බංග්ලාදේශයට එරෙහිව පැවැත්වෙන තරග 3 කින් සමන්විත එක්දින තරගාවලියට පෙර ශ්‍රී ලංකා එක්දින කණ්ඩායම දෙපිළ බෙදී හෙවත් කුසල් XI ‘ඒ’ සහ කුසල් XI ‘බී’ අතර පවත්වන ලද පුහුණු තරගයෙන් ලකුණු 2 ක තියුණු ජයක් වාර්තා කිරීමට කුසල් මෙන්ඩිස්ගේ නායකත්වයෙන් යුතු කුසල් XI ‘බී’ කණ්ඩායම සමත්විය.

පන්දුවාර 40 කට සීමා වෙමින් පැවැති මෙම තරගයේදී ජයග්‍රහණය සඳහා ලකුණු 285 ක ඉලක්කයක් හඹා ගිය කුසල් පෙරේරාගේ නායකත්වයෙන් යුතු කුසල් XI ‘ඒ’ පිලට පන්දුවාර 37 කුත් පන්දු 2 කදී සියලු දෙනා දැවී රැස් කර ගත හැකි වූයේ ලකුණු 282 ක් පමණිත.

කුසල් XI ‘ඒ’ කණ්ඩායම වෙනුවෙන් වනිඳු හසරංග සහ අෂේන් බණ්ඩාර අර්ධ ශතක වාර්තා කළද එය ජයග්‍රහණය සඳහා ප්‍රමාණවත් නොවීය. සංචිතය සතු ක්‍රීඩකයින් 18 දෙනාගෙන් එක් කණ්ඩායමකට ක්‍රීඩකයින් නවය බැගින් වන සේ බෙදා පවත්වන ලද මෙම තරගයේදී දෙපිළේම පිතිකරුවන් 9 දෙනා බැගින් පන්දුවට පහර දුන්හ.

ඒ අතරින් අෂේන් බණ්ඩා පන්දු 79 කදී ලකුණු 80 ක් ලබා ගත්තේ හයේ පහර 2 ක් සහ හතරේ පහර 6 ක් තම ඉනිමට ඇතුළත් කර ගනිමිනි ඔහුට අමතරව අංක 3 ස්ථානයෙන් පන්දුවට පහර දුන් වනිඳු හසරංග පන්දු 39 කදී වේගවත් ලකුණු 79 ක් රැස් කරගන්නා ලද්දේ හයේ පහර 5 ක් සහ හතරේ පහර 9 කින් සිය ඉනිම වර්ණවත් කර ගනිමිනි. නායක කුසල් පෙරේරාට රැස් කරගත හැකි වූයේ ලකුණු 28 ක් පමණි. පන්දු යවන්නන් අතරින් ලකුණු 30 කට කඩුලු 3 ක් දවා ගැනීමට චාමික කරුණාරත්න සමත්විය.

ඩකාහි ක්‍රීඩා අධ්‍යාපන ආයතන ක්‍රීඩාංගණයේ පැවැති මෙම තරගයේදී  නිරෝෂන් දික්වැල්ල, සහ කුසල් මෙන්ඩිස් අර්ධ ශතක වාර්තා කරමින් කුසල් XI ‘බී’ පිල වෙනුවෙන් පිත්තෙන් දස්කම් දැක්වීමට සමත්වූහ. එක් පිලකට පන්දුවාර 40 බැගින් සීමා වෙමින් පැවැත්වෙන මෙම තරගයේ වැඩිම ලකුණු ලාභියා වුණු දික්වැල්ල පන්දු 63 කදී නොදැවී ලකුණු 88 ක් රැස් කරගත්තේය. එයට හයේ පහර 4 ක් සහ හතරේ පහර 8 ක් ඇතුළත්ව තිබිණ. නායකත්වයේ ඉනිමක් ක්‍රීඩා කළ උප නායක කුසල් මෙන්ඩිස් ලකුණු 71 ක් ලබා ගනු ලැබුවේ සිය ඉනිම හයේ පහර 3 කින් සහ හතරේ පහර 7 කින් වර්ණවත් කර ගනිමිනි. ඔහු පන්දු 49 කට පමණක් මුහුණ දුන්නේය.

කුසල් XI ‘ඒ’ – කුසල් පෙරේරා (නායක), ධනුෂ්ක ගුණතිලක, වනිඳු හසරංග, දසුන් ශානක, අෂේන් බණ්ඩාර, ඉසුරු උදාන, අකිල ධනංජය, අසිත ප්‍රනාන්දු, ශිරාන් ප්‍රනාන්දු.

කුසල් XI ‘බී’ – කුසල් මෙන්ඩිස් (නායක), නිරෝෂන් දික්වැල්ල, පැතුම් නිස්සංක, ධනංජය ද සිල්වා, රමේෂ් මෙන්ඩිස්, චාමික කරුණාරත්න, බිනුර ප්‍රනාන්දු, ලක්ෂාන් සඳකැන්, දුෂ්මන්ත චමීර.

කුසල් XI ‘බී’ පන්දුවාර 40 කදී කඩුලු 5 ක් දැවී ලකුණු 284 යි (නිරෝෂන් දික්වැල්ල 88*, පැතුම් නිස්සංක 02, කුසල් මෙන්ඩිස් 73, ධනංජය ද සිල්වා 25, චාමික කරුණාරත්න 35, රමේෂ් මෙන්ඩිස් 02, බිනුර ප්‍රනාන්දු 21*, ලක්ෂාන් සඳකැන් 27*, ධනුෂ්ක ගුණතිලක 26/1, අසිත ප්‍රනාන්දු 27/1, ඉසුරු උදාන 40/1, වනිඳු හසරංග 43/1)

කුසල් XI ‘ඒ’ පන්දුවාර 37.2 කදී සියලු දෙනා දැවී ලකුණු 282 යි – (අෂේන් බණ්ඩාර 80*, වනිඳු හසරංග 79, කුසල් ජනිත් 28, ධනුෂ්ක ගුණතිලක 17, දසුන් ශානක 01, අකිල ධනංජය 05, ශිරාන් ප්‍රනාන්දු 02, අසිත ප්‍රනාන්දු 00, චාමික කරුණාරත්න 40/3, දුෂ්මන්ත චමීර 45/1, රමේෂ් මෙන්ඩිස් 57/1, බිනුර ප්‍රනාන්දු 43/1, ලක්ෂාන් සඳකැන් 59/1)