අන්තර්ජාතික ක්‍රිකට් සභාව විසින් අගෝස්තු මසට අදාළ දක්ෂතම ක්‍රීඩකයින් නම් කිරීමේදී එම සම්මාන ද්විත්වයම ශ්‍රී ලාංකිකයින් දෙපළක් වන තුන් ඉරියව් ක්‍රීඩක දුනිත් වෙල්ලාලගේ සහ කාන්තා ක්‍රීඩිකා හර්ෂිතා සමරවික්‍රම දිනා ගැනීමට සමත්ව සිටිති. මෙම තරග ඉතිහාසයේ එකම රටක දෙපළක් අදාළ සම්මාන දිනා ගත් දෙවැනි අවස්ථාව ලෙසින් මෙය ඉතිහාස ගත විය.

නිමාවට පත් වුණු ඉන්දීය ක්‍රිකට් කණ්ඩායමේ ශ්‍රී ලංකා තරග සංචාරය යටතේ දැක්වූ දක්ෂතා මත පදනම්ව දුනිත් වෙල්ලාලගේද, අයර්ලන්ත කාන්තා ක්‍රිකට් පිලට එරෙහිව අයර්ලන්තයේ  පැවැති තරගාවලියේදී දක්වන ලද දක්ෂතා හේතුවෙන් හර්ෂිතා සමරවික්‍රමද එම ගෞරව සම්මානවලට පාත්‍රවී සිටිති.

ඉන්දියාවට එරෙහි තරග සංචාරයේ පැවැති එක්දින තරග තුනේදී වෙල්ලාලගේ පන්දු යවමින් කඩුලු 7 ක් සහ පන්දුවට පහර දෙමින් ඉනිමක ලකුණු ලබා ගැනීමේ සාමාන්‍ය 54 ක් රදවා තබා ගනිමින් ලකුණු 108 ක්ද ලබා ගනිමින් එම තරගාවලියේ දක්ෂතම ක්‍රීඩකයා සම්මානයෙන් පිදුම් ලැබීය.

මේ අතර අගෝස්තු මසදී පැවැති ශ්‍රී ලංකා කාන්තා ක්‍රිකට් කණ්ඩායමේ අයර්ලන්ත තරග සංචාරයේදී හර්ෂිතා පිතිකාරිනියක් ලෙස අතිෂය දක්ෂතා දැක්වීමට සමත්වූවාය. එම තරගාවලියේදී ඇය සිය මංගල එක්දින ශතකය වාර්තා කිරීමට සමත්වූවාය. එම එක්දින තරග දෙකේදී හර්ෂිතා 19, 105 සහ නොදැවී 48 වශයෙන් ලකුණු ලබා ගත්තාය. ඊට අමතරව පැවැති විස්සයි-20තරගාවලියේදී ඇය නොදැවී ලකුණු 86 ක් සහ 65 ක් වශයෙන් අර්ධ ශතක වාර්තා කරමින් පිතිකාරිණියක් ලෙස අතිශය සාර්ථකත්වයක් පෙන්නුම් කළාය.  

සෑම මාසයකදීම ක්‍රීඩකයින් ජාත්‍යන්තර ක්‍රිකට තරග පිටියේ දක්වන ලද දක්ෂතා මත පදනම්ව අන්තර්ජාතික ක්‍රිකට් සභාව විසින් මෙම සම්මාන ලබාදීම සිදුකරනු ලබයි. වෙල්ලාලගේට සහ සමරවික්‍රමට ප්‍රථම ඉන්දියාවේ ජස්ප්‍රිට් භුම්රා සහ ස්මිත්‍රී මන්දානා මීට පෙර එකම මාසකදී දක්ෂතම ක්‍රීඩකයා සහ ක්‍රීඩිකාව යන සම්මානය එකම මසකදී දිනා ගැනීමට සමත්වූ පළමු වැනි දෙපළ බවට පත්වූහ.