නැෂනල් සුපර්ලීග් සිව්දින ක්‍රිකට් තරගාවලියේ දක්ෂතම පිතිකරු ලෙස තේරුණු කැන්ඩි කණ්ඩායමේ 21 හැවිරිදි අහන් වික්‍රමසිංහගේ ප්‍රධානම අපේක්ෂාව වී ඇත්තේ ශ්‍රී ලංකා නැගී එන කණ්ඩායම හෝ ශ්‍රී ලංකා ‘ඒ’ කණ්ඩායම ඉක්මනින්ම නියෝජනය කිරීමය.
අහන් වික්‍රමසිංහ නැෂනල් සුපර්ලීග් තරගාවලියේ දී අවසාන පූර්ව තරගය නිම වන විට ලකුණු 448ක් ලබා සිටියේ ශතක දෙකක් සහ අර්ධශතක තුනක් සමගය. කැන්ඩි කණ්ඩායමට අවසන් මහ තරගයට සුදුසුකම් ලැබීමට අවස්ථාව උදාවූයේ නම් මීට වඩා ඉදිරියට ඒමේ හැකියාව තිබිණ.
කොළඹ රාජකීය විදුහලේ ආදි සිසුවෙකු වන අහන් පාසල් වියේදීම ශ්‍රී ලංකා 19න් පහළ කණ්ඩායම නියෝජනය කිරීමට ද සමත් විණි. තිළිණ කන්ඩම්බි සහ ජෙහාන් මුබාරක්, අහන් වික්‍රමසිංහගේ පුහුණුකරුවන් වූ අතර පාසල් දිවියෙන් පසුව වසර තුනක්ම එකදිගට නියෝජනය කළේ මෙට්ලන්ඩ් පෙදෙසේ එන්. සී. සී. ක්‍රීඩා සමාජයයි.
කණ්ඩායමේ කඩුලු රකින්නා සහ අංක හය පිතිකරු ලෙස පිටියට පිවිසෙන අහන් පන්දුවට පහරදීමේ දී වඩාත්ම කැමැත්තක් දක්වන්නේ දඟපන්දු යවන්නන්ට මුහුණ දී පහසුවෙන් ලකුණු රැස්කිරීම යැයි ද පවසයි.
“නැෂනල් සුපර්ලීග් තරගාවලියට ශ්‍රී ලංකාවේ දක්ෂම පිතිකරුවන් සහ පන්දු යවන්නන් සියල්ලම සහභාගි වනවා. එවැනි තරගාවලියක දක්ෂතම පිතිකරුවීම සතුටට කරුණක්” යැයි අහන් වික්‍රමසිංහ පවසයි.
ඔහුගේ ඉදිරි අනාගත සැලසුම් පිළිබඳව අහන් ප්‍රකාශ කළේ මේ දිනවල පවතින අවුරුදු 23න් පහළ තරගාවලියේදීත් දස්කම් පෙන්වා ශ්‍රී ලංකා ‘ඒ’ හෝ එමර්ජින් කණ්ඩායම් නියෝජනය කිරීමේ වරමට අවස්ථාව උදාකර ගැනීම වන බවයි.
