නායක සදීර සමරවික්‍රමගේ අගනා ශතකය හේතුවෙන් අබුඩාබි නුවර පැවැත්වෙන තුන්කොන් ක්‍රිකට් තරගාවලිය යටතේ ඇෆ්ගනිස්තානු ‘ඒ‘ පිලට එරෙහිව පැවැති තරගයෙන්ද කඩුලු 6 ක පහසු ජයක් වාර්තා කර ගැනීමට ශ්‍රී ලංකා ‘ඒ‘ කණ්ඩායමට අද (15 දා) හැකියාව ලැබිණ.

මෙම තරගයේදී පළමුව පන්දුවට පහර දුන් ඇෆ්ගනිස්තානය ලබා දුන් ලකුණු 249 ක ඉලක්කය හඹා ගිය ශ්‍රී ලංකා ‘ඒ‘ පිතිකරුවෝ පන්දුවාර 41.3 කදී සපුරා ගන්නා ලද්දේ ප්‍රතිවාදීන් හමුවේ කඩුලු 4 ක් පමණක් ලබා දෙමිනි.

ශ්‍රී ලංකා ‘ඒ‘ පිල වෙනුවෙන් නායකත්වයේ පිතිහරඹයක් දියත් කළ සදීර සමරවික්‍රම පන්දු 110 කදී හයේ පහර 2 ක් සහ හතරේ පහර 16 ක් සමඟින් ලකුණු 129 ක් ලබා ගත්තේ තම ඉනිම නොබිඳිව තබා ගනිමිනි. ඔහුට අමතරව ශ්‍රී ලංකා කඳවුර වෙනුවෙන් ආරම්භක පිතිකරු ළහිරු උදාර පන්දු 83 කදී ලකුණු 81 ක් ලබා ශ්‍රී ලංකා ‘ඒ‘ ඉනිමට සාර්ථක ආරම්භයක් එක් කළේය.

කමිල් මිශාර සහ නුවනිඳු ප්‍රනාන්දු පන්දු 3 ක් ඇතුළතදී ලකුණ නොලබා දැවී ගිය ළහිරු උදාරට එක්වූ නායක සදීර තෙවැනි කඩුල්ල වෙනුවෙන් ලකුණු 163 ක සම්බන්ධතාවක් පවත්වමින් ශ්‍රී ලංකා ‘ඒ‘ ඉනිම අසීරුතාවයෙන් මුදවා ගත්හ.

පන්දු යැවීමේදී වේග පන්දු යවන ඩිල්ෂාන් මදුශංක තම පන්දුවාර 10 දී නිලකුණු පන්දුවාරයක්ද සමගින් ලකුණු 37 කට කඩුලු 4 ක් දවා ගනිමින් ඉනිමේ වැඩිම කඩුලු ලාභියා බවට පත්වූවේය. ඔහුට අමතරව අනෙක් ආරම්භක පිතිකරුවා වූ මොහොමඩ් ශිරාස් කඩුලු 2 ක් දවා ගනිද්දී දුෂාන් හේමන්ත එක් කඩුල්ලක් දවා ගත්තේය. ඇෆ්ගනිස්තාන ඉනිම මෙල්ල කිරීමට ශ්‍රී ලංකා නායකයා පන්දු යවන්නන් හත් දෙනෙකු උපයෝගී කර ගත්තේය.

ඇෆ්ගනිස්තානු ඉනිමේ පළමු කඩුලු 3 ම ලකුණු 04 ක් ඇතුළතදී දවා ගැනීමට වේග පන්දු යවන්නන් දෙදෙනා සමත්වද්දී මැද පෙළින් පැමිණි ඇෆ්ගනිස්තානු ‘ඒ‘ පිලේ නායක ඩව්රිෂ් රසූලි පන්දු 147 කට මුහුණ දෙමින් ලකුණු 155 ක් රැස් කරමින් ඇෆ්ගනිස්තානු ‘ඒ‘ ඉනිම ඔසවා තැබීය. ඒ ඉනිම හැරුනු කොට ඔවුන් වෙනුවෙන් ලකුණු 30 සීමාව ඉක්මවායෑමට සමත්වූයේ අක්‍රම් ඉ ල්කිල් (32) සහ ඉජාස් අහමඩ් (35) පමනි.

ඇෆ්ගනිස්තානු ‘ඒ‘ ඉනිම පන්දුවාර 50 කදී කඩුලු 8 කට ලකුණු 248 යි – (ඩව්රිස් රසූලි 155, අක්‍රම් අලිඛිල් 32, ඉජාස් අහමඩ් 35, ඩිල්ෂාන් මදුශංක 37/4, මොහොමඩ් ශිරාස් 43/2, දුෂාන් හේමන්ත 40/1)

ශ්‍රී ලංකා ‘ඒ‘ ඉනිම පන්දුවාර 41.3 කදී කඩුලු 4 ක් දැවී ලකුණු 249 යි – (සදීර සමරවික්‍රම 129,සහන් ආරච්චිගේ 23, ළහිරු උදාර 81, කලීල් අහමඩ් 51/2)