මෙම වසරේ අගෝස්තු 31 වැනිදා ආරම්භ වීමට ශ්‍රී ලංකා කාන්තා ක්‍රිකට් කණ්ඩායමේ එංගලන්ත තරග සංචාරයේ නිල තරග කාල සටහන නිකුත් කිරීමට එංගලන්ත ක්‍රිකට් ආයතනය පියවර ගෛ තිබේ.
2025 වසරේදී ඉන්දියාවේ පැවැත්වීමට නියමිත පන්දුවාර 50 කාන්තා ලෝක කුසලාන ක්‍රිකට් තරගාවලියට සුදුසුකම් ලබා ගැනීමේ තරගාවලියක් ලෙසින් සැප්තැම්බර් 14 වැනිදා දක්වා පැවැත්වෙන මෙම තරගාවලියට එක්දින තරග 3 ට අමතරව විස්සයි-20 තරග 3 ක් ද ඇතුළත්ව තිබේ.
විස්සයි-20 තරගාවලියෙන් ආරම්භ වන මෙම තරගාවලියේ පළමු තරගය අගෝස්තු 31 වැනිදා සෙන්ට්‍රල් කවුන්ටි ක්‍රීඩාංගයේදීත් දෙවැනි තරගය සැප්තැම්බර් 02 වැනිදා ක්ලවුඩ් කවුන්ටි ක්‍රීඩාංගණයේදීත් සහ තෙවැනි සහ අවසන් තරගය සැප්තැම්බර් මස 06 වැනිදා ඉන්කොරා කවුන්ටි ක්‍රීඩාංගණයේදී පැවැත්වෙනු ඇත.
ශ්‍රී ලංකා කාන්තා කණ්ඩායම මේ වන විට එම ලෝක කුසලාන සුදුසුකම් ලබා ගැනීමේ තරග වටයේදී බංග්ලාදේශ කාන්තා පිල සමග තරග වදිමින් සිටින අතර එහි පළමු තරගය වර්ෂාව හේතුවෙන් ප්‍රතිඵල රහිත විය. දෙවැනි එක්දින තරගයද එක් පන්දුවක් හෝ නොයවා අතහැර දැමීමට සිදු වුවත් දෙරටේ සාකච්ඡා සාර්ථකවීම නිසා නැවතත් මැයි 04 වැනිදා දෙවැනි එක්දින තරගය යළි පැවැත්වීමට සැලසුම් යොදා තිබේ.
මේ දක්වා සුදුසුකම් ලැබීමේ තරගාවලිය යටතේ ශ්‍රී ලංකාව මේ දක්වා තරග 7 කට ක්‍රීඩා කොට එක් තරගයක් ජය ගනිමින්ද තවත් තරගයක් විසඳුමකින් තොර වීම නිසා ප්‍රසාද ලකුණු 03 ක් ලබා එම ප්‍රසාද ලකුණු සටහනේ 08 වැනි ස්ථානයේ පසුවන්නේය.
තරග කාල සටහන
- අගෝස්තු 31 – පළමු විස්සයි-20 තරගය
- සැප්තැම්බර් 02 – දෙවැනි විස්සයි-20 තරගය
- සැප්තැම්බර් 06 – තෙවැනි විස්සයි-20 තරගය
- සැප්තැම්බර් 09 – පළමු එක්දින තරගය
- සැප්තැම්බර් 12 – දෙවැනි එක්දින තරගය
- සැප්තැම්බර් 14 – තෙවැනි එක්දින තරගය
