ශ්‍රී ලංකා ක්‍රිකට් ආයතනය සංවිධානය කරන ගවනර්ස් කුසලාන අන්තර් සමාජ එක්දින ක්‍රිකට් තරගාවලියේ අද (28) පැවැති තරග දෙකකදී හෙට්ටිපොළ ක්‍රීඩා සමාජය සහ මැලේ ක්‍රිකට් සමාජය විශිෂ්ට ජයග්‍රහණ වාර්තා කළේය.

කුරුණෑගල වෙලගෙදර ක්‍රීඩාංගණයේ පැවැති හෙට්ටිපොළ ක්‍රීඩා සමාජය හා නාරම්මල ක්‍රීඩා සමාජය අතර තරගයේදී ලකුණු 149ක දැවැන්ත ජයක් හිමිකර ගැනීමට හෙට්ටිපොළ කණ්ඩායම සමත් විය. එහි ප්‍රධාන වීරයා වූයේ දිමන්ත අරෝෂ්ය. ඔහු අනර්ඝ ශතකයක් වාර්තා කරමින් කණ්ඩායමට ශක්තිමත් ලකුණු සංඛ්‍යාවක් ලබාදීමට විශාල දායකත්වයක් සැපයීය.

කාසියේ වාසිය දිනාගත් නාරම්මල කණ්ඩායම ප්‍රථමයෙන් පන්දුවට පහරදීමට හෙට්ටිපොළ පිලට ආරාධනා කළ අතර, මුල් කඩුලු කිහිපය ඉක්මනින් බිඳවැටුණද දිමන්ත අරෝෂ් ඉනිම ගොඩනඟමින් කැපී පෙනුණි. ඔහු බුද්ධිම සහන් සමඟ තෙවැනි කඩුල්ලට වටිනා සබඳතාවක් ගොඩනඟා කණ්ඩායම ස්ථාවර කළ අතර අවසන් කඩුලු සමඟද ලකුණු එකතු කරමින් ඉනිම ශක්තිමත් කළේය.

දිමන්ත අරෝෂ් පන්දු 130කදී හතරේ පහර 11ක් සහ හයේ පහර 2ක් සමඟ ලකුණු 132ක් රැස් කළේය. බුද්ධිම සහන් පන්දු 59කදී ලකුණු 61ක් ලබාගත් අතර හසිඳු ප්‍රබෝද් නොදැවී ලකුණු 38ක් එක් කළේය. ඒ අනුව හෙට්ටිපොළ කණ්ඩායම පන්දුවාර 50 අවසානයේ සියලු දෙනා දැවී ලකුණු 280ක් රැස් කළේය.

පිළිතුරු ඉනිම ක්‍රීඩා කළ නාරම්මල කණ්ඩායමට හෙට්ටිපොළ පන්දු යවන්නන් හමුවේ සාර්ථක වීමට නොහැකි වූ අතර ඔවුන් පන්දුවාර 37.5කදී ලකුණු 131කට සීමා විය. පසිඳු තෙන්නකෝන්, ශෙනාල් පෙරේරා සහ ඔමේෂ් විද්‍යාරත්න සාර්ථක පන්දු යැවීමක නිරත වූහ. තරගයේ දක්ෂතම ක්‍රීඩකයා ලෙස දිමන්ත අරෝෂ් නම් කෙරිණි.

මේ අතර අනුරාධපුර සාලියපුර ගජබා ක්‍රීඩාංගණයේ පැවැති මැලේ ක්‍රිකට් සමාජය සහ අඹේපුස්ස සිංහ ක්‍රීඩා සමාජය අතර තරගයෙන් මැලේ කණ්ඩායම ලකුණු 117ක ජයක් වාර්තා කළේය.

මුලින් පන්දුවට පහරදුන් මැලේ ක්‍රිකට් සමාජය පන්දුවාර 50 අවසානයේ කඩුලු 9ක් දැවී ලකුණු 252ක් රැස් කළේය. එහිදී සවිඳු උත්සර ප්‍රබල ඉනිමක් ක්‍රීඩා කරමින් පන්දු 78කදී හතරේ පහර 7ක් සහ හයේ පහර 6ක් සමඟ ලකුණු 96ක් ලබාගත්තේය. ඔහුට සහාය දුන් සචින් ගොඩමාන්න ලකුණු 34ක් සහ දිනුක දර්ශන ලකුණු 25ක් රැස් කළහ. අටවැනි කඩුල්ල සඳහා සවිඳු උත්සර සහ චලන දිල්ෂාන් අතර ගොඩනැගුණු සබඳතාවයද ඉනිම ශක්තිමත් කළේය.

ලකුණු 253ක ඉලක්කයක් හඹා ගිය අඹේපුස්ස සිංහ ක්‍රීඩා සමාජයට සාර්ථක ආරම්භයක් ලබාගත නොහැකි වූ අතර ඔවුන් සියලු දෙනා ලකුණු 135කට දැවී ගියහ. ප්‍රමිත් චේතිය ලකුණු 44ක් ලබාගනිමින් සටන්කාමී ඉනිමක් ක්‍රීඩා කළද අනෙක් පිතිකරුවන්ට දිගු ඉනිම් ගොඩනැගීමට නොහැකි විය.

මැලේ කණ්ඩායම වෙනුවෙන් තිළිණ ප්‍රනාන්දු කඩුලු 4ක් දවාලූ අතර ජනිත් මිහිරංග සහ සවිඳු උත්සරද පන්දු යැවීමෙන් දස්කම් දැක්වූහ. පිතිකරණය සහ පන්දු යැවීම යන අංශ දෙකෙන්ම කැපී පෙනුණු සවිඳු උත්සර තරගයේ දක්ෂතම ක්‍රීඩකයා ලෙස සම්මාන දිනාගත්තේය.

කුරුණෑගල වෙලගෙදර ක්‍රීඩාංගණයේ දී

හෙට්ටිපොළ ක්‍රීඩා සමාජය ලකුණු 149 ක ජයක්

හෙට්ටිපොළ ක්‍රීඩා සමාජය පන්දුවාර 50ක දී සියල්ල දැවී ලකුණු 280 – දිමන්ත අරෝෂ් 132, බුද්ධිම සහන් 61, හසිඳු ප්‍රබෝද් 38, කවිඳු විමලසූරිය 25, කුසල් ද සිල්වා 38/3, අයේෂ් රෂ්මික 48/1

නාරම්මල ක්‍රීඩා සමාජය පන්දුවාර 37.5ක දී සියල්ල දැවී ලකුණු 131 – අයේෂ් රෂ්මික 26, කුසල් ද සිල්වා 24, දුෂාන් සයුරංග 23, පසිඳු තෙන්නකෝන් 2/4, ශෙනාල් පෙරේරා 14/2, ඔමේෂ් විද්‍යාරත්න 21/2

සාලියපුර ගජබා ක්‍රීඩාංගණයේ දී

මැලේ ක්‍රිකට් සමාජය ලකුණු 117 ක ජයක්

මැලේ ක්‍රිකට් සමාජය පන්දුවාර 50ක දී කඩුලු 9ක් දැවී ලකුණු 252 – සවිඳු උත්සර 96, සචින් ගොඩමාන්න 34, දිනුක දර්ශන 25, චලන දිල්ෂාන් 23, ජනිත් මිහිරංග 21, අතුල සේනාරත්න 35/3, චනුක වනසිංහ 45/2

අඹේපුස්ස සිංහ ක්‍රීඩා සමාජය පන්දුවාර 35.3ක දී සියල්ල දැවී ලකුණු 135 – ප්‍රමිත් චේතිය 44, ඉඳුනිල් සංජීව 20, ළහිරු ධනංජය 17, තිළිණ ප්‍රනාන්දු 23/4, ජනිත් මිහිරංග 24/3, සවිඳු උත්සර 33/2