බංග්ලාදේශය කාන්තා පිලට එරෙහි අවසන් එක්දින තරගාවලියට එක්වූ සංචිතය හා සැසඳීමේදී වෙනස්කම් තුනක් සමඟ පාකිස්තානයට එරෙහි එක්දින තරගාවලිය සඳහා ශ්‍රී ලංකා කාන්තා ක්‍රිකට් සංචිතය ශ්‍රී ලංකා ක්‍රිකට් තේරීම් කමිටුව විසින් නම් කර තිබේ. චමරි අතපත්තුගේ නායකත්වයෙන් යුතු ක්‍රීඩිකාවන් 15 දෙනෙකුගෙන් සමන්විත මෙම සංචිතයට විශ්මි ගුණරත්න සහ අනුෂ්කා සංජීවනී යළි කැඳවා ඇති අතර, තුන් ඉරියව් ක්‍රීඩිකා රශ්මිකා සෙව්වන්දිට ද අවස්ථාව හිමිව තිබේ.

එක්දින ජාත්‍යන්තර තරග 3 ක් සහ විස්සයි-20 ජාත්‍යන්තර තරග 3 ක් සඳහා ශ්‍රී ලංකාවේ සංචාරයක නිරත වීමට නියමිත පාකිස්තාන කාන්තා කණ්ඩායමට එරෙහි එක්දින තරගාවලිය සඳහා මෙම සංචිතය නම් කර ඇති අතර, කණ්ඩායමේ නායකත්වය සුපුරුදු පරිදි චමරි අතපත්තු දරයි.

බංග්ලාදේශයට එරෙහි අවසන් එක්දින තරගාවලියට එක්වූ සංචිතය සමඟ සසඳන විට මෙම සංචිතයට සිදුකර ඇති ප්‍රධාන වෙනස්කම් අතරින් කැපී පෙනෙන්නේ ආබාධයක් හේතුවෙන් එම සංචාරය අහිමි වූ ආරම්භක පිතිකාරිණිය වන විශ්මි ගුණරත්නගේ නැවත පැමිණීමයි. ඇයගේ එක්වීමත් සමඟ ශ්‍රී ලංකා ඉනිමේ ඉහළ පෙළ තවදුරටත් ශක්තිමත් වනු ඇත.

එමෙන්ම අත්දැකීම් බහුල කඩුලු රකින ක්‍රීඩිකාව වන අනුෂ්කා සංජීවනීද යළි සංචිතයට කැඳවා තිබේ. ඒ අනුව පසුගිය සංචාරයේ කඩුලු රකින්නිය ලෙස කටයුතු කළ කෞෂානි නුත්‍යාංගනාට මෙවර සංචිතයේ ස්ථානය අහිමි වී ඇත.

දේශීය තරග බිමේ දැක්වූ දක්ෂතා සැලකිල්ලට ගනිමින් තුන් ඉරියව් ක්‍රීඩිකා රශ්මිකා සෙව්වන්දිටද සංචිතයේ ස්ථානයක් හිමිව තිබීම විශේෂත්වයකි. ඇය මෙම සංචිතයේ නව මුහුණුවර බවට පත්ව සිටී.

කෙසේ වෙතත්, බංග්ලාදේශ සංචාරයට එක්ව සිටි වේග පන්දු යවන්නිය මල්කි මදාරා සහ තුන් ඉරියව් ක්‍රීඩිකා පියුමි වත්සලා මෙවර සංචිතයෙන් ඉවත් කර තිබේ. ඒ අනුව පසුගිය එක්දින සංචිතයට සාපේක්ෂව විශ්මි ගුණරත්න, අනුෂ්කා සංජීවනී සහ රශ්මිකා සෙව්වන්දි සංචිතයට එක්ව ඇති අතර, මල්කි මදාරා, පියුමි වත්සලා සහ කෞෂානි නුත්‍යාංගනා සංචිතයෙන් ඉවත් වී තිබේ.

දෙරට අතර එක්දින තරගාවලිය ජූලි මස 23 වැනිදා ආරම්භ වන අතර වෙැනි තරගය 25 වැනිදාත් තෙවැනි තරගය 28 වැනිදාත් හම්බන්තොට මහින්ද රාජපක්ෂ ක්‍රීඩාංගණයේදී පැවැත්වෙනු ඇත.

ශ්‍රී ලංකා කාන්තා එක්දින සංචිතය

චමරි අතපත්තු (නායිකා), විශ්මි ගුණරත්න, හසිනි පෙරේරා, හර්ෂිතා සමරවික්‍රම, හංසිමා කරුණාරත්න, කවීෂා දිල්හාරි, නිලක්ෂි සිල්වා, අනුෂ්කා සංජීවනී, චේතනා විමුක්ති, ඉනෝකා රණවීර, නිමාෂා මීපගේ, ඉමේෂා දුලානි, දෙව්මි විහංගා, රශ්මිකා සෙව්වන්දි සහ කාව්‍යා කාවින්දි.