ලංකා ප්‍රිමියර් ලීග් (LPL) 2026 තරගාවලියේ ජැෆ්නා කිංග්ස් කණ්ඩායමේ හිමිකරු ක්‍රීඩාවට අදාළ වැරදි වැළැක්වීම සඳහා පිහිටුවා ඇති විශේෂ විමර්ශන ඒකකය (Special Investigations Unit – SIU) විසින් අත්අඩංගුවට ගෙන ඇති බවට පළ වූ මාධ්‍ය වාර්තා පිළිබඳව ශ්‍රී ලංකා ක්‍රිකට් ආයතනයේ අවධානය යොමුවී තිබේ.

අදාළ සිද්ධිය සම්බන්ධයෙන් ක්‍රීඩාවට අදාළ වැරදි වැළැක්වීම සඳහා පිහිටුවා ඇති විශේෂ විමර්ශන ඒකකය (SIU) විසින් සිදුකරන ඕනෑම විමර්ශනයක් සඳහා අවශ්‍ය සියලු සහාය ලබාදීමට ශ්‍රී ලංකා ක්‍රිකට් ආයතනය සහ ලංකා ප්‍රිමියර් ලීග් සංවිධායකත්වය සූදානමින් සිටින බව දැනුම් දෙයි.

ලංකා ප්‍රිමියර් ලීග් 2026 තරගාවලියේ සංවිධායක සහ පාලන ආයතනය ලෙස, තරගාවලියේ විශ්වසනීයත්වය සහ අඛණ්ඩතාව ආරක්ෂා කිරීම ශ්‍රී ලංකා ක්‍රිකට් ආයතනයේ මූලික වගකීමක් වන අතර, තරගාවලියට සම්බන්ධ ඕනෑම පාර්ශ්වයකින් සිදුවිය හැකි දූෂණ, අයුතු බලපෑම්, විනය විරෝධී හෝ සදාචාර විරෝධී ක්‍රියාවන් සම්බන්ධයෙන් කිසිදු ආකාරයක සහනයක් ලබා නොදෙන බවද අවධාරණය කරයි.

මේ අතර, අද (17) පස්වරුවේ කොළඹ එස්.එස්.සී. ක්‍රීඩාංගණයේදී ආරම්භ වීමට නියමිත ලංකා ප්‍රිමියර් ලීග් 2026 තරගාවලිය සැලසුම් කළ පරිදි කිසිදු බාධාවකින් තොරව පැවැත්වෙන බව ශ්‍රී ලංකා ක්‍රිකට් ආයතනය මහජනතාවට දැනුම් දෙයි.

තරගාවලියේ තරගකාරීත්වය, විශ්වසනීයත්වය සහ ජාත්‍යන්තර ප්‍රමිතීන් ආරක්ෂා කරමින් එය ඉහළම සදාචාරාත්මක හා අඛණ්ඩතා ප්‍රමිතීන්ට අනුකූලව පැවැත්වීම සඳහා අවශ්‍ය සියලු ක්‍රියාමාර්ග මේ වන විටත් ක්‍රියාත්මක කර ඇත. ඒ අනුව ශ්‍රී ලංකා ක්‍රිකට් ආයතනයේ දූෂණ විරෝධී ඒකකය (Anti-Corruption Unit) රජයේ ක්‍රීඩාවට අදාළ වැරදි වැළැක්වීම සඳහා පිහිටුවා ඇති විශේෂ විමර්ශන ඒකකය (SIU) සමඟ සමීප සම්බන්ධීකරණයෙන් කටයුතු කරමින් තරගාවලියේ දූෂණ විරෝධී ආරක්ෂණ පද්ධතිය තවදුරටත් ශක්තිමත් කර තිබේ.

එමෙන්ම, ස්වාධීන දූෂණ විරෝධී සහ ක්‍රීඩා අඛණ්ඩතාව ආරක්ෂා කිරීම සඳහා විශේෂඥ සේවා සපයන ඉන්ටෙග්‍රිටි මෙන්ටර්ස් (Integrity Mentors) ආයතනය සමඟ ද එක්ව කටයුතු කරමින්, තරගාවලිය පුරා ක්‍රීඩකයන්, නිලධාරීන් සහ අනෙකුත් පාර්ශ්වයන් සඳහා අඛණ්ඩතා උපදේශන, අධ්‍යාපනික වැඩසටහන් සහ නිරීක්ෂණ ක්‍රියාවලීන් ක්‍රියාත්මක කරනු ලබයි. ඒ හරහා තරගාවලිය සාධාරණ, විනිවිදභාවයෙන් යුත් සහ දූෂණයෙන් තොර පරිසරයක් තුළ පැවැත්වීම තහවුරු කිරීමට පියවර ගෙන ඇත.

ශ්‍රී ලංකා ක්‍රිකට් ආයතනය දූෂණය සහ සදාචාර විරෝධී ක්‍රියාවන් සම්බන්ධයෙන් දැඩි ශුන්‍ය ඉවසීමේ ප්‍රතිපත්තියක් අනුගමනය කරන අතර, ලංකා ප්‍රිමියර් ලීග් 2026 තරගාවලියේ අඛණ්ඩතාව, ගෞරවය සහ විශ්වසනීයත්වය ආරක්ෂා කිරීම සඳහා අවශ්‍ය සෑම පියවරක්ම අඛණ්ඩව ගනිමින් තරගාවලිය ඉහළම ජාත්‍යන්තර ප්‍රමිතීන්ට අනුකූලව පවත්වාගෙන යාමට කැපවී සිටින බවද ශ්‍රී ලංකා ක්‍රිකට් ආයතනය වැඩිදුරටත් අවධාරණය කරයි.