ශ්‍රී ලංකා ක්‍රිකට් සංවිධානය කරන ‘ටියර් බී’ අන්තර් සමාජ විස්සයි20 ක්‍රිකට් තරගාවලිය මැයි 13 වැනිදා ආරම්භ වී මැයි 27 වැනිදා දක්වා පැවැත්වේ. තරගාවලිය සඳහා කණ්ඩායම් 12ක් සහභාගි වන අතර, ඒවා ‘ඒ’ සහ ‘බී’ ලෙස කොටස් දෙකකට බෙදා ඇත.

‘ඒ’ කොටසට රාගම ක්‍රිකට් සමාජය, ලියෝ ක්‍රිකට් සමාජය, යුනයිටඩ් සදර්න් ක්‍රීඩා සමාජය, මොරටුව ක්‍රීඩා සමාජය, මීගමුව ක්‍රිකට් සමාජය සහ කුරුණෑගල ක්‍රිකට් සමාජය ඇතුළත් වේ.

‘බී’ කොටස නියෝජනය කරන්නේ යුද හමුදා ක්‍රීඩා සමාජය, හලාවත මේරියන්ස් ක්‍රීඩා සමාජය, ගාල්ල ක්‍රිකට් සමාජය, නාවික හමුදා ක්‍රීඩා සමාජය, සෙබස්ටියනයිට්ස් ක්‍රිකට් සමාජය සහ කැන්ඩි කස්ටම්ස් ක්‍රීඩා සමාජය යන කණ්ඩායම්ය.

තරග වැලිසර නාවික හමුදා ක්‍රීඩාංගණය, බම්බලපිටිය පොලිස් ක්‍රීඩාංගණය, බී.ආර්.සී. ක්‍රීඩාංගණය, පානදුර මහජන ක්‍රීඩාංගණය, මොරටුව ද සොයිසා ක්‍රීඩාංගණය සහ කටුනායක ගුවන් හමුදා ක්‍රීඩාංගණය යන ස්ථානවලදී පැවැත්වීමට නියමිතය.

මූලික වටයේ තරග මැයි 13, 15, 17, 19 සහ 21 යන දිනවලදී පැවැත්වෙන අතර, සෑම දිනකම පෙරවරු 9.45 සිට පස්වරු 12.55 දක්වා තරග තුනක් සහ පස්වරු 2.00 සිට 5.10 දක්වා තරග තුනක් ලෙස දිනකට තරග හයක් පැවැත්වේ.

අර්ධ අවසන් පූර්ව තරග හතර මැයි 23 වැනිදා පැවැත්වෙන අතර, අවසන් පූර්ව තරග දෙක මැයි 25 වැනිදාට නියමිතය. අවසන් මහා තරගය මැයි 27 වැනිදා පෙරවරු 9.45 සිට පස්වරු 12.55 දක්වා පැවැත්වීමට සැලසුම් කර ඇත. වර්ෂාව හේතුවෙන් එම කාලසීමාව තුළ තරගය පැවැත්වීමට නොහැකි වුවහොත්, එදිනම පස්වරු 2.00 සිට 5.10 දක්වා තරගය පැවැත්වීමට කටයුතු යොදා ඇත.