2026 – 2027 දේශීය ක්‍රිකට් වාරය ආරම්භ කරමින් හෙට (23) ආරම්භ කිරීමට සැලසුම් කර තිබූ විස්සයි-20 තරගාවලි අධික වර්ෂාපතනය හේතුවෙන් නැවතත් කල්දැමීමට ශ්‍රී ලංකා ක්‍රිකට් ආයතනය පියවර ගෙන තිබේ.

මෙම තරගාවලි මුලින් පසුගිය 13 වැනිදා ආරම්භ කිරීමට නියමිතව තිබූ අතර, එවකටත් පැවැති අයහපත් කාලගුණ තත්ත්වය හේතුවෙන් දින 10 කට ආසන්න කාලයක් සඳහා කල්දැමීමට සිදුවිය.

ඒ අනුව, ප්‍රධාන ක්ලබ් විස්සයි-20 තරගාවලිය, ‘බී’ තලයේ විස්සයි-20 තරගාවලිය සහ ආණ්ඩුකාර කුසලාන එක්දින තරගාවලිය ද තාවකාලිකව අත්හිටුවීමට ශ්‍රී ලංකා ක්‍රිකට් ආයතනය තීරණය කර ඇත.

පවතින කාලගුණ තත්ත්වය යහපත් වූ පසු තරගාවලි පැවැත්වෙන නව දිනයන් ප්‍රකාශයට පත් කරන බව ශ්‍රී ලංකා ක්‍රිකට් ආයතනය වැඩිදුරටත් සඳහන් කළේය.