පෙර පරිදිම සුපුරුදු දක්ෂතා දැක්වීමට හැකි තත්ත්වයකට තමා යළිත් පැමිණි සිටීම ඉමහත් සතුටට කරුණකැයි බදාදා (9) ජැෆ්නා ස්ටැලියන්ස් සමග තරගයේදී තරගයේ වීරයා ලෙස තේරුණු කැන්ඩි ටස්කර්ස් කණ්ඩායමේ තුන් ඉරියව් අසේල ගුණරත්න ප්‍රකාශ කරයි.

ලංකා ප්‍රිමියර් ලීග් ක්‍රිකට් තරගාවලියේ අවසන් කණ්ඩායමට 4 ට තේරීම සඳහා ජයග්‍රහණය තීරණාත්මක වුණු ජැෆ්නා ස්ටැලියන්ස්ක කණ්ඩායමට එරෙහි තරගයේදී කැන්ඩි ටස්කර්ස්හි ජයග්‍රහණයේ නියමුවා බවට පත් වුණු අසේල තරගයෙන් පසුව ඉහත අදහස් පළ කර සිටියේය.

“මේ වගේ අසීරු තත්ත්වයන්ට මුහුණ දෙමින් පීඩනය මැද ජයග්‍රහණය කරා කණ්ඩායම ගෙන යාමේ භාරදූර අවස්ථාවන් රැසකටම මා මුහුණ දී සිටිනවා. ඉන් ගොඩක් අවස්ථා මම ජයගෙන තියෙනවා. අදත් මා සාර්ථක වූයේත් එවැනිම අවස්ථාවකට මුහුණදීමෙන්” යි පැවැසූ ප්‍රකාශ කළේය.

මෙම තරගයේදී පන්දුවාර 4 කදී ලකුණු 21 කට කඩුලු 2 ක් සහ පන්දුවට පහර දෙමින් පන්දු 37 කදී නොදැවී ලකුණු 52 ක් රැස් කරන ලද්දේ හයේ පහරක් සහ හතරේ පහර 5 ක් ද සමඟිනි.

“මගේ පන්දුවට පහරදීම පසුගිය දිනවල මඳක් දුර්වල තත්ත්වයක් පැවැතුණත් මේ තරගාවලියේදී නැවත සුපුරුසු තත්ත්වයකට ඒම සතුටට කරුණක්. ඉදිරි තරග කිහිපයේදී මේ දක්ෂතා මේ අයුරින්ම පවත්වාගෙන යමින් කණ්ඩායමට උපරිමයෙන් දායක වීම මගේ අරමුණයි”.

“ජාත්‍යන්තරයේම අවධානය යොමුවන මෙවැනි තරගාවලියක් සාර්ථකව සංවිධානය කිරීම පිළිබදව ශ්‍රී ලංකා ක්‍රිකට් ආයතනයට අප ස්තූතිවන්ත විය යුතුයි. ඒ වගේම ක්‍රිකට් තරග පැවැත්වීම අපහසු මෙවැනි යුගයකදී තරුණ ක්‍රීඩකයන් රැසක්ම ඇතුළත්ව මෙරට ක්‍රීඩකයන් විශාල ප්‍රමාණයකට විදේශ ක්‍රීඩකයන් සමග තරග අත්දැකීම් ලබාගැනීමට අවස්ථාව උදාවීම අගය කළයුතු කරුණක්” යැයිද අසේල ගුණරත්න ප්‍රකාශ කළේය.

ජයග්‍රාහී කැන්ඩි ටස්කර්ස් කණ්ඩායමේ නායක කුසල් ජනිත් පෙරේරා අදහස් දක්වමින් “අද අප අත්කර ගත්තේ අවශ්‍යයෙන්ම තිබූ ජයග්‍රහණයකි. මේ තරගය අප පරාජය වූවානම් ඉතිරි තරගය අනිවාර්යෙන්ම ජයගත යුතුව තිබුණා. දැන් අපි ඊළග තරගයට යන්නේ සැහැල්ලු ආකාරයකින් තරගය ජයගැනීමේ අපේක්ෂාව ඇතිවයි” යැයි සඳහන් කර සිටියේය.