ලෝක ටෙස්ට් ශූරතාවලියේ නව චක්රය සාර්ථක ආරම්භයක් සමඟින් විශ්වාසය යළි ගොඩනඟා ගත් බටහිර ඉන්දීය කොදෙව් කණ්ඩායම සහ පළමු ටෙස්ට් තරගයේ දැඩි පරාජයෙන් පසු නැවතත් නැගී සිටීමට උත්සාහ කරන ශ්රී ලංකා කණ්ඩායම අතර දෙවැනි සහ අවසන් ටෙස්ට් ක්රිකට් තරගය අද (03) ඇන්ටිගුවාවේ නෝර්ත් සවුන්ඩ් ක්රීඩාංගණයේදී ආරම්භ වේ.
පළමු ටෙස්ට් තරගයේදී ඉනිමකින් සහ ලකුණු 67ක දැවැන්ත ජයක් වාර්තා කළ කොදෙව්වෝ පසුගිය ටෙස්ට් තරග අටෙන් හතක්ම පරාජයට පත්ව තිබූ අසීරු කාලපරිච්ඡේදයකට තිත තැබීමට සමත් වූහ. එම ජයග්රහණය නව නායක රොස්ටන් චේස්ගේ නායකත්වය යටතේ තරුණ ක්රීඩකයන්ගෙන් සමන්විත කණ්ඩායමේ විශ්වාසයටත් විශාල ශක්තියක් වී තිබේ.
කොදෙව් ජයග්රහණයේ ප්රධානතම සාධකය වූයේ අමීර් ජැන්ගූ සහ නායක රොස්ටන් චේස් අතර ගොඩනැගුණු දැවැන්ත සබඳතාවයයි. ඊට අමතරව අල්සාරි ජෝසප්, කෙමාර් රෝච්, ජේඩන් සීල්ස් සහ ශමාර් ජෝසප්ගේ වේගපන්දු ශ්රී ලංකා පිතිකරුවන්ට කිසිදු අවස්ථාවක් ලබා නොදුන්හ.
මේ අතර ආබාධයක් හේතුවෙන් පළමු ටෙස්ට් තරගය අහිමි වූ ෂායි හෝප් දෙවැනි ටෙස්ට් තරගයට නැවතත් එක්වීමට සූදානමින් සිටී. කෙසේ වෙතත් ඔහු වෙනුවට අවසන් මොහොතේ කණ්ඩායමට කැඳවනු ලැබූ අමීර් ජැන්ගූ සිය මංගල ටෙස්ට් ද්විත්ව ශතකය වාර්තා කරමින් ස්ථානය තහවුරු කරගෙන ඇති බැවින් අවසන් කණ්ඩායම් තේරීම කොදෙව් කළමනාකාරීත්වයට සුභදායී ගැටලුවක් බවට පත්ව තිබේ.
අනෙක් පසින් ශ්රී ලංකාවට පළමු ටෙස්ට් තරගය දැඩි අවදි කිරීමක් බවට පත්විය. දිගු කාලයකින් පසු විදේශීය ටෙස්ට් තරගයකට එක්වීමේ බලපෑම පිතිකරුවන්ගේ දුර්වල දස්කම් තුළ පැහැදිලිව දිස්විය. ආරම්භක පිතිකරු පැතුම් නිශ්ශංක මෙන්ම කුසල් මෙන්ඩිස් සහ කමිඳු මෙන්ඩිස් ද අපේක්ෂාවන් ඉටු කිරීමට අසමත් වූ අතර නායක ධනංජය ද සිල්වාගේ පළමු ඉනිමේ ශතකය පමණක් ශ්රී ලංකාවට ලැබුණු ප්රධාන සැනසිල්ල විය.
කෙසේ වෙතත් දෙවැනි ටෙස්ට් තරගයට පෙර ශ්රී ලංකාවට තවත් දැඩි අභියෝග කිහිපයක් එල්ල වී තිබේ. ආබාධ හේතුවෙන් පැතුම් නිශ්ශංක, ලහිරු කුමාර සහ විශ්ව ප්රනාන්දු සංචිතයෙන් ඉවත් වී ඇති අතර රමේෂ් මෙන්ඩිස්ද බැක්ටීරියා ආසාදනයක් හේතුවෙන් ක්රීඩා නොකරනු ඇත.
නිශ්ශංකගේ මැණික් කටුවේ ආබාධයකට ශල්යකර්මයක් අවශ්ය වී ඇති බැවින් ඔහු එංගලන්තය බලා පිටත්ව ගොස් තිබේ. එම හේතුවෙන් ලහිරු උදාර ආරම්භක පිතිකරු ලෙස කණ්ඩායමට එක්වන අතර ඉසිත විජේසුන්දර ටෙස්ට් වරම් දිනා ගනු ඇත. වමත් දඟ පන්දු යවන ප්රභාත් ජයසූරියවද අවසන් එකොලොස්දෙනා අතරටට කැඳවා ඇති අතර කසුන් රාජිතට මෙවර ස්ථානය අහිමි වනු ඇත.
ශ්රී ලංකාවට මේ තරගයේදී වඩාත්ම විශ්වාසය තැබිය හැකි පිතිකරු වන්නේ දිනේෂ් චන්දිමාල්ය. 2022 වසරේ සිට ටෙස්ට් ක්රිකට් පිටියේ අවම වශයෙන් ටෙස්ට් තරග 10ක් ක්රීඩා කළ පිතිකරුවන් අතර කමිඳු මෙන්ඩිස් සහ කේන් විලියම්සන්ට පමණක් පිටුපසින් සිටින චන්දිමාල් මෙම කාලය තුළ ලකුණු 2241ක් රැස් කරමින් ශ්රී ලංකාවේ වඩාත්ම ස්ථාවර ටෙස්ට් පිතිකරුවා බවට පත්ව ඇත. පළමු ටෙස්ට් තරගයේදීද ඔහු ඉනිම් දෙකේදී ලකුණු 97ක් රැස් කළ නමුත් එය තරගයේ ප්රතිඵලය වෙනස් කිරීමට ප්රමාණවත් නොවීය.
පළමු ටෙස්ට් තරගයේ තණතීරුව වේග පන්දු යවන්නන්ට සැලකිය යුතු සහායක් ලබාදුන් අතර දෙවැනි ටෙස්ට් තරගයේදීද එවැනිම තත්ත්වයක් අපේක්ෂා කෙරේ. තරගය පුරාම වර්ෂාවෙන් බාධා ඇතිවීමේ හැකියාවක් පවතින බව කාලගුණ වාර්තාවල දැක්වේ.
ලෝක ටෙස්ට් ශූරතාවලියේ ලකුණු සටහනේ ද මෙම තරගයට විශාල වැදගත්කමක් හිමි වේ. තරග සංඛ්යාව සීමිත බැවින් ශ්රී ලංකාවට ලෝක ටෙස්ට් ශූරතාවලියේ අවසන් මහ තරග බලාපොරොත්තුව තවුරටත් රඳවා ගැනීමට මෙම තරගයේ ජය අතිශය වැදගත් වනු ඇත.
බටහිර ඉන්දීය කොදෙව් කණ්ඩායම – ජෝන් කැම්ප්බෙල්, බ්රෙන්ඩන් කිං, ෂායි හෝප්, අමීර් ජැන්ගූ, ජස්ටින් ග්රීව්ස්, රොස්ටන් චේස් (නායක), ජොෂුවා ද සිල්වා, ජේඩ්න් සීල්ස්, අල්සාරි ජෝසප්, ශමාර් ජෝසප්, කෙමාර් රෝච්.
ශ්රී ලංකා කණ්ඩායම – ලහිරු උදාර, නිශාන් මදුෂ්ක, දිනේෂ් චන්දිමාල්, කමිඳු මෙන්ඩිස්, ධනංජය ද සිල්වා (නායක), කුසල් මෙන්ඩිස්, සොනාල් දිනූෂ, ප්රභාත් ජයසූරිය, මිලාන් රත්නායක, ඉසිත විජේසුන්දර, අසිත ප්රනාන්දු.
