ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ ප්‍රධානතම එක්දින ලීග් ක්‍රිකට් තරගාවලිය හෙට (27 වැනිදා) ප්‍රමුඛ පෙළ ක්‍රීඩා සමාජ 14 කගේ සහභාගිත්වයෙන් කොළඹදී ආරම්භ වේ. මෙම තරගාවලිය කාණ්ඩ 2 ක් යටතේ පැවැත්වෙන ඇත. ඒ අනුව හෙට දිනයේදී වනාතමුල්ල පී. සරා, එන්. සී. සී., පොලිස්, කෝල්ට්ස්, බී.ආර්.සී. සහ මුවර්ස් යන ක්‍රීඩාංගණවලදී පැවැත්වෙනු ඇත.

මූලික වටය යටතේ පැවැත්වෙන ලීග් තරග ජූලි මස 21 වැනිදා දක්වා පැවැත්වෙන අතර අනතුරුව පිළිමළුන් පිටුදැකීමේ තරග වටය හෙවත් අවසන් පූර්ව තරග ජූලි මස 25 වැනිදාත් අවසන් මහ තරගය ජූලි මස 29 වැනිදාත් පැවැත්වෙනු ඇත. අදාළ අවසන් මහ තරගයට වර්ෂාවෙන් බාධා ඇති වුවහොත් ඒ සදහා ජුලි 30 වැනි දින අතිරේක දිනයක් ලෙසින් ද නම් කිරීමට තරග සංවිධායක කමිටුව පියවර ගෙන තිබේ.

අවසන් වතාවට පැවැති අන්තර් සමාජ ප්‍රධානතම එක්දින ක්‍රිකට් තරගාවලියේ ශූරතාව දිනා ගැනීමට ඒස් කැපිටල් ක්‍රීඩා සමාජය සමත්විය. අදාළ අවසන් මහ තරගයේදී කොළඹ සී.සී.සී. පිල පරාජයට පත් කරමින් 2024 වසරේ එක්දින ශූරයෝ ලෙසින් ඒස් කැපිටල් කිරුළ පැළඳූහ.

තරගාවලිය නියෝජනය කරනු ලබන කණ්ඩායම්

‘ඒ‘ කාණ්ඩය – ඒස් කැපිටල්, එන්. සී. සී. බදුරලිය, ටැමිල් යුනියන්, චිලව් මේරියන්ස්, පොලිස්, පානදුර.

‘බී‘ කාණ්ඩය – සී.සී.සී., මුවර්ස්, බී.ආර්.සී, කෝල්ට්ස්, නුගේගොඩ, බ්ලූම්ෆීල්ඩ්, කුරුණෑගල.

හෙට පැවැත්වීමට නියමිත තරග –

ඒස් කැපිටල් සහ ටැමිල් යුනියන් අතර පී. සරා ක්‍රීඩාංගණය

චිලව් මේරියන්ස් සහ බදුරලිය අතර එන්.සී.සී. ක්‍රීඩාංගණය

පොලිස් සහ එන්. සී.සී. අතර පොලිස් ක්‍රීඩාංගණය

කෝල්ට්ස් සහ සී.සී.සී. අතර කෝල්ට්ස් ක්‍රීඩාංගණය

නුගේගොඩ සහ බී.ආර්.සී. අතර බී.ආර්.සී. ක්‍රීඩාංගණය

මුවර්ස් සහ බ්ලූම්ෆීල්ඩ් අතර මුවර්ස් ක්‍රීඩාංගණය