ශ්‍රී ලංකාව සහ නවසීලන්තය අතර පැවැත්වීමට නියමිත තරග 3 කින් සමන්විත පන්දුවාර විස්සයි-20 ක්‍රිකට් තරගාවලිය සඳහා සහභාගිවන ශ්‍රී ලංකා කණ්ඩායම අද (20 දා) රාත්‍රියේදී නවසීලන්තය බලා පිටත්ව ගියේය.

මෙම තරගාවලිය සඳහා ශ්‍රී ලංකා කණ්ඩායම කොටස් දෙකක් වශයෙන් නවසීලන්තය බලා පිටත්ව ගිය අතර එහි පළමු කොටස ඊයේ (19 දා) රාත්‍රියේ පිටත්ව ගියේය. ශ්‍රී ලංකා ක්‍රිකට් ආයතනයේ සර්ව ආගමික වතාවත්වලට සහභාගිවීමෙන් අනතුරුව ශ්‍රී ලංකා කණ්ඩායම කටුනායක බණ්ඩාරනායක ජාත්‍යන්තර ගුවන්තොටුපොළ බලා ගමන් ඇරඹීය.

“නවසීලන්තය කියන්නේ ඔවුන්ගේ තත්ත්වයන් වලදී ඉතා හොඳින් ක්‍රීඩා කරන කණ්ඩායමක්. අපිට තරගාවලිය ආරම්භයට පෙර පුහුණු තරගයකට ක්‍රීඩා කරන්න අවස්ථාව ලැබිලා තියෙනවා. ඒක අපිට තරගාවලියට පෙර හොද අවස්ථාවක්. මේ තරගාවලියේදී අපේ අපේ උපරිමය කරලා ජයග්‍රහණය කරන්න බලාපොරොත්තු වෙනවා“ යැයි ශ්‍රී ලංකා කණ්ඩායමේ නායක චරිත් අසලංක පිටත්ව යෑමට මොහොතකට පෙර මාධ්‍ය හමුවේදී සඳහන් කර සිටියේය.

විස්සයි-20 තරග 3 ට අමතරව මෙම තරගාවලිය යටතේ තරග 3 කින් සමන්විත එක්දින තරගාවලියක්ද පැවැත්වීමට නියමිතය. තරගාවලිය ජනවාරි මස 12 වැනිදා අවසන් වනු ඇත.

පන්දුවාර විස්සයි-20 තරගාවලියෙන් ආරම්භ වන දෙරට අතර තරගාවලියේ පළමු තරග දෙක දෙසැම්බර් මස 28 සහ 30 වැනි දිනයන්හිදී ටෟරංගාහි බේ ඕවල් ක්‍රීඩාංගණයේ දී පැවැත්වෙනු ඇත. තෙවැනි තරගය 2025 වසරේ ජනවාරි 02 වැනිදා සැක්ස්ටන් ඕවල්හිදී පැවැත්වෙනු ඇත.

එම තරගාවලියෙන් පසුව පැවැත්වෙන තරග 3 කින් සමන්විත එක්දින තරගාවලිය ජනවාරි 05 වැනිදා වෙලිංටන්හිදී ආරම්භ වේ. එහි දෙවැනි සහ තෙවැනි තරග පිළිවෙළින් 08 වැනිදා සහ 11 වැනිදා හැමිල්ටන් සහ ඕක්ලන්ඩ්හිදී පැවැත්වෙනු ඇත.

ශ්‍රී ලංකා විස්සයි-20 කණ්ඩායම – චරිත් අසලංක (නායක), පැතුම් නිස්සංක, කුසල් මෙන්ඩිස්, කමිඳු මෙන්ඩිස්, භානුක රාජපක්ෂ, චමිඳු වික්‍රමසිංහ, වනිඳු හසරංග, මහීෂ් තීක්ෂණ, මතීෂ පතිරණ, නුවන් තුෂාර, අසිත ප්‍රනාන්දු, බිනුර ප්‍රනාන්දු, දිනේෂ් චන්දිමාල්, අවිශ්ක ප්‍රනාන්දු, ජෙෆ්රි වැන්ඩර්සේ, කුසල් පෙරේරා.