ශ්‍රී ලංකා ක්‍රිකට් ආයතනය විසින් සංවිධානය කරන අන්තර් ක්‍රීඩා සමාජ ‘ටියර් බී‘ කොටසේ තෙදින ක්‍රිකට් තරගාවලිය ආරම්භ කරමින් අද (26) දොඹගොඩ යුද හමුදා පිටියේ පැවැත්වුණු ලියෝ ක්‍රීඩා සමාජය සහ කැන්ඩි කස්ටම් අතර තරගයේ දී පළමුව පන්දුවට පහර දුන් ලියෝ ක්‍රීඩා සමාජය තරගය නිම වන විට කඩුලු  පහකට ලකුණු 104ක් රැස් කර සිටියේය.

දිනය පුරා වරින් වර පැවැති වර්ෂාව මත අද දිනයේ දී යැවිය හැකි වුයේ පන්දුවාර  39ක් පමණකි. කාසියේ වාසිය දිනු කැන්ඩි කස්ටම්ස් කණ්ඩායම තීරණය කළේ ප්‍රථමයෙන් පන්දු රැකීමටය.

ලියෝ ක්‍රීඩා සමාජයේ පළමු කඩුලු තුන මුළු ලකුණු නවයක් වන විට දැවී ගොස් කණ්ඩායම අසීරු තත්ත්වයකට පත්ව සිටියේ පන්දුවාර 5.5ක් පමණක් යවා තිබිය දී  ය.  මේ තත්ත්වයෙන් කණ්ඩායම ගොඩ ගනු ලැබුවේ අකීල් ඉන්හම් සහ නෙත්ම කරුණාරත්න හය වන කඩුල්ලට නොදැවී ලකුණු  63ක සබඳතාවයක් තබා ගැනීමෙනි.

 තරගය නතර කරන විට අංක හතර පිතිකරු අකීල් ඉන්හම් පන්දු 91කට මුහුණ දී හතරේ පහර දෙකක් සමග නොදැවී ලකුණු 41ක් ද අංක හත පිතිකරු නෙත්ම කරුණාරත්න පන්දු 64කට මුහුණ දී හතරේ පහර තුනක් සමග නොදැවී ලකුණු 35ක් ද ලබා සිටියහ.

 දක්ෂ පන්දු යැවීමක නිරත වු කැන්ඩි කස්ටම් කණ්ඩායමේ අෂාන් රන්දික පන්දුවාර දහයක් යවා ලකුණු විස්සකට කඩුලු තුනක් දවාලුවේය.

 මේ අතර මෙම තුන් දින ලීග් තරගාවලියේ 28 වැනිදා අනුරාධපුර දිස්ත්‍රික්ක ක්‍රිකට් පිටියේ දී ආරම්භ වීමට නියමිත තිබූ ගාලු ක්‍රීඩා සමාජය සහ යුනයිටඩ් සදර්න් අතර තරගය බ්‍රහස්පතින්දා (නොවැම්බර් 27) කොළඹ මුවර්ස් ක්‍රීඩාංගණයේ උදේ 10.00ට ආරම්භ කිරීමට තීරණය කර ඇත.

ලියෝ ක්‍රිකට් සමාජය පළමු ඉනිම පන්දුවාර 39ක දී කඩුලු පහක් දැවී ලකුණු 104 යි – (අකීල් ඉන්හම් නොදැවී 41, නෙත්ම කරුණාරත්න නොදැවී 35, රොමේෂ් සුරංග 11, අයොන් ප්‍රනාන්දු 07, අෂාන් රන්දික 20/3, ෂොන් රුද්‍රිගො 21/2)