්. 30දා ශ්‍රී ලංකා  - ඔස්ට්‍රේලියා  ඇලාන් පෙටිග්රිව් ඕවල් පිටියේදී
ඔක්. 1දා     ශ්‍රී ලංකා - නවසීලන්තය ඇලාන් පෙටිග්රිව් ඕවල් පිටියේදී