බටහිර ඉන්දීය කොදෙව් දූපත්හි පැවැත්වෙන අවුරුදු 19න් පහළ ලෝක කුසලාන ක්‍රිකට් තරගාවලියේ සිව්වන අර්ධ අවසාන පූර්ව තරගයේදී තියුණු තරගයකින් පසුව ශ්‍රී ලංකාව ලකුණු හතරකින් ඇෆ්ගනිස්තානයට පරාජය විය.

බ්‍රහස්පතින්දා (27) පැවැති මේ තරගයේදී ශ්‍රී ලංකා යොවුන් කණ්ඩායම ඇෆ්ගනිස්තානය පන්දුවාර 47.1කදී ලකුණු 134කට සීමා කළත් ශ්‍රී ලංකා යොවුන් කණ්ඩායමද පන්දුවාර 46ක් අවසානයේ සියලු පිතිකරුවන් දැවී ලබාගත හැකිවූයේ ලකුණු 130ක් පමණකි.

ශ්‍රී ලංකා යොවුන් කණ්ඩායම ලකුණු 135ක පහසු ජයග්‍රහණ ඉලක්කයක් හඹායාමට ක්‍රීඩාංගණයට පිවිසි අවස්ථාවේ පන්දුවාර 17.1ක් නිමවන අවස්ථාවේ ලකුණු 43කට කඩුලු 7ක් ලකුණු පුවරුවේ  සඳහන්ව තිබුනේ අසීරුම තත්ත්වයකට පත්වෙමිනි.

ශ්‍රී ලංකා අටවන කඩුල්ලට නායක දුනිත් වෙල්ලා‍ලගේ සහ උපනායක රවීන් ද සිල්වා පන්දු 142කදී ලකුණු 69ක සබඳතාවයක් රැස්කර මුළු ලකුණු සංඛ්‍යාව 112 දක්වා රැස්කරමින් ජයග්‍රහණ අපේක්ෂා ඇති කළත් වෙල්ලාලගේ දැවීයාමත් සමඟ ඉතිරි පිතිකරුවන්ද අඩු ලකුණු සංඛ්‍යාවන්ට දැවී ලංකා ඉනිම 130කදී නිමාවිය.

ශ්‍රී ලංකා කණ්ඩායම ජයග්‍රහණය කරා ගෙන යාමට ප්‍රබල වෑයමක නිරතවූ වෙල්ලාලගේ පන්දු 61කදී හතරේ පහර තුනක් සමඟ අගනා ලකුණු 34ක්ද ඔහුට නොමද සහයක් දුන් උපනායක රවීන් ද සිල්වා පන්දු 84කදී හතරේ පහර දෙකක් සමඟ ලකුණු 21ක්ද රැස්කළහ. මීට අමතරව ආරම්භක පිතිකරු චමිඳු වික්‍රමසිංහ ලකුණු 16ක්ද (පන්දු 53) විනුජ රන්පුල් ලකුණු 11ක්ද පන්දු 14 හතරේ පහරයි ලැබූහ.

ශ්‍රී ලංකා නායක වෙල්ලාලගේ මේ තරගයේදී ද කඩුලු තුනක් දවාලු අතර මේ තරගාවලියේ තරග හතරකදී ඔහු දවාලූ කඩුලු ප්‍රමාණය 16කි. ඇෆ්ගනිස්තානය සමඟ දක්ෂ පන්දු යැවීමක නිරතවූ දකුණත් වේග පන්දු යවන විනුජ රන්පුල් ලකුණු දයහකට කඩුලු පහක්ම දවාලීය.

ශ්‍රී ලංකාව කාසියේ වාසිය දිනා ඇන්ටිගුවා දූපතේ ගූලිජ්  ක්‍රීඩාංගණයේ මුලින් පන්දුවට පහරදීම ඇෆ්ගනිස්තානයට පැවරීමෙන් පසුව ඇෆ්ගනිස්තාන පිතිකරුවන් ඉනිමේ කිසිදු අවස්ථාවක පන්දු වාරයකට ලකුණු තුනක සීමාව කරාවත් පැමිණීමට අපොහොසක්විණි.

විනුජ් රන්පුල්ගේ සහ ට්‍රවීන් මැතිව්ගේ අති දක්ෂවූ පන්දුයැවීම මත ඇෆ්ගනිස්තානය පන්දුවාර 25ක් අවසාන වනවිට කඩුලු හතරක්ම දැවී ලබා සිටියේ ලකුණු 55කි. රන්පුල්ගෙ පන්දුවාර 9.1දී ලකුණු දහයකට පිතිකරුවන් පස්දෙනෙකුම දැවීයාමත් ඉනිම මුල් භාගයේදී මැතිව්ගේ පන්දුවාර දහයෙන් පිතිකරුවකු දැවී ලකුණු 13ක් පමණක් රැස්කිරීමත් මත ශ්‍රී ලංකා කණ්ඩායමට ඇෆ්ගනිස්තානයට ප්‍රමාණවත් ලකුණු සංඛ්‍යාවක් කරා යාමට ඉඩනොදීමේ අවස්ථාව උදාවිණි.

නායක වෙල්ලාලගේ මේ තරගාවලියේ පන්දු යැවීමේ සුපුරුදු දක්ෂතාවයන් තීව්‍ර කළේ මැදපෙළ පිතිකරුවන් තිදෙනෙකු දවාලමිනි. පිතිකරණයේදී ඇෆ්ගනිස්තානයට යන්තමින් හෝ දස්කමක් පෙන්වීමට අවස්ථාව උදාවූයේ ඉනිමේ අවසාන පන්දුවාර හතේදී රැස්කරගත් ලකුණු 46මතය.

ඇෆ්ගනිස්තාන ඉනිමේ සාර්ථකම පිතිකරුවා වූ නූර් අහ්මඩ් පන්දු 33කදී ලකුණු 30ක් රැස්කළේ හයේ පහර හතරක් එල්ල කරමිනි. වැඩිම ලකුණු ලාභියා වූ අබ්දුල් හාඩි පන්දු 97කට මුහුණදී ලබාගත් ලකුණු 37ට හතරේ තුනක් සහ හයේ පහරක්ද ඇතුළත්විය. ලකුණු රැස්කිරීමේදී සාර්ථකවූ අනෙක් පිතිකරුවා වූ අල්ලා නූර් ලකුණු 25ක් ලබාගත්තේ පන්දු 58කදී හතරේ පහරක් සමඟය. ඉනිමේ ලකුණු රැස්කිරීමේ පන්දුවාරයක සාමාන්‍ය වේගය 2.84ක් පමණකි.

ලකුණු විස්තරය

ඇෆ්ගනිස්තානය පන්දුවාර 47.1කදී සියල්ල දැවී 134යි – (අබ්දුල් හාඩි 37, නූර් අහ්මඩ් 30, අල්ලා නූර් 25, විනුජ රන්පුල් 10/5, දුනිත් වෙල්ලාලගේ 36/3යි, ට්‍රොවීන් මැතිව් 13/1යි)

ශ්‍රී ලංකාව පන්දුවාර 46කදී සියල්ල දැවී 130යි – ( දුනිත් වෙල්ලාලගේ 34, රවීන් ද සිල්වා 21, චමිඳු වික්‍රමසිංහ 16, විනුජ රන්පුල් 11, බිලාල් සාමි 33/2)