slc
logo
Home   |    News
දෙසැම්බර් 17, 2021
‘කිංග්ස්’ ජයග්‍රාහී රැල්ල ‘ග්ලැඩියේටර්ස්වරුන්’ බිඳ දමයි

sinhala editor

By Chamila Karawita

පිට පිටම තරග 6 ක් ජයගනිමින් ජැෆ්නා කිංග්ස් පවත්වාගෙන ආ ජයග්‍රාහි රැල්ල බිඳ දැමීමට ගෝල් ග්ලැඩියේටර් ක්‍රීඩකයෝ අද (17 දා) සමත්වූහ. ලංකා ප්‍රිමියර් ලීග් තරගාවලියේ 19 වැනි තරගය බවට පත් එම තරගයේදී ලකුණු 20 ක ජයක් වාර්තා කළ ග්ලැඩියේටර්වරුන් මූලික තරග වටයේදී ජැෆ්නා කිංග්ස්ට එරෙහිව අපරාජිත භාවය රැක ගැනීමද කැපී පෙනුණි. දෙවැනි එල්.පී.එල්. තරගාවලිය ආරම්භක තරගය බවට පත් වුණු ගෝල් ග්ලැඩියේටර් සහ ජැෆ්නා කිංග්ස් අතර තරගය ජය ගත් ග්ලැඩියේටර්වරු මූලික වටයේ ඔවුන් යළි මුණ ගැසුණු දෙවැනි අවස්ථාවේදීද ජය වාර්තා කිරීම කැපී පෙනෙයි.

ජයග්‍රහණය සඳහා ලකුණු 130 ක ඉලක්කයක් හඹා යෑමේදී ජැෆ්නා කිංග්ස් පිතිකරුවන් සිර කර ගබා ගත් ග්ලැඩියේටර් පන්දු යවන්නෝ පන්දුවාර 18.3 ක් අවසානයේදී ඉනිම ලකුණු 109 කදී හමාර කළහ. තියුණු ලෙස දඟ කැවෙමින් තිබූ තණතීරුවේදී පන්දු යැවීම මෙන්ම ඉසුරු උදාන අතහැර දැමූ උඩ පන්දුව හැර ග්ලැඩියේටර්වරුන්ගේ පන්දු රැකීමද ඉතාම විශිෂ්ඨ මට්ටමක පැවැතිණ.

ප්‍රවේගකාරී පිතිකරණයේදී පන්දු 15 කදී ලකුණු 21 ක් ලබා ගත් රාමනුල්ලා ගුර්බාස්ව පිටියෙන් ඉවත් කළ සමිට් පටෙල් ටොම් කොලර්-කැඩ්මෝර්ගේ කඩුල්ලද දවා ගනිමින් ග්ලැඩියේටර් පිලට ජයග්‍රාහී මාවත විවර කර දුන්නේය. ලකුණු 10 ක් ඇතුළත ඔවුන් දෙදෙනාම පිටියෙන් ඉවත් වුවත චතුරංග ද සිල්වාට එක්වූ ෂොයෙබ් මලික් සිව්වැනි කඩුල්ලට 27 ක් එක් කරමින් කිංග්ස් ඉනිම ගොඩ ගැනීමට අසීරු උත්සාහයක් ගත්හ.

තරගාවලිය අතරතුරදී කණ්ඩායමට එක් වුණු සහන් ආරච්චිගේ විසින් චතුරංග දවා ගැනීමත් සමග කිංග්ස් ඉනිමේ කඩුලු එක පිට එක වැටීයෑම ඇරැඹිණ. සමිට් පටෙල්ට අමතරව කඩුලු 2 ක් දවා ගත් අනෙක් පන්දු යවන්නා වූ නූර් අහමඩ් ජයග්‍රහණයට තීරණාත්මකම ෂොයෙබ් මලික්ගේ කඩුල්ල දවා ගත්තේය. අහමඩ්ගේ නම ඉදිරියෙන් එම කඩුල්ල සටහන් වුවත් සියළු ගෞරව ෂෝර්ට් තර්ඩ්මෑන් කළාපයේ සිට උඩ පන්දුව රැකී මොහොමඩ් හෆීස්ට හිමිවිය යුතුය.

කිංග්ස් ඉනිමේ මැද භාගයේදී පන්දු යවන්නන් විසින් පාලනයකට නතු කර ගැනීම නිසා පන්දු සංඛ්‍යාවට වඩා ලබාගත යුතු ලකුණු සංඛ්‍යාවේ පරතරය වැඩිවිය. ඒ අනුව පීඩනය වැඩි කළ ග්ලැඩියේටර් පන්දු යවන්නෝ අවසන් කඩුලු 7 ම ලකුණු 39 ක් ඇතුළතදී දවා ගත්හ.

වැඩි ලකුණු සංඛ්‍යාවක් ලකුණු පුවරුවේ රඳවමින් ප්‍රතිවාදීන් වෙත පීඩනයක් එල්ල කිරීම ග්ලැඩියේටර් පිලේ සැලසුම වුවත්, එකම පිතිකරුවකුට හෝ ලකුණු 25 සීමාව ඉක්මවා රැස් කර ගැනීමට නොහැකි වූහ. වැඩිම ලකුණු ලාභියා ලෙසින් ලකුණු 23 ක් ලබා ගත් භානුක රාජපක්ෂ ඉදිරියෙන් සිටියත් ඒ සඳහා ඔහු පන්දු 25 කට මුහුණ දී තිබුණේය.

වනිඳු හසරංග වෙනුවට අද තරගයට කැඳවා තිබූ ප්‍රවීන් ජයවික්‍රම කිංග්ස් පිල වෙනුවෙන් හොඳම පන්දු යැවීම වාර්තා කර ගත්තේය. පිතිකරුවන් මෙල්ල කිරීම වෙනුවෙන් නායක තිසර පන්දු යවන්නන් 7 දෙනෙකුගේ සහයෝගය ලබා ගනිද්දී ඔවුන් විසින් නිලකුණු පන්දු 58 ක් සටහන් කරගැනීමට සමත්වූහ. ඒ අතරින් ජයවික්‍රමට එරෙහිව එකම හයේ පහරක් හෝ හතරේ පහරක් එල්ල කිරීමට ප්‍රතිවාදී පිතිකරුවෝ අසමත්වූහ.

ආරම්භක පිතිකරු ධනුෂ්ක ගුණතිලක අද තරගයේදීද ලකුණු අතරට ඒමට අපොහොසත් විය. ගිය වර තරගාවලියේ තරග 10 කට ක්‍රීඩා කරමින් ලකුණු 476 ක් රැස් කරගත් ගුණතිලක මෙවර තරගාවලියේ සහභාගිවූ තරග 8 දී රැස් කර ගන්නා ලද්දේ ලකුණු 98 ක් පමණි. ඒ අතරින් තෙවැනි තරගයේ රැස් කරන ලද ලකුණු 45 ඉහළම ලකුණු සංඛ්‍යාව ලෙසින් සටහන් විය. අද තරගයේදී රැස් කරන ලද ලකුණු 19 හැරුණු කොට 22, 14, 5, 3*, 45, 1 සහ 8 වශයෙන් ගුණතිලකගේ ඉනිම සටහන් විය.  

ග්ලැඩියේටර් පන්දු යවන්නන් මෙන්ම කිංග්ස් පන්දු යවන්නන්ද කෙතරම් හොඳින් පන්දු යැවුවේද කිවහොත් ප්‍රතිවාදීන් හමුවේ හයේ පහරක් එල්ල කිරීමට අවස්ථාව සලසා දුන්නේ එක් අවස්ථාවකදී පමණි. සහන් ආරච්චිගේ විසින් එම පහර එල්ල කරද්දී සමස්ථ ඉනිමේ නිලකුණු පන්දු සංඛ්‍යාව පන්දුවාර 10 කට අඩු වූයේ 2 ක් පමණි.

ඒ අනුව තරගාවලියේ මීළඟ අදියර හෙවත් හම්බන්තොටදී පැවැත්වෙන අවසන් තරග වටයේදී සුදුසුකම් ලැබීමේ පළමු තරගය යටතේ ගෝල් ග්ලැඩියේටර්ස් සහ ජැෆ්නා කිංග්ස් පිල තරග වැදීමට නියමිතව තිබේ. එම තරගය දෙසැම්බර් 19 වැනිදා පස්වරු 7.30 ට සූරියවැව මහින්ද රාජපක්ෂ ක්‍රීඩාංගණයේදී ආරම්භ වේ.

තරගයේ වීරයා – භානුක රාජපක්ෂ

ලකුණු සාරාංශය

ගෝල් ග්ලැඩියේටර්ස් පන්දුවාර 20 කදී කඩුලු 9 ක් දැවී ලකුණු 129 යි – (භානුක රාජපක්ෂ 23, ධනුෂ්ක ගුණතිලක 19, මොහොමඩ් හෆීස් 15, සහන් ආරච්චිගේ 14, පුලින තරංග 14, ප්‍රවීන් ජයවික්‍රම 13/2, විජේකාන්ත් වියස්කාන්ත් 21/2, වහාබ් රියාස් 31/2, ෂොයෙබ් මලික් 16/1)

ජැෆ්නා ස්ටැලියන්ස් පන්දුවාර 18.3 කදී සියලු දෙනා දැවී ලකුණු 109 යි – (ෂොයෙබ් මලික් 23, රාමනුල්ලා ගුර්බාස් 21, අශේන් බණ්ඩාර 18, සමිට් පටෙල් 15/2, නූර් අහමඩ් 12/2, මොහොමඩ් හෆීස් 23/1, මොහොමඩ් අමීර් 25/1, සහන් ආරච්චිගේ 09/1)

Active filters

Recent Posts

  • ශ්‍රී ලංකා කාන්තාවෝ කල් ඇතිවම තරගාවලි ජය ලබති
    බටහිර ඉන්දීය කොදෙව් කාන්තා කණ්ඩායම හා ශ්‍රී ලංකා කාන්තා කණ්ඩායම අතර තරග 3කින් සමන්විත අන්තර්ජාතික එක්දින තරගාවලියේ පිට පිට තරග දෙකක් ජයගත් ශ්‍රී ලංකා කාන්තා පිල තරගයක් ඉතිරිව […]
  • 21 න් පහළ අවසන් ගැටුම සෙබස්තියනයිට්ස් සහ මැලේ අතර
    ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන වයස අවුරුදු 21 න් පහළ ටියර් ‘බී‘ කොටසේ දෙදින ක්‍රිකට් තරගාවලියේ අවසන් මහ සටන සඳහා සුදුසුකම් ලබා ගැනීමට මොරටුව සෙබස්තියනයිට්ස් සහ මැලේ […]
  • ආණ්ඩුකාර කුසලාන අවසන් පූර්ව තරග ජුනි 22 වැනිදා  
    ශ්‍රී ලංකා ක්‍රිකට් ආයතනය විසින් සංවිධානය කරනු ලබන ආණ්ඩුකාර කුසලාන පන්දුවාර 50 ක්‍රිකට් තරගාවලියේ අවසන් මහ තරග අවස්ථාව උදාකර ගැනීම වෙනුවෙන් වන අවසන් කඩඉම වන අර්ධ අවසන් තරග […]
  • ජයග්‍රහණයක් සමඟින් ශ්‍රී ලංකාව ලෝක කුසලාන ගමන නිමා කරයි
    ග්‍රොස් අයිලට් නුවර ඩැරන් සාමි ජාතික ක්‍රීඩාංගණයේ පැවැති තරගයේදී නෙදර්ලන්ත පිලට එරෙහිව ලකුණු 83 ක විශිෂ්ඨ තරග ජයග්‍රහණයක් වාර්තා කළ ශ්‍රී ලංකා කණ්ඩායම 2024 පන්දුවාර විස්සයි-20 ලෝක කුසලාන ගමන […]
  • සී.සී.සී. අපරාජිතව පෙරමුණේ
    ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ සීමිත ඕවර් ක්‍රිකට් තරගාවලියේ අද (16) නිමාවූ සීසීසී හා මුවර්ස් ක්‍රීඩා සමාජය අතර බ්ලූම්ෆීල්ඩ් ක්‍රීඩාංගණයේ පැවැති තරගයේදී ලකුණු 74ක ජයක් […]

Pin It on Pinterest

LKR Sri Lankan rupee